სპორტისა და ახალგაზრდობის საქმეთა ყოფილმა მინისტრმა ლევან ყიფიანმა პარლამენტის სპორტისა და ახალგაზრდულ საქმეთა კომიტეტის ბრალდებებს ღარიბაშვილისთვის გაგზავნილ წერილში უპასუხა. ყიფიანმა ის შეკითხვებიც გაასჯაროა, რომელიც მას დეპუტატებმა კომიტეტის სხდომაზე დაუსვეს:
_ საკომიტეტო მოსმენის დეტალური ანალიზის, ასევე დახურული სხდომის დეტალებში მეტი სიცხადის შეტანის მიზნით სამინისტრომ ოფიციალურად მიმართა სპორტისა და ახალგაზრდობის საქმეთა კომიტეტს და მოითხოვა საკომიტეტო მოსმენის ოქმის, სტენოგრამული და აუდიო ჩანაწერის მოწოდება, თუმცა მათ მიერ აღნიშნული მასალა მოწოდებული არ იქნა, მიზეზად კი დოკუმენტაციის არ არსებობა დასახელდა, _ წერს ყიფიანი და წერილში დეპუტატების შეკითხვები, როგორც აღნიშნავს ციტირებით მოჰყავს.
ერთ-ერთი შეკითხვა ლანჩხუთის მაჟორიტარ დეპუტატს თემურ ჩხაიძესაც ეკუთვნის:
"ყველამ იცით, რომ საქართველოს პარლამენტში მოვხვდი პირდაპირ სტადიონიდან, რატომ არ ვარ ფეხბურთის კომისიაში?“ _ ჩხაიძის ამ კითხვის საპასუხოდ ყიფიანი წერს:
"საქართველოს ფეხბურთის განვითარების ხელშემწყობი სამთავრობო კომისიის“ საქმიანობა მიმართულია იმ პროგრამების შემუშავებისა და ღონისძიებების განხორციელებისკენ, რომელთა პრაქტიკაში რეალიზაცია შეუძლებელია სხვადასხვა სამთავრობო უწყების კოორდინირებული მუშაობის გარეშე.
ამავე დროს, უნდა აღვნიშნოთ, რომ კომისიის შექმნის აუცილებლობის საკითხი თავის დროზე დასმულ იქნა საქართველოს მთავრობის ადმინისტრაციაში საქართველოს ფეხბურთის ფედერაციის წარმომადგენლებთან სამუშაო შეხვედრის დროს და ამ მხრივ უნდა აღინიშნოს, რომ კომისიის შექმნის შესახებ განკარგულების პროექტი (შესაბამისი შემადგენლობის მითითებით) ინიცირებულ იქნა უშუალოდ მთავრობის ადმინისტრაციის მიერ. კომისია, მისი დებულებიდან გამომდინარე ნებისმიერ დროს მზად არის მოისმინოს ბ-ნი ჩხაიძის მიერ შემუშავებული პროექტი, თუმცა დიდი ალბათობით მას ასეთი არ გააჩნია"
თემურ ჩხაიძე "გურია ნიუსთან" საუბრისას ამბობს, რომ პროექტი აქვს:
_ პროექტი არათუ გამაჩნია, იმდენი მასალაა დაგროვებული ფეხბურთან დაკავშირებით მის წაკითხვას დიდი დრო სჭირდება. ამას ხელს აფარებენ და ვერ ვხდები რატომ.
_ ვინ აფარებს?
_ ეტყობა ერთმანეთს. ზუსტად ისაა გასარკვევი რამაც თავი მოიყარა და ფეხბურთი ასეთ დღეში ჩააგდო. ეს უნდა გაირკვეს. ვითომ არ იცოდა ეს ყიფიანმა თუ რაებს იგონებს?!
_ ბატონო თემურ პარლამენტში საიდან მოხვდით?
_ ვერ გავიგე, რას ნიშნავს საიდან მოვხდი?!
