ბიუჯეტის ფულით გარემონტებული ზაურ ბოლქვაძის არარსებული სახლ-მუზეუმი

ჩოხატაურის მუნიციპალიტეტის სამუზეუმო გაერთიანებაში, 2014 წლის პირველი იანვრიდან, დღემდე 5 ახალი თანამშრომელია დანიშნული.

დარეჯან ცინცაძე ნიკო ბერძენიშვილის სახელობის მხარეთმცოდნეობის მუზეუმის კურატორია და მისი თვიური ანაზღაურება 300 ლარს შეადგენს _ გაერთიანების დირექტორის შოთა ჩანტლაძის თქმით, კურატორის ფუნქციებში ფონდების მცველის დახმარება შედის; ვალერიან კალანდაძე მოსე გოგიბერიძის სახლ-მუზეუმში ექსკურსია-მძღოლად დანიშნეს და მისი თვიური ანაზღაურება 150 ლარია; მზია მეფარიშვილი ნოდარ დუმბაძის სახლ-მუზეუმის დამლაგებელია 150-ლარიანი ხელფასით; ნინო კეკელიძე სამუზეუმო გაერთიანების სპეციალისტია საქმისწარმოებისა და საორგანიზაციო საკითხებში და მისი ხელფასი 350 ლარია. ამდენივე ყოველთვიური ანაზღაურება აქვს მამია ბარამიძეს, რომელიც გაერთიანების სამნეო ნაწილის გამგის თანამდებობას იკავებს.

გასული ერთი წლის განმავლობაში სამუზეუმო გაერთიანებას რამდენიმე მნიშვნელოვანი ხელშეკრულება აქვს გაფორმებული _ 350 ლარად პლანშეტი შეუძენიათ, რომელიც, გაერთიანების ხელმძღვანელის შოთა ჩანტლაძის განმარტებით, სამუზეუმო გაერთიანების პროექტში მონაწილე გამარჯვებულ მოსწავლეს გადაეცა.

მართალია, გასულ წელს სამუზეუმო გაერთიანებამ ახალი კომპიუტერი შეიძინა, თუმცა, კომპიუტერის შეკეთებისთვის 200 ლარია გადახდილი. ხელშეკრულებებში და მიღება-ჩაბარების აქტებში არ არის დაკონკრეტებული, რა სახის ტექნიკური მომსახურებაშია ამ რაოდენობის თანხა გადახდილი.

2014 წლის 16 იანვარს გაფორმებული ხელშეკრულების თანახმად, შპს "მაგთიკომისგან" შეძენილია 720 ლარის მონო და ბალი ბარათები. ეს მაშინ, როცა სამუზეუმო გაერთიანება კომპანია ჯეოსელის კორპორატიული მომსახურებით სარგებლობს.

შოთა ჩანტლაძე გვიმტკიცებს, რომ ბარათები მათ არ შეუძენიათ:

_ ეს არის "მაგთის" ფორმა _ მათ ჩაწერეს ბარათები, თუმცა, ჩვენ ის არ მიგვიღია. ეს თანხა "მაგთის" მოდემის მომსახურებისაა.

_ ბატონო შოთა, ხელშეკრულებაში გარკვევით წერია მონო და ბალი ბარათები. თუკი ამ მომსახურებას არ იღებდით, კომპანიისგან ხელშეკრულებაზე ხელი რატომ მოაწერეთ?

_ ასე გაამზადა კომპანიამ ხელშეკრულება, _ დაგვიზუსტა ჩანტლაძემ, რომლის თქმით, აქ კანონდარღვევა არ იკვეთება.

თუმცა, ასე არ ფიქრობენ ახალგაზრდა იურისტთა ასოციაციაში _ ორგანიზაციის ოზურგეთის ოფისი ხელმძღვანლის თამაზ ტრაპაიძის თქმით, "გამოდის, რომ ხელშეკრულება რეალურად არ შესრულდა, რადგან დადებული ხელშეკრულების საგანი სხვაა და შესრულდა სხვა პირობები":

_ ამდენად, სხვა სახის ხელშეკრულება უნდა გაფორმებულიყო თავიდანვე. დასადგენია, შესყიდვის დოკუმენტში როგორაა ასახული, თუ რა მომსახურებისთვისაა თანხა გადახდილი, _ გვითხრა ტრაპაიძემ.

კიდევ ერთი კითხვისნიშნიანი ხელშეკრულება 2014 წლის 1 ივლისს არის გაფორმებული _ ჩოხატაურის სამუზეუმო გაერთიანების დირექტორმა შოთა ჩანტლაძემ ინდმეწარმე ვახტანგ სიხარულიძეს, ერთ პირთან მოლაპარაკების წესით, 4 185-ლარიანი ხელშეკრულება გაუფორმა, რომლის თანახმადაც, ზაურ ბოლქვაძის სახლ-მუზეუმში სარეაბილიტაციო სამუშაოები უნდა ჩატარებულიყო.

აღნიშნული ხელშეკრულების დადების საფუძველი მაშინდელი გამგებლის მოვალეობის შემსრულებლის თამაზ ჯინჭარაძის ბრძანება გახლდათ: "გამოიყოს ჩოხატაურის მუნიციპალიტეტის 2014 წლის ბიუჯეტის სარეზერვო ფონდიდან ზაურ ბოლქვაძის სახლ-მუზეუმის სარეაბილიტაციო სამუშაოებისთვის 4 285 ლარი. დაევალოს მუნიციპალიტეტის გამგეობის საფინანსო სამსახურს, უზრუნველყოს ა(ა)იპ სამუზეუმო გაერთიანების სუბსიდირება სათანადო საბუთების საფუძველზე," _ ვკითხულობთ 2014 წლის 26 ივნისით დათარიღებულ ბრძანებაში.

