სოფელში ვცხოვრობ, მყავს ქათმები. განსაკუთრებით ვუვლი, კვება არ აკლია. კარგა ხანია, კვერცხს არ დებენ. დამწყვდეული მყავს საკმაო ფართობზე შემოღობილ ტერიტორიაზე, რადგან ირგვლივ ტყეებში ძალიან მომრავლებულია ტურა. ზოგჯერ მგონია, რომ კვერცხის დება შეწყვიტეს იმის გამო, რომ დიდ ეზოში არ მყავს გაშვებული. რა შეიძლება იყოს მიზეზი?
ნინა სალუქვაძე, ოზურგეთი, სოფელი ლიხაური
მიზეზი არ არის ის, რომ ქათამი შორ მანძილზე არ "სეირნობს". ცხოველისა თუ ფრინველის ორგანიზმში შესაძლებელია მხოლოდ ზოგიერთი ვიტამინის სინთეზი. ამიტომ საჭიროა ვიტამინები საკვებთან ერთად მივაწოდოთ. საერთოდ, როცა რაიმე არ მოგწონთ, მიეცით ვიტამინები, ფრინველი იქნება ეს თუ ცხოველი.
ვიტამინებსა და მინერალებს უპირველესი ადგილი უჭირავს სასიცოცხლოდ აუცილებელი ფიზიოლოგიური ფუნქციების შესრულებაში. ქათმის შემთხვევაში ეს არაა პრობლემა. შეგიძლიათ, მიმართოთ ფერმერთა მომსახურების ცენტრებს, ვეტაფთიაქებს, სადაც მოგაწვდიან ვიტამინებს შესაბამისი რეკომენდაციით. ხშირად შინაური ფრინველი თუ ცხოველი ძალიან კარად გამოიყურება, თუმცა, ზოგჯერ რაღაც შეგვაეჭვებს. ამ შემთხვევაში ანალოგიურ ამბავთან გვაქვს საქმე. საერთოდ კი, აუცილებელია, აქტიურად დავნერგოთ ფრინველთა და ცხოველთა კვების კულტურაში ვიტამინების, მინერალების, ამინომჟავების ფართო სპექტრი.
ფერმერთა მომსახურების ცენტრი "ხელხვავი"