_ ლევან ყიფიანისთვის გითქვამთ, რომ პარლამენტში სტადიონიდან მოხვდით…
_ მე ეს არ მიგულისხმია. მთელი ცხოვრება ფეხბურთში ვიყავი. როცა წინა მთავრობამ ყველა სამსახურიდან გამომიშვა და მომიხვეტა ყველა გზა, შემომთავაზეს "ქართული ოცნებიდან" და მეც დავთანმხდი. რა ვთქვი ამნაირი … რას ჰქვია სტადიონიდან?! პარტიის წევრი გავხდი და ისე მოვხვდი პარლამენტში. მე მინისტრს ვუთხარი, რომ იმ კომისიის 13 წევრ შორის, რომელიც ფეხბურთის საკითხებს განიხილავს მეც უნდა ვყოფილიყავი. იქ ჩემი ყოფნა აუცილებელი იყო, რადგან ერთადერთი ფეხბურთელი პარლამენტარი ვარ.
_ თუმცა, ყიფიანმა თქვენი სიტყვების დამადასტურებელი დოკუმენტებიც გამოაქვეყნა… საინტერესოა როგორია სტადიონიდან პარლამენტში მოხვედრა…
_ ეს არც ასე მითქვამს და არც ამნაირი აზრი არ არსებობს. პირველ რიგში ჩემი "ოცნებასთან" დაახლოება მოხდა იმიტომ, რომ ხელწერები გავაკეთე. მაინც ვერ გავიგე რატომ მისვამთ ამნაირ კითხვებს.
_ "ამნაირი კითხვები" ყიფიანის წერილშია, რომელიც ირაკლი ღარიბაშვილს გაუგზვანა…
_ მე ვიგულისხმე ის, რასაც მთელი ცხოვრება ვაკეთებდი. მარტო ფეხბურში ვიყავი…
_ ყიფიანის გადადგომით კმაყოფილი ხართ?
_ ეს მისი გადასაწყვეტი იყო. მე არაფერ შუაში არ ვიყავი მაქ და თავადაც კარგად იცის.
_ კითხვაზე არ გვიპასუხებთ? ყიფიანის წასვლა გაგიხარდათ?
__ ეგ ყიფიანს კითხეთ. მე რა ვიცი!
_ მისი წასვლა არ გინდოდათ?
_ მე რა შუაში ვარ ყიფიანის გადაყენებასთან ან დანიშვნასთან.
_ პარალმენტის სპორტის კომიტეტი, რომლის წევრიც ბრძანდებით ხომ ითხოვდა?
_ რათქმაუნდა. იმათ აქვთ საფუძლიანი მოთხოვნა ალბათ და…
_ დეპუტატობით თუ ხართ კამყოფილი და როგორ ფიქრობთ, ლანჩხუთელები თუ არიან თქვენი დეპუტატობით კმაყოფილები?
_ ეს ლანჩხუთელებს უნდა კითხოთ…
_ თქვენ ხართ კმაყოფილი დეპუტატობით?
_ მაქსიმალურს ვაკეთებ იმას რაც შემიძლია. აბსულუტურად ყველაფერს. არ მახსოვს რომელიმე ზარი და შეხვედრა უყრადღებოდ დამეტოვებინოს, ვინმე მომეტყვილებინოს.
თემურ ჩხაიძე ფრაქცია "ქართული ოცნების" წევრია. ასევე სპორტისა და ახალგაზრდულ საქმეთა კომიტეტის და დიასპორისა და კავკასიის საკითხთა კომიტეტის წევრი.
გარდა ამისა კანადის პარლამენტთან მეგობრობის ჯგუფის, ფინეთის რესპუბლიკის პარლამენტთან მეგობრობის ჯგუფის და სურინამის რესპუბლიკის პარლამენტთან მეგობრობის ჯგუფის წევრი.
არის მართლმადიდებლობის საპარლამენტთაშორისო ასამბლეას საპარლამენტო დელეგაციის წევრი.
