რეჟისორი გია კაჭარავა კულტურის მინისტრს მიმართავს და სამინისტროსგან კანის ფესტივალზე გამგზავრებისთვის დახმარებას ითხოვს. თუმცა, სამინისტროში აცხადებენ, რომ ფესტივალის გახსნამდე მცირე დროის გამო, რეჟისორის დაფინანსება ვერ მოხერხდება.
როგორც რეჟისორი აცხადებს, კანის კინოფესტივალიდან პირადად მის სახელზე მოსულია მიწვევა, რათა მისი მოკლემეტრაჟიანი ფილმის "ჩაო ჯორდანოს" ჩვენება მოეწყოს.
მისივე ინფორმაციით, მიუხედავად იმისა, რომ კანის კინოფესტივალის ორგანიზატორებმა წერილით კულტურის სამინისტროსაც მიმართეს, უწყებისგან არანაირი რეაგირება არ ხდება.
რეჟისორის თქმით, რამდენიმე დღის წინ მან თავად მიმართა კულტურის სამინისტროს რათა ფესტივალზე გამგზავრების შესახებ პასუხი გაეგო, თუმცა კაჭარავას ინფორმაციით, კულტურის სამინისტრომ უარი განუცხადა, მიზეზად კი აღნიშნული განცხადების სამინისტროში შეტანის ვადები დაუსახელეს.
"როდესაც სამინისტროს მივმართე, თუ რა ხდებოდა ფესტივალზე გამგზავრებასთან დაკავშირებით, მათ მითხრეს, რომ აღნიშნული განცხადება 2 თვით ადრე უნდა შემეტანა სამინისტროში. ეს ფაქტობრივად უარია, რადგანაც 2 თვის წინ არც კი ვიცოდი მივდიოდი თუ არა", _ განაცხადა კაჭარავამ "გურია ნიუსთან" საუბრისას.
რეჟისორი ვარაუდობს, რომ, შესაძლოა, კანის კინოფესტივალის ორგანიზატორების წერილის შესახებ კულტურის მინისტრს ინფორმაცია საერთოდ არ აქვს.
"კულტურის სამინისტროს წარმომადგენლები უსინდისოდ იქცევიან, როცა ამბობენ, რომ მე ან კანის კინოფესტივალის ორგანიზატორებს მათთვის არ მიგვიმართავს. დამიკავშირდნენ კანის კინოფესტივალის ორგანიზატორები და მითხრეს რომ წერილს ვაგზავნით კულტურის სამინისტროში და არ იგზავნებაო. ამის შემდეგ, გასული კვირის ორშაბათს მე მივედი სამინისტროში ვაცნობე ამის შესახებ. დამაკავშირეს მინისტრის თანაშემწე სალომე ღუდუშაურთან, მას ეს წერილები გადავუგზავე.
ღუდუშაური დამპირდა, რომ წერილის მიღებისთანავე მინისტრს შეატყობინებდა ამის შესახებ, თუმცა, სამინისტროდან ამის შემდეგ ფაქტობრივი უარი მომივიდა, დროის სიმცირის გამო ვერ დაგაფინანსებთო", _ აცხადებს კაჭარავა და დასძენს, რომ მისი რეკომენდატორი კანში ფრანგი პროდუსერია, რომელიც ასევე ითხოვდა კაჭარავასთავის ქართულ მხარეს დახმარება გაეწია.
"წერილში, რომელიც სამინისტროსთვის გაგზავნილი მაქვს აღნიშნულია, რომ _ გთხოვთ დაეხმაროთ თქვენს წარმომადგენლებს გამომგზავრებაში, ჩვენ მათ გამოვუყოფთ აქ სივრცეს და ვგეგმავთ მომავალში თანამშრომლობას. სულ 2 ათას ევროზე იყო საუბარი, თუმცა სამინისტრო ამ თანხის გამოყოფას არ აპირებს. ჩემი სახსრებით კი, წასვლას ვერ მოვახერხებ. სამარცხვინო დეტალზე მიწევს საუბარი, მაგრამ უნდა ვთქვა, რაც უფო გრძელმეტრაჟიანია ფილმი, მით უფრო ძვირი ჯდება მისი წარდგენა და გაგზავნა ფესტივალზე. იმის მაგივრად, რომ დაინტერესებულები იყვნენ ჩვენი ქვეყნის იერსახის კიდევ ერთხელ წარმოჩენით, რაც მაგათი მოვალეობაა, მეუბნებიან ცუდ დროს შემოვიდა განაცხადიო", _ ამბობს კაჭარავა.
