საკითხის განხილვას, რომელიც მუნიციპალიტეტის ქონების მერის მხრიდან პირდაპირი განკარგვის წესს შეეხება და 35 წლიან ვადას აწესებს, დღეს ქალაქ ოზურგეთის საკრებულოში დაპირისპირება მოჰყვა.
აღსანიშნავია, რომ ბეგლარ სიორიძეს სურს, აღნიშნული ქონება- მიწის ნაკვეთი, პირდაპირი წესით გასხვისდეს ბიზნესმენ გოჩა სალუქვაძეზე.
მიუხედავად მერის, ბეგლარ სიორიძის მცდელობისა, დეპუტატებისთვის განემარტა თუ რატომ უნდა დაეჭირათ აღნიშნულისთვის მხარი, სხდომა დაპირისპირების ფონზე დიდ ხანს გაგრძელდა.
მერის თქმით, ის ხალხის მიერ არჩეულია და შესაბამისად, არაფერს მათთვის და ქალაქისთვის საზიანოს არ გააკეთებს.
დამოუკიდებელმა დეპუტატმა ლევან მგელაძემ სხდომაზე მერს გაახსენა, რომ აღნიშნული საკითხი საკრებულოს სხდომაზე ერთხელ უკვე ჩავარდა და დაინტერესდა თუ რატომ გამოიტანეს ის ისევ განსახილველად.
"თავს რატომ გვახვევთ როცა ერთხელ უკვე გითხარით უარი? ამისთვის გამოშტერებულებიც გვიწოდეს. ჩვენ ვერ ვხედავთ იმის აუცილებლობას, რომ პირდაპირი წესით გასხვისდეს ეს ქონება, ეს არის საუკეთესო მიწის ნაკვეთი ქალაქის ტერიტორიაზე ბიზნესის თვალსაზრისით, სადაც ერთი კვ.მ. ღირს 300 დოლარი და აძლევთ პიროვნებას, რომელიც გაურკვეველ ვითარებაში რაღაცას აკეთებს.
გვახვევთ თავს, რომ გინდა თუ არა მომეცით რომ პირდაპირი წესით გავასხვისოო, რატომ პირდაპირი წესით და არა აუქციონით?"_ დაინტერესდა მგელაძემ, რაზეც მერმა უპასუხა, რომ აღნიშნული მიწის გასხვისებით და ამ ტერიტორიაზე აგრარული ბაზრის გაკეთებით, მოგება დიდი იქნება.
"300 დოლარი კვ.მ მიწის ნაკვეთი ოზურგეთში არ ღირს, ნუ მეკამათებით, მომისმინეთ, მე ვიღებ პასუხისმგებლობას, რომ აგრარული ბაზარი ისეთ მოგებას შემოიტანს, რომელიც არ მომხდარა ჯერ ისტორიაში. არ გვინდა? თქვენ ბატონო ლევან ან დაუჭირეთ მხარი ან არ დაუჭიროთ. ბატონო ლევან, თქვენ ხომ იყავით ქალაქის რწმუნებული, რატომ არ დააყენეთ ეს წინადადება მაშინ? თათბირზეც არ გეძახდნენ? რატომ პირდაპირი განკარგვის წესით? იმიტომ, რომ აუქციონის წესით ვინც იყიდის ამ მიწის ნაკვეთს, ჩვენ ვერ დაუწესებთ იმ კონტროლს, რომელიც შეგვეძლება ჩავდოთ ხელშეკრულებაში, რატომ და ნორმალური ადამიანი, ასეთ პირობებზე არ წამოვა და არანორმალური ვერც ვერაფერს ვერ ააშენებს იქ. მე მანიჭებს კანონი ამის უფლება და მიმაჩნია, რომ ბევრად უფრო კარგად, სწრაფად და ხარისხიანად გაკეთდება იქ ის, რაც აწუხებს ყველა ოზურგეთელს", _ აღნიშნა სიორიძემ.
საკრებულოს სხდომაზე, დეპუტატებმა ბიზნესმენ გოჩა სალუქვაძის მხრიდან წამოსულ რეპლიკებზეც გაამახვილეს ყურადღება. საქმე ისაა, რომ სალუქვაძემ იმ დეპუტატებს, რომლებმაც საკითხს მხარი არ დაუჭირა "გამოშტერებულები" უწოდა, ხოლო ბაზარს, რომლის ტერიტორიაზეც აგრარული ბაზარი უნდა გაშენდეს – "გაბანძებული".
დეპუტატ გოჩა ძიმისტრაშვილის თქმით, სწორედ ამ რეპლიკების გამო, აქ აქვს მერს მორალური უფლება, მას 35 წლიანი იჯარით გადასცეს მიწა სარგებლობაში, რაზეც სიორიძემ აღნიშნა, რომ სალუქვაძის სიტყვებზე ის პასუხისმგებლობას არ იღებს.
"ბაზარი გაბანძებულზე უარესია, თქვენ არ იცით თქვენთვის რა არის გაბანძებული, რაც შეეხება დეპუტატებს უწოდაო, მე მაგაზე პასუხს არ ვაგებ, გოჩა სალუქვაძე არ არის საჯარო პირი, თუ დაწყნარდებით გიპასუხებთ, გაბანძებული რომ გიკვირთ და მერე მიხვდით თქვენი თავი სად უნდა იგულისხმოთ, სირცხვილია, რომ შენ ხარ საკრებულოს წევრი, აი ეს არის სიმართლე", _ აღნიშნა მერმა.
მიუხედავად ურთიერთდაპირისპირებისა, საკითხს მხარი საკრებულოს უმრავლესობამ მაინც დაუჭირა. მათ შორის იყვნენ "ნაციონალური მოძრაობის" წევრი ირინა საჯაია და "საქართველოს გზის" წარმომადგენელი, ნინო ტაბატაძე, რასაც მოგვიანებით ენმ-ს ოზურგეთის რაიონული თავმჯდომარის განცხადება მოჰყვა, სადაც მან თანაპარტიელის პასუხისმგებლობის საკითხის დაყენებაზე ისაუბრა.
აღსანიშნავია, რომ საკრებულოს სხდომა პროტესტის ნიშნად დატოვეს ლევან მგელაძემ, თამარ ნადირიძემ და ნათია შარაშენიძემ.
როგორც მათ ჟურნალისტებს განუცხადეს, საკრებულოს წევრების მისამართით ხელისუფლების მხრიდან ზეწოლა მიმდინარეობდა.
