პრემიერ-მინისტრის მიერ „გურია ნიუსისთვის“ მოწოდებული ინფორმაციის თანახმად, აპრილის ბოლომდე გურიას ახალი გუბერნატორი ეყოლება:
"დაახლოებით ორ კვირაში გურიას ახალი გუბერნატორი ეყოლება, აქამდე იმიტომ არ დავნიშნე, რომ ეს იყო ჩემთვის განსაკუთრებული საპასუხისმგებლო საქმე _ განსაკუთრებით ვარჩევდი კანდიდატს. თან, გვყავდა მოვალეობის შემსრულებელი. ორ კვირაში დავუსახელებ ჩემს საყვარელ გურულებს გუბერნატორს", _ გვითხრა ირაკლი ღარიბაშვილმა.
ჩვენი შეკითხვა, რამდენად სწორი იყო გავრცელებული ინფორმაცია, რომლის თანახმადაც გურიის გუბერნატორის პოსტზე ამ დრომდე ორი კანდიდატი _ ვოვა არობელიძე და გოჩა მეგრელიშვილი განიხილებოდა, უპასუხოდ დარჩა.
ღარიბაშვილმა მხოლოდ ის გვითხრა, რომ საზოგადოებას გურიის ახალ გუბერნატორს დაახლოებით ორ კვირაში წარუდგენს.
ჩვენი ინფორმაციით, მეგრელიშვილის და არობელიძის კანდიდატურებს ახალი კანდიდატურა _ ოზურგეთის მუნიციპალიტეტის გამგებელი მერაბ ჭანუყვაძე დაემატა.
ჭანუყვაძე იმ გამგებლებს შორისაა, რომელსაც პრემიერმა ნამუშევარი შეუქო, საუკეთესო გამგებელი უწოდა და მოწინავე გამგებლებში დაასახელა.
გვითხრეს ისიც, რომ ირაკლი ღარიბაშვილი გურიას აპრილის ბოლოს, მას შემდეგ ეწვევა, რაც გუბერნატორს დანიშნავს.
თავად ჭანუყვაძე აღნიშნულ ინფორმაციას უარყოფს და ამბობს, რომ ამის შესახებ ჩვენგან გაიგო:
_ მეხუმრებით, ალბათ! მსგავსი ინფორმაცია რომ მქონდეს, გულახდილად დაგიდასტურებდით, მაგრამ ისეთი რამ როგორ დაგიდასტუროთ, რაც პირველად თქვენგან მესმის?! _ გვითხრა ჭანუყვაძემ.
იმ შემთხვევაში თუკი ჭანუყვაძე მართლაც დაინიშნება გუბერნატორად, ოზურგეთის მუნიციპალიტეტში რიგგარეშე არჩევნების ჩატარება გახდება საჭირო.
_ მერის/გამგებლის უფლებამოსილების ვადამდე შეწყვეტის შემთხვევაში, რიგგარეშე არჩევნებს ნიშნავს საქართველოს პრეზიდენტი საქართველოს პრემიერ-მინისტრის კონტრასიგნაციით, მერის/გამგებლის უფლებამოსილების ვადამდე შეწყვეტიდან არაუადრეს მე-8 და არაუგვიანეს მე-10 დღისა. არჩევნები ტარდება არჩევნების დანიშვნიდან არაუგვიანეს 50-ე დღისა.
თუ მერის/გამგებლის უფლებამოსილების ვადამდე შეწყვეტისას ადგილობრივი თვითმმართველობის ორგანოთა საერთო არჩევნებამდე 1 წელზე ნაკლებია დარჩენილი, მერის/გამგებლის რიგგარეშე არჩევნები არ ტარდება.
რიგგარეშე არჩევნებში მერი/გამგებელი აირჩევა შესაბამისი მუნიციპალიტეტის საკრებულოს უფლებამოსილების დარჩენილი ვადით.
მერის/გამგებლის უფლებამოსილების ვადამდე შეწყვეტის შემთხვევაში, ახალარჩეული მერის/გამგებლის უფლებამოსილება იწყება შესაბამისი საარჩევნო კომისიის მიერ არჩევნების შედეგების შემაჯამებელი ოქმის შედგენიდან (მერის/გამგებლის არჩეულად გამოცხადებიდან) მე-11 დღეს, _ განმარტა ჩვენთან საუბრისას ახალგაზრდა იურისტთა ასოციაციის ოზურგეთის ოფისის ხელმძღვანელმა თამაზ ტრაპაიძემ.
