ხელოვნურად შექმნილი აჟიოტაჟი თუ რეალობა? – რა ხდება ოზურგეთის საკრებულოში

ქალაქ  ოზურგეთის მუნიციპალიტეტის საკრებულოში "ქართულ ოცნებას“ უმრავლესობა არასოდეს ჰყოლია, ახლა ატეხილი აჟიოტაჟი კი. კონკრეტულ საკითხს უკავშირდება.

რანდენიმე დღის წინ,  საკრებულოს ოპოზიციონერმა დეპუტატებმა  საკრებულოს სხდომაზე ერთ-ერთ საკითხს მხარი არ დაუჭირეს. საკითხი ეხებოდა  ქალაქ ოზურგეთის მუნიციპალიტეტის ქონების პირდაპირი განკარგვის წესით სარგებლობის უფლებით გაცემას, 35 წლის ვადით, სავაჭრო ობიექტის ასაშენებლად. თუმცა, დეპუტატების უმრავლესობამ  მხარი არ დაუჭირა და აღნიშნული საკითხი ჩავარდა.

“ქალაქ ოზურგეთის მუნიციპალიტეტის საკუთრებაში არსებული ქონების 42 კვ.მ. ა.წულაძის ქუჩაზე სასყიდლიანი ფორმით სარგებლობის უფლებით, სასყიდლიანი იჯარის სახით 10 წლის ვადით გაცემის თაობაზე, აღნიშნულ ადგილზე ავტოსადგომის მოწყობის მიზნით და მეორე საკითხი, ქალაქ ოზურგეთის მუნიციპალტეტის საკუთრებაში არსებული ქონების გურიის ქუჩაზე მდებარე, 4724 კვ.მ. მიწის ფართიდან 160 კვ.მ. სასყიდლიანი ფორმით სარგებლობის უფლებით სასყიდლიანი აღნაგობის სახით 35 წლის ვადით გაცემის თაობაზე, აღნიშნულ ადგილზე სავაჭრო ობიექტის აშენების მიზნით“ _ აღნიშნულმა საკითხმა ოპოზიციონერი დეპუტატების პროტესტი გამოიწვია და საკრებულოს წევრებსა და ქალაქ ოზურგეთის მერს შორის შელაპარაკებაც მოჰყვა.

ცნობისთვის, ქალაქ  ოზურგეთის მუნიციპალიტეტის საკრებულოში სულ 15 დეპუტატია, აქედან  4 დამოუკიდებელი, 2 “პატრიოტთა ალიანსი“, 1 “საქართველოს გზა“, 1 “გაერთიანებული დემოკრატიული მოძრაობა“ 1 “ნაციონალური  მოძრაობა“, 1 “თავისუფალი დემოკრატები“, 1 ლეიბოლისტური პარტიის“ წევრი.  “ ქართულ ოცნებას“ სულ 3 დეპუტატი ჰყავს, ერთი კი, “ რესპუბლიკური პარტიიდან“.

თუ როგორ შეიძლება განვითარდეს მოვლენები სამომავლოდ, არის თუ არა აჟიოტაჟი ხელოვნურად შექმნილი, ამასთან დაკავშირებით, საკრებულოს დეპუტატები კომენატრებს “გურია ნიუსთან“ აკეთებენ.

ლევან მგელაძე, დამოუკიდებელი დეპუტატი: “უმრავლესობა "ქართული ოცნება“ ჩვენს საკრებულოში არასდროს არ ყოფილა, თავიდანვე იყვნენ უმცირესობაში. არჩეული დეპუტატების უმრავლესობას ოპოზიცია შეადგენდა, მაგრამ შემდეგ მოხდა ისეთი მანიპულაციები, რომ გადაიბირეს ზოგიერთი ოპოზიციის დეპუტატი, რომლებიც მხარს უჭერდნენ მათ, მაგრამ რამდენიმე დღის წინ,  პრინციპულ საკითხთან დაკავშირებით მაინც გამოჩნდნენ ისეთები, , რომლებმაც არ მისცენ ხმა ისეთ საკითხს, რომელიც ოზურგეთისთვის არ იქნებოდა კარგი“, _ ამბობს მგელაძე.

