"ჩვენ არაერთხელ გვაქვს გაცხადებული, რომ ჩვენი ქვეყნისთვის ძალიან დიდი მნიშვნელობა აქვს რეგიონების განვითარებას და გაძლიერებას. ძლიერი რეგიონი – ძლიერი საქართველო – ასე ჰქვია კიდევ ერთ ახალ პროექტს, რომელიც რეგიონების სტრატეგიული და ეკონომიკური განვითარებისკენ არის მიმართული" _ განაცხადა პრემიერმა ღარიბაშვილმა ამ წუთებში მიმდინარე პრესკონფერენციაზე.
პრემიერ-მინისტრის თქმით ამ პროექტის ფარგლებში ამუშავდება შეჩერებული და მიტოვებული საწარმოები.
_ ჩვენ მაქსიმალურად შევუწყობთ ხელს ბიზნესს, რომ ამ საწარმოებში ჩადონ ფული და დაასაქმონ ადგილობრივი მოსახლეობა.
ამ ახალ პროექტს მოჰყვება ადგილებზე, რეგიონებში ეკონომიკური აღმავლობა, ქალაქების გამოცოცხლება, საწარმოების ამუშავება და ჩვენი მოქალაქეების მატერიალური მდგომარეობის გაუმჯობესება. მთავრობამ სრულად შეისწავლა ყველა რეგიონის შესაძლებლობები – ბუნებრივი რესურსები, ეკონომიკური პოტენციალი, ადამიანური რესურსები.
და დღეს უკვე გვაქვს დეტალური სურათი, თუ რა არის საჭირო თითოეული რეგიონის ფეხზე დასაყენებლად.
უკვე გვქონდა ამ პროექტის პრეზენტაცია სამცხე- ჯავახეთში, ხვალ ასეთივე პრეზენტაციას ვაწყობთ სამეგრელოში.
კიდევ ერთი პროექტი იწყება უკვე რამდენიმე დღეში რეგიონებში. მიკრო და მცირე მეწარმეობის ხელშეწყობის კომპონენტის ფარგლებში 2015 წლის ბოლომდე საქართველოს მაშტაბით 1500-ზე მეტ მეწარმეს გაეწევა დახმარება ბიზნესის წამოწყების კუთხით, 2100 ადამიანი გაივლის სპეციალურ ტრენინგს და 2400-ზე მეტი ადამიანის პირდაპირი დასაქმება მოხდება.
რეგიონებისთვის ასევე ძალიან მნიშვნელოვანია პროექტი – ,,მაღალსიჩქარიანი ინტერნეტი ყველას“, რომლის მიზანია საქართველოს ყველა ქალაქამდე და სოფლამდე ოპტიკურ-ბოჭკოვანი საკაბელო ხაზების მიყვანა.
დაახლოებით 2017 წლის ბოლოს მთელი საქართველო უზრუნველყოფილი იქნება მაღალსიჩქარიანი ინტერნეტით, რასაც დიდი მნიშვნელობა აქვს როგორც ეკონომიკური, ისე სოციალური თვალსაზრისით, _ აღნიშნა ღარიბაშვილმა.
