პარტია "თავისუფალი საქართველოს" გენერალური მდივანი ალექსანდრე შალამბერიძე ათონელის ქუჩაზე სამთავრობო რეზიდენციის მშენებლობისთვის დახარჯული 26 მილიონი ლარის დეტალური ხარჯთაღრიცხვის გამოქვეყნებას ითხოვს.
_ გუშინ მთავრობის სხდომაზე საქართველოს პრემიერ – მინისტრმა ”მოიკითხა” ათონელის ქუჩაზე დასრულებული სამთავრობო რეზიდენციის საკითხი და ამით ხელახალი მუხტი შესძინა მთავრობის დაპირისპირებას პრეზიდენტის მიმართ.
იმ დროს როდესაც ქვეყნის მოსახლეობის ძირითადი ნაწილი სიდუხჭირის ზღვარზე ცხოვრობს, როდესაც არის შექმნილი "სოლიდარობის ფონდი" და ადამიანები გროშებს აგროვებენ ავადმყოფი ბავშვების გადასარჩენად, მთავრობა ბედავს (უკვე "ოცნების”) და 26 მილიონ ლარს ხარჯავს შენობაში, რომლის ფუნქციური დანიშნულება გაურკვეველია და უკვე დიდი ხანია შეტანილი არის თვით ღარიბაშვილის მთავრობის მიერ საპრივატიზებო ობიექტების ნუსხაში.
ის, რომ ჩვენნაირი ღატაკი ქვეყნის პრეზიდენტს არ უნდა ჰქონდეს ისეთი უზარმაზარი რეზიდენცია, რომელიც არანორმალური სააკაშვილის ”შედევრია”, ორი აზრი არ არსებობს. მაგრამ "თავისუფალი საქართველო" ამ აღმაშფოთებელი ფაქტის უკან ხედავს კორუფციულ გარიგებას სახელმწიფო საბიუჯეტო სახსრების შესაძლო დატაცებასთან დაკავშირებით და მოითხოვს საჯაროდ გამოქვეყნდეს ინფორმაცია ტენდერის, ტენდერში გამარჯვებული ორგანიზაციის, შესრულებული სამუშაოს და გახარჯული თანხების შესახებ, _ განაცხადა შალამბერიძემ საგანგებო ბრიფინგზე.
შეგახსენებთ, რომ თბილისში, ათონელის ქუჩაზე მდებარე საპრეზიდენტო რეზიდენცია, რომლის სარემონტო სამუშაოებიც 26-მილიონ ლარზე მეტი დაჯდა, გუშინ ექსპლოატაციაში შევიდა, თუმცა, შენობის შემდგომი ბედი ჯერ კიდევ გაურკვეველია და მასზე მთავრობამ უნდა იმსჯელოს.
ამავე თემაზე: შეშის ღუმელი 26-მილიონად გარემონტებული პრეზიდენტის ახალი რეზიდენციის ეზოში
