ბიზნესმენი თამაზ ელიზბარაშვილი, "ჯორჯიან უოთერ ენდ ფაუერს" მიმართავს და აღნიშნავს, რომ მის საკუთრებაში არსებულ ცხოველების თავშესაფარში, კომპანიის წარმომადგენლები 1 წლის განმავლობაში უკვე მეოთხედ მიდიან გეგმიურ შემოწმებაზე.
ელიზბარაშვილი არ გამორიცხავს, რომ მიუხედავად დადგენილი ტარიფისგან განსხვავებით, მისთვის დაწესებული გაცილებით დიდი გადასახადისა, კომპანია "ჯორჯიან უოთერ ენდ ფაუერსი" მას სასმელი წყალის უკანონო მოხმარებაში ადანაშაულებს.
"მე, გახლავართ, ბიზნესმენი თამაზ ელიზბარაშვილი. ამავდროულად, თქვენი კომპანიის "ჯორჯიან უოთერ ენდ ფაუერ"–ის აბონენტი.
თბილისში, გივი სვანიძის 30 ნომერში, ჩემს კერძო საკუთრებაში(ტერიტორიაზე), 12 წელი ჩემი სურვილით და ჩემი ფინანსებით ვეხმარები და ვჩუქნი სიცოცხლეს ძაღლებს, დათვებს და სხვა ცხოველებს. მთელი ამ ხნის მანძილზე, არანაირი დავალიანება, ან დარღვევა არ მქონია, არც თქვენს და არც წინამორბედ კომპანიასთან.
მიუხედავად იმისა, რომ მე კერძო პირს, თამაზ ელიზბარაშვილს, თქვენი კომპანია 0.2655 ლარი 1მ3-ზე ტარიფის ნაცვლად , 4.4 ლარს 1მ3 ტარიფით მახდევინებს გადასახადს.
მიმდინარე წლის 19 მარტს, თქვენი კომპანიის წარმომადგენლები, 12 კაციანი ჯგუფი, მოვიდა გეგმიური შემოწმების მიზნით. ბოლო ერთი წლის მანძილზე, ეს იყო მეოთხე გეგმიური შემოწმება. რას ისახავს მიზნად, ასეთი სიხშირით, ჩემი კერძო საკუთრების შემოწმება?!
თქვენი კომპანიის მხრიდან, მსგავსი ქმედებები, მაფიქრებინებს მხოლოდ ერთს, რომ თქვენ, მე, სასმელი წყალის უკანონო მოხმარებაში მადანაშაულებთ?!
რადგანაც, ეს არ ჰგავს გეგმიურ შემოწმებაზე მოსულ ჯგუფს. ეს, ურჩი გადამხდელის წინააღმდეგ მიმართულ ზომას ემსგავსება. რაც, ბუნებრივია, ჩემში იწვევს სამართლიან პროტესტს.
მე, როგორც თქვენი კომპანიის– "ჯორჯიან უოთერ ენდ ფაუერ"–ის აბონენტი, მოვითხოვ განმიმარტოთ, რასთან გვაქვს საქმე?!", _ წერს ელიზბარაშვილი.
"გურია ნიუსის" ამ წუთებში, საქართველოს ენერგეტიკისა და წყალმომარაგების მარეგულირებელ ეროვნულ კომისიაში, ასევე, "ჯორჯიან უოთერ ენდ ფაუერსში" ცდილობს დაადგინოს რასთან გვაქვს საქმე. მათ განმარტებებს აღნიშნულთან დაკავშირებით, მოგვიანებით შემოგთავაზებთ.