როგორც ირკვევა, ბრძანებით გამოყოფილი თანხიდან 100 ლარი ზაურ ბოლქვაძის სახლ-მუზეუმის სარეაბილიტაციო სამუშაოების ხარჯთაღრიცხვის შედგენას მოხმარდა. მიუხედავად იმისა, რომ კანონით ჯერ ხარჯთაღრიცხვა უნდა გაკეთებულიყო და თანხა შემდეგ გამოყოფილიყო, ხარჯთაღრიცხვა გამგებლის ბრძანების გამოცემის მეორე დღეს არის შედგენილი.

უნდა აღინიშნოს, რომ, რეალურად, ზაურ ბოლქვაძის სახლ-მუზეუმი ჩოხატაურში არ არსებობს. უფრო მეტიც, სახლი, რომელიც მუნიციპალიტეტის ბიუჯეტიდან გარემონტდა, რეგისტრირებული საერთოდ არ არის და საკომლო წიგნის ჩანაწერის მიხედვით, ზაურ ბოლქვაძის დედას, კესარიას ეკუთვნის.

შოთა ჩანტლაძის თქმით, ე. წ. სახლმუზეუმის რემონტი ნაჩქარევად, ფორსმაჟორში გაკეთდა, რადგან ჩოხატაურში ზაურ ბოლქვაძის ქალიშვილს, ელისო ბოლქვაძეს ელოდნენ, რომელსაც კონცერტი უნდა ჩაეტარებინა:

_ ქალბატონ ელისოს ველოდებოდით, კონცერტი უნდა ჩაეტარებინა. მართალია, კონცერტი არ ჩატარდა, თუმცა, ამასაც ჰქონდა თავისი მიზეზები. ფორსმაჟორი იყო და სასწრაფოდ მოხდა სახლის შერემონტება.

_ ბატონო შოთა, ფორსმაჟორი გაძლევთ იმის უფლებას, რომ კანონი დაარღვიოთ და ბიუჯეტის ფულით კერძო საკუთრება გაარემონტოთ?

_ არაფერი ისეთი არ მომხდარა.

_ ხელშეკრულება გაქვთ გაფორმებული, სადაც წერია, რომ გარემონტდა ზაურ ბოლქვაძის სახლ-მუზეუმი. რეალურად, მუზეუმი არ არსებობს. იცით, ვის ბალანსზეა სახლი?

_ წარმოდგენა არ მაქვს…

_ სახლს მუზეუმის სტატუსი არ აქვს მინიჭებული, ხელშეკრულებაში საწინააღმდეგო რატომ გიწერიათ?

_ ეს შეთანხმებული იყო(?!). სამომავლოდ გეგმაში გაქვს, რომ მუზეუმი იყოს, _ ამბობს ჩანტლაძე, რომლის განმარტებით სამშენებლო სამუშაოებს, რომელიც ღობის შეკეთებით და ფასადის შებათქაშებით შემოიფარგლა, პირადად აკონტროლებდა:

_ მე დავდიოდი და ვნახულობდი სამუშაოებს პირადად, _ გვითხრა ჩანტლაძემ, თუმცა, სამუშაოს შესრულების დამადასტურებელი არანაირი დოკუმენტი არ აქვს:

_ სურათები არ გადამიღია. არც მუშაობის პროცესში და არც შემდეგ. ამ წუთს მუზეუმში ზაურ ბოლქვაძის შესახებ არანაირი მასალა არ გაგვაჩნია, _ აღნიშნა ჩანტლაძემ.

საია-ს ოზურგეთის ოფისში განმარტავენ, რომ თუკი სახლს მუზეუმის სტატუსი არ აქვს, მასზე ბიუჯეტის თანხის დახარჯვა კანონდარღვევაა:

_ პირველ რიგში, დასადგენია, აქვს თუ არა მინიჭებულ ხსენებულ სახლს სახლ-მუზეუმის სტატუსი ი. თუ არ არსებობს თვითმმართველობის მიერ გამოცემული შესაბამისი ადმინისტრაციული აქტი, სახლის რემონტზე ერთი თეთრის გაღებაც კი კანონდარღვევაა, _ ამბობს თამაზ ტრაპაიძე.

თამაზ ჯინჭარაძე ამბობს, რომ დოკუმენტაციაში უზუსტობა გაიპარა:

_ ქალბატონ ელისოს იქ კონცერტი უნდა ჩაეტარებინა. მასთან საუბარი მქონდა და მისგან პირობა მივიღე, რომ კულტურის სამინისტრო ზაურ ბოლქვაძის სახლს მუზეუმის სტატუს მიანიჭებდა. ჩვენ გვეგონა, რომ ეს უფრო ადრე მოხდებოდა და ამიტომ უზუსტობა მოხდა. რომ არ გაგვერემონტებინა, არ შეიძლებოდა _ იქ ძალიან ცუდი სიტუაცია იყო, საქონლები დადიოდნენ და ეს გავაკეთეთ იმისთვის, რომ ბატონი ზაურის, ქალბატონ ელისოს ოჯახი არ შეგვერცხვინა. ეს ჩოხატაურელების სირცხვილიც იქნებოდა. მუზეუმი აუცილებლად იქნება, უბრალოდ, დროში დააგვიანდა. მე არ მინდა ვინმეს გადავაბრალო, ვიტყვი იმას, რომ უზუსტობა გაიპარა დოკუმენტაციაში, _ აღნიშნა ჩოხატაურის მუნიციპალიტეტის გამგებლის მოვალეობის ყოფილმა შემსრულებელმა, გამგებლის დღევანდელმა მოადგილემ თამაზ ჯინჭარაძემ.