საქართველოს პრეზიდენტი გიორგი მარგველაშვილი, ქართველი მსახიობისა და რეჟისორის, ოთარ კობერიძის გარდაცვალების გამო მწუხარებას გამოთქვამს და უსამძიმრებს გარდაცვლილის ოჯახს.
"ღრმა მწუხარებას გამოვთქვამ ოთარ კობერიძის გარდაცვალების გამო. ბატონი ოთარის მიერ განსახირებული მრავალი როლი მაყურებელთა არაერთმა თაობამ შეიყვარა და გაითავისა. იგი გამორჩეულ ფიგურად დარჩება ქართული თეატრისა და კინოს ისტორიაში. ამ მძიმე წუთებში ვუსამძიმრებ და თანადგომას ვუცხადებ ბატონი ოთარის ოჯახსა და ახლობლებს", _ აღნიშნულია პრეზიდენტის სამძიმრის წერილში.
ცნობისთვის, მსახიობი, რეჟისორი და სცენარისტი ოთარ კობერიძე 90 წლის ასაკში დღეს გარდაიცვალა.
ოთარ კობერიძე 1924 წლის 17 დეკემბერს დაიბადა. შოთა რუსთაველის სახელობის თეატრალური ინსტიტუტის სამსახიობო ფაკულტეტის დასრულების შემდეგ, ჯერ სოხუმის დრამატული თეატრის, ხოლო შემდეგ მარჯანიშვილის აკადემიური თეატრის მსახიობად მუშაობდა.
საქართველოს სახალხო არტისტი 1956 წლიდან კინოსტუდია "ქართულ ფილმის" მსახიობი და რეჟისორია. შესრულებული აქვს 50-ზე მეტი როლი. როგორც რეჟისორს გადაღებული აქვს ათამდე ფილმი, სამი ფილმისთვის კი სცენარი თავად დაწერა.
"ბაში აჩუკი", "მამულქი", "ქალის ტვირთი", "სხვისი შვილები", "დღე უკანასკნელი, დღე პირველი", "გენერალი და ზიზილები", "ზღვის შვილები", "დათა თუთაშხია", ანთიმოზ ივერიელი", "ალადინის ჯადოსნური ლამპარი", "პატარა უფლისწული" – ეს იმ ფილმების არასრული ჩამონათვალია, რომელშიც მსახიობმა მონაწილეობა მიიღო.
სხვადასხვა წლებში ოთარ კობერიძეს მიღებული აქვს პრიზები და წოდებები, აფხაზეთის ავტონომიური რესპუბლიკის დამსახურებული არტისტის, საქართველოს დამსახურებული არტისტის, საქართველოს სახალხო არტისტის, აფხაზეთის სახალხო არტისტის წოდება. 2002 წელს გახდა მემედ აბაშიძის სახელობის პრემიის ლაურეატი.
მსახიობს 12 მარტს დაკრძალავენ, მას დიდუბის ეკლესიიდან გამოასვენებენ.