რაც შეეხება იმას, თუ როგორ შეიძლება განვითარდეს მოვლენები სამომავლოდ, ამაზე მგელაძე გვპასუხობს, რომ ისინი ცდილობენ, როგორმე უმრავლესობა მოიპოვონ და საკრებულოში გადამწყვეტი სიტყვა თქვან. 

"ჩვენ მაქსიმალურად ვეცდებით, დავარწმუნოთ საკრებულოს წევრები, რომ ისეთი გადაწყვეტილებები არ მიიღონ, რომელიც ოზურგეთს და ოზურგეთლებს არ წაადგება“, _ აღნიშნა მგელაძემ.

კითხვაზე – შეინარჩუნებენ, თუ არა ოპოზიციონერი დეპუტატები თავიანთ პოზიციებს?  მგელაძე გვპასუხობს, რომ იმედია, ეს ასე იქნება.

“იმედი ნამდვილად მაქვს, რომ ასეც მოხდება, ვნახოთ, მომავალი გვიჩვენებს, როგორ განვითარდება მოვლენები“,  _ ამბობს მგელაძე.

“გაერთიანებული დემოკრატიული პარტიის წევრი“ თამარ ნადირიძე, მიიჩნევს, რომ საკრებულოს მიერ საკითხის ჩაგდება დემოკრატიისკან გადადგმული ნაბიჯი იყო.

“ეს იყო პირველი ნაბიჯი, რომელიც გადაიდგა საკრებულოს წევრების მიერ რეალური თვითმმართველობისკენ, დიახ, თვითმმართველობისაკენ, რომლისაც ასე ეშინია ოზურგეთში გაბატონებული ადამიანების ჯგუფს. იმედი მაქვს, ეს პროცესები შეუქცევადია, რისგანაც ჩვენი მოსახლეობა მხოლოდ მოიგებს. ასევე ვიტყვი, რომ როცა საუბარია უმრავლესობაზე აქ არ შეიძლება ვიგულისხმოთ პარტია ქართული ოცნების უმრავლესობა, რადგანაც ოზურგეთს მართავს პოლიტიკური პასუხისმგებლობის არმქონე ადამიანების ჯგუფი, მოვლენების განვითარების შედეგად სწორედ ამ ჯგუფმა დაკარგა საკრებულოში მორჩილი უმრავლესობა, რაც რათქმა უნდა აშკარა პროგრესია“, _ ამბობს ნადირაძე.

ნათია შარაშენიძე, “ლეიბოლისტური პარტიის წევრი“: “ადგილობრივი თვითმმართველობის არჩევნების შემდეგ ოზურგეთის მოსახლეობამ არჩევანი იმდაგვარად გააკეთა, რომ ქალაქს ჰყოლოდა ისეთი საკრებულო სადაც უმრავლესობაში ოპოზიციური პარტიები იქნებოდნენ, მმართველი კოალიცია კი წარმოდგენილია უმცირესობით, თუმცა ხელისუფლება დაშინების ან გადაბირების მეთოდით ყოველთვის აგროვებდა იმ ხმებს, რომელიც მათ სჭირდებოდა კონკრეტული საკითხის დასამტკიცებლად, ასეთი სხდომა იყო პირველი სხდომა სადაც თავმჯდომარე და თავმჯდომარის მოადგილე იქნა არჩეული, მას შემდეგ თითქმის 6 თვის განმავლობაში საკრებულოს არც ერთი საკითხი არ ჩაუგდია და იქმნებოდა შთაბეჭდილება, რომ იმ პარტიის დეპუტატები რომლებიც წარმოდგენილნი არიან როგორც ოპოზიციურები და პრეტენზია აქვთ ოპოზიციონერობაზე სულაც არ იყვნენ ოპოზიციონერები, არამედ ყველაფერში ეთანხმებოდნენ ხელისუფლებას და მათთვის სასურველი გადაწყვეტილებები გამოჰქონდოთ, თუმცაღა 20 თებერვალს მოხდა ის ფაქტი რაც მოხდა, ადგილობრივმა ხელისუფლებამ განიცადა სრული კრახი და მათ მიერ გამოტანილი ბოლო საკითხი ჩააგდო. დღეს შეგვიძლია ვთქვათ, რომ ხელისუფლებისთვის ძალიან მძიმე ეტაპი დაიწყო, ხელისუფლებას მორჩილი უმრავლესობა დაეშალა. მიმდინარეობს კონსულტაციები და რა შედეგი იქნება ამ კონსულტაციების შედეგად ამას საზოგადოება აუცილებლად შეიტყობს. მე არ გამოვრიცხავ, რომ ის რეალობა დადგეს რაც ხალხმა დაავალა თითოეულ ჩვენთაგანს არჩევნებამდე და ხმა მოგვცა სწორედ იმის გამო, რომ მმართველი კოალიცია არ ყოფილიყო ადგილობრივი ხელისუფლების სათავეში, თუ ეს ასე არ იქნება და ყველაფერი ძველებურად დარჩება ეს ნიშნავს რომ მოხდა ისევ გარიგებები, დაშინებები….. და ა. შ. მე მინდა ვისარგებლო შემთხვევით და ოზურგეთლებს მოვეფერო, ვუთხრა მათ, რომ ერთი წუთითაც კი არ მიღალატია მათთვის და ბოლომდე ვიბრძოლებ იმისთვის რომ მათი ნება ასრულებულ იქნას“, _ აღნიშნავს შარაშენიძე.