რეჟისორი გია კაჭარავა კინემატოგრაფიის ეროვნულ ცენტრსა და მას შორის დაპირისპირებაზეც საუბრობს და აცხადებს, რომ მან რამდენჯერმე მიმართა კინოცენტრს საკუთარი პროექტების დაფინანსებით, თუმცა მათგან უარი მიიღო.
"როდესაც კინოცენტრმა სცენარი დამიწუნა, ფილმი ჩემი სახსრებით გადავიღე. მსახიობებისთვის ერთი თეთრიც არ გადამიხდია. ამის შემდეგ კვლავ მივიტანე ნამუშევარი კინოცენტრში ფესტივალებზე გასაგზავნად, თუმცა ამ შემთხვევაშიც უარით გამომისტუმრეს. როდესაც კანის კინოფესტივალიდან მოწვევა მივიღე, დღეს კინოცენტრს არ აძლევს ხელს მათი დაწუნებული ნამუშევარი სხვებმა აღიარონ.
წელს კანის ფესტივალის კატალოგში ვარ. ეს ნიშნავს რომ მე მისი მონაწილე ვარ. თურმე 2 თვით ადრე უნდა მიმემართა კულტურის სამინისტროსთვის. მე ვარ მათთვის მიუღებელი. იმიტომ რომ ეგენი იმ სცენარებს და ფილმებს იწუნებენ, რაც კანის ფესტივალზე მოსწონთ. რა თქმა უნდა, მივწერ კანის ფესტივალის წარმომადგენელს და ვეტყვი რაც მოხდა. სამწუხაროა, რომ პირადად არ გამაჩნია საშუალება ჩავიდე და იქ ვთქვა, თუ როგორ მოიქცა კულტურის სამინისტრო", _ აცხადებს რეჟისორი და დასძენს, რომ ის იძულებულია შექმნილი ვითარებიდან გამომდინარე პოლიტიკური თავშესაფარი ეძებოს, ან შიმშილობა გამოაცხადოს.
რატომ ვერ მოხერხდა რეჟისორის დაფინანსება ფესტივალზე გასამგზავრებლად, ამ საკითხის გასარკვევად, "გურია ნიუსი" საქართველოს კულტურის სამინისტროს დაუკავშირდა, სადაც აცხადებენ, რომ რეჟისორ გია კაჭარავას სამინისტროსთვის გამგზავრების შესახებ პროექტი და ხარჯთაღრიცხვა არ წარუდგენია. წერილები კი, რომელიც კანის კინოფესტივალის ორგანიზატორებისგან მიიღო, სამინისტროს ღონისძიებამდე ძალიან მცირე დროით ადრე გადაეგზავნა.
თუმცა, წერილში, რომელიც გია კაჭარავამ "გურია ნიუსს" გამოუგზავნა, აღნიშნულია, რომ მინისტრის თანაშემწეს ფესტივალის შესახებ ინფორმაცია 30 აპრილს მიუვიდა.
"გია კაჭარავამ ღონისძიებამდე 5 დღით ადრე თხოვნით და არა ოფიციალური წერილით მოგვმართა. არც ბიუჯეტი იყო გათვლილი და არც პროექტი გაწერილი. კინოფესტაველის ორგანიზატორებსაც არ მოუმართავთ ჩვენთვის ოფიციალურად. როგორც ჩანს რეჟისორმა მიწვევა პირადად მიიღო. დროის სიმცირის გამო ვერ მოხერხდა დაფინანსება. განცხადების განსახილველად 2-თვიანი პერიოდი არ არის საჭირო. სწრაფად დაფინანსებადი პროექტებიც არის ხოლმე, თუმცა ამ შემთხვევაში სამინისტროს პროექტი და გაწერილი ხარჯთაღრიცხვა მაინც უნდა მიეღო", _ აცხადებენ სამინისტროში.
კითხვაზე – პროექტისა და ხარჯთაღრიცხვის წარდგენის შემთხვევაში დაფინანსდება თუ არა რეჟისორის გამგზავრება, სამინისტროში გვპასუხობენ, რომ 2 დღეში განცხადების განხილვა თითქმის წარმოუდგენელია.
ცნობისთვის, კანის კინოფესტივალი 12 მაისს იხსნება და რამდენიმე დღის განმავლობაში გაგრძელდება.
"გურია ნიუსი" გთავაზობთ იმ წერილებს, რომელიც რეჟისორმა კანის კინოფესტივალის ორგანიზატორებისგან მიიღო.
