საქართველოს პრემიერ-მინისტრი გურიის გუბერნატორს ორთვენახევარია არჩევს, თუმცა, ამ თანამდებობაზე წარსადგენად, შესაბამისი კანდიდატურა ჯერჯერობით არ ჰყავს.
მთავრობის ადმინისტრაციაში გუბერნატორის დანიშვნის თარიღს ვერ აკონკრეტებენ.
ცნობისთვის, გურიის გუბერნატორი გიორგი ჩხაიძე დაკავებული თანამდებობიდან გასული წლის 6 დეკემბერს გადადგა. 22 დეკემბრიდან კი, გურიის გუბერნატორის მოვალეობას ქეთი მოისწრაფიშვილი ასრულებს, რომელიც ამავე რეგიონის გუბერნატორის ადმინისტრაციის ადგილობრივი თვითმმართველობის ორგანოებთან ურთიერთობის სამსახურის უფროსის მოვალეობის შემსრულებელი იყო.
ჩხაიძის გადადგომიდან დღემდე ამ თანამდებობაზე სხვადასხვა კანდიდატურები განიხილება, თუმცა ოფიციალურად ჯერჯერობით არცერთი დასახელებულა.
2014 წლის დეკემბრის ბოლოს გამართულ პრესკონფერენციაზე საქართველოს პრემიერ მინისტრმა ირაკლი ღარიბაშვილმა "გურია ნიუსის“ კითხვის საპასუხოდ – როდის დაინიშნება ახალი გუბერნატორი? _ განაცხადა, რომ იანვრის ბოლოს გურიას ახალი გუბერნატორი ეყოლება.
"გურია ძალიან მიყვარს. გურიის გუბერნატორს განსაკუთრებით ვარჩევ და იანვარში დავნიშნავ", _ აღნიშნა ღარიბაშვილმა.
თუმცა, ამ დრომდე, პრემიერის აპარატში გუბერნატორის დანიშვნის სავარაუდო თარიღთან დაკავშირებით კომენტარს ვერ აკეთებენ.
როგორც "გურია ნიუსს“ მთავრობის ადმინისტრაციის პრესსამსახურში განუცხადეს, შესაბამისი კანდიდატურა ჯერჯერობით არ შერჩეულა, ამიტომ ვინმეს დანიშვნასთან დაკავშირებით საუბარი არ არის.
"ჯერჯერობით არ შეურჩევია პრემიერს შესაბამისი კანდიდატურა. როგორც კი შეარჩევს, გამოცხადდება და დაინიშნება“, _ აცხადებენ პრესსამსახურში.
აღსანიშნავია ისიც, რომ გუშინ იმერეთის გუბერნატორმა ზაზა მეფარიშვილმა თანამდებობა დატოვა, დღეს კი, პრემიერმა მთავრობას ახალი კანდიდატურა – ვაკის რაიონის გამგებელი გივი ჭიჭინაძე წარუდგინა.