ქალაქ ოზურგეთის მუნიციპალიტეტის საკრებულოს თავმჯდომარის მოადგილე, ნინო გოგუაძე მიიჩნევს, რომ აჟიოტაჟი ხელოვნურად შეიქმნა.

“აღტკინებული ოპოზიცია, სინამდვილეში რამდენ წევრს ითვლის? იმ დემაგოგიურ სულისკვეთებაზე, რაც, ოპოზიციის ,,თვალსაჩინო’’ წარმომადგენლებს 2 აგვისტოდან მოყოლებული, დღემდე აფრთიანებს, კომენტარის გაკეთებას არც ვაპირებდი, ვინაიდან თვალსაჩინო წარმომადგენლებში, ერთი, სიცრუის მღაღადებელი ლეიბორისტი და მასთან ერთად საკრებულოს სხდომიდან მორბენალი, ,,ბურჯანაძე-დემოკრატი, იგულისხმებიან. ამჯერად პროვოცირება, სხდომაზე ერთადერთი საკითხის არ გასვლამ გამოიწვია, რაც ნებისმიერი საღად მოაზროვნე ადამიანისთვის, იმის მაჩვენებელი უნდა იყოს, რომ საკრებულოს ყოველ წევრს საკუთარი შეხედულება გააჩნია და თვითონვე გადაწყვეტს როდის და რას დაუჭიროს მხარი. და რომ აქ უმრავლესობის დაშლა არ დაშლა, არაფერ შუაშია. 

ვინაიდან ქ.ოზურგეთის საკრებულოში, წმინდა პარტიული თვალსაზრისით, კოალიცია-"ქართული ოცნება“, 5 დეპუტატით იყო წარმოდგენილი,15 მდე თვლა მანამდეც ვიცოდით. .,,ქართულ ოცნებას,, არასოდეს შექმნია მხარდაჭერასთან, საკითხის უმრავლესობით მიღებასთან დაკავშირებით პრობლემა, ჩვენ ვთანამშრომლობთ, დეპუტატებთან, რომელთაც პატივს ვცემთ, მიუხედავად პარტიული კუთვნილებისა და მომავალშიც ასე გაგრძელდება. ასე,რომ ,,ხიდისთავს შევქმნათ პირობა,, და ,,თამარის დროშა გაშალეს,, ამ,კონკრეტულ შემთხვევაში,საკმაოდ უადგილოა ,ხოლო ოპოზიციონერი პოლიტიკოსებისათვის, საკმაოდ უხერხული“, _ წერს გოგუაძე სოციალურ ქსელში აღნიშნულ საკითხთან დაკავშირებით.