"დღეს, თბილისში ნაციონალების ყრილობაა და საქართველოს დედაქალისკენ ქუდზე ნაციონალია დაბარებული", _ ეს სიტყვები კობა ბანძელაძეს ეკუთვნის, რომელიც „გურია ნიუსის“ წყაროს ინფორმაციით, ოზურგეთის მუნიციპალიტეტის კულტურის ცენტრისა და მოსწავლე ახალგაზრდობის სახლის გაერთიანების შედეგად მიღებულ ააიპ-ს ჩაუდგება სათავეში.
"გურია ნიუსის" არქივი, არაერთ მასალას ინახავს, რომელიც ბანძელაძის „ნაციონალურ მოძრაობაში“ აქტიურ მოღვაწეობას ასახავს.
2011 წლის 16 დეკემბერი – ყოფილი პრეზიდენტი მიხეილ სააკაშვილი ოზურგეთში "ავერსის" კლინიკას ხსნის. აქტიურობით გამოირჩევა ოზურგეთის მუნიციპალიტეტის კულტურის ცენტრის ხელმძღვანელი კობა ბანძელაძე.
2012 წლის 28 სექტემბერი – ოზურგეთში, "ნაციონალური მოძრაობის" აქციაზე გასამგზავრებლად ემზადებიან. "ნაცმოძრაობის" მხარდამჭერების, აქტივისტების და წევრების მიკროავტობუსებში გადანაწილებაში ოზურგეთის მუნიციპალიტეტის კულტურის ცენტრის დირექტორი კობა ბანძელაძე იყო ჩართული.
მსგავსი არქივი "გურია ნიუსის" ვებგვერდზე ძალიან ბევრია.
კობა ბანძელაძე ოზურგეთის მუნიციპალიტეტის კულტურის ცენტრს 2007 წლიდან ხელმძღვანელობს.
"გურია ნიუსის" წყაროს ინფორმაციით, შესაძლოა სწორედ ბანძელაძემ უხელმძღვანელოს ორი ა.ა.ი.პ.-ს რეორგანიზაციის შედეგად შექმნილ ახალ ცენტრს.
"გურია ნიუსი" ინფორმაციის დასაზუსტებლად დაუკავშირდა კულტურის ცენტრის დირექტორ კობა ბანძელაძეს, რომელმაც აღნიშნა, რომ მისი ხელმძღვანელის პოსტზე დანიშვნის შესახებ ინფორმაციას არ ფლობს.
"ჩემს დანიშვნასთან დაკავშირებით ინფორმაციას ვერ დავადასტურებ, რადგან ჯერ არაფერი არ ვიცით, ახალი ცენტრის ხელმძღვანელი ვინ იქნება" – განმარტა ბანძელაძემ. მისივე თქმით, ერთ ცენტრში გაერთიანებული ორი ა.ა.ი.პ. იქნება უკეთესს პირობებში, ვიდრე მანამდე იყო.
"მე მოსწავლე ახალგაზრდობის სახლის გაუქმებასთან დაკავშირებით ვერანაირ ინფორმაციას ვერ მოგაწოდებთ, უბრალოდ ვიცი რა ხდებოდა დღეს საკრებულოს სხდომაზე, ერთი ის შემიძლია გითხრათ, რომ კულტურის ცენტრიც და მოსწავლე ახალგაზრდობის სახლიც იქნება უკეთესს პირობებში. ვგულისხმობ შენობის გაუმჯობესებას, ინვენტარსა და აპარატს".
ბანძელაძემ ზეპირად საუბარი იმაზე, რომ ის მიუხედავად "ერთიანი ნაციონალური მოძრაობის" აქტიური მხარდაჭერისა, მაინც ინარჩუნებს პოზიციას და მეტიც, ახალი ააიპ-ის ხელმძღვანელადაც განიხილება, არ ისურვა და გვთხოვა წერილობით მიგვემართა.
რაც შეეხება მოსწავლე ახალგაზრდობის სახლის დირექტორ მაია ნიკოლაიშვილს, ის ამბობს, რომ მოსწავლე ახალგაზრდობის სახლის გაუქმება დღის წესრიგში არ დგას.
"იწყება რეორგანიზიცია, ხელი გვაქვს ამ რეორგანიზაციასთან დაკავშირებით მოწერილი რა თქმა უნდა გაუქმების წინააღმდეგი ვიქნები და გულისტკივილს გამოვთქვამ, მაგრამ ხომ გეუბნებით ჩვენ არ გვაქვს ინფორმაცია რომ გაუქმება უნდა მოხდეს, როცა დაგვიბარებენ, მაშინ მექნება კომპეტენტური პასუხი, ამ წუთს სხვას ვერაფერ ვერ გეტყვით. 1 მაისამდე გვაქვს ხელშეკრულება, დაველოდოთ მოვლენებს", – გვითხრა ნიკოლაიშვილმა.
რაც შეეხება იმას, ფლობს თუ არა ინფორმაციას იმასთან დაკავშირებთ, რომ ახალ ა.ა.ი.პ. კობა ბანძელაძე უხელმძღვანელებს, ამბობს, რომ აღნიშნულთან დაკავშირებით კომპეტენტური არ არის.
