გურიის ახალი გუბერნატორის, გია სალუქვაძის ირგვლივ სკანდალი გრძელდება.
"გურია ნიუსის" ვებგვერდზე გამოქვეყნებული მისი ბიოგრაფია განხილვის საგანი გახდა.
ბიოგრაფიაში, რომელიც სალუქვაძემ რამდენიმე დღის წინ მოგვაწოდა, განათლების გრაფაში ვკითხულობთ: 1976 _ იურიდიული ფაკულტეტი; 1979-1982 _ ინგლისი, ოქსფორდის უნივერსიტეტი; 1983-1985 _ თბილისის ივ.ჯავახიშვილის სახელობის სახელმწიფო უნივერსიტეტი.
_ ჯერ ოქსფორდი დაამთავრა და მერე ჯავახიშვილი? გურულები ასე ადვილად მოსატყუებელი ხალხი ვგონივართ? გვანახოს ოქსფორდის დიპლომი, _ ამბობენ გუბერნატორის ოპონენტები.
"გურია ნიუსი" დეტალების გასარკვევად სალუქვაძეს დაუკავშირდა და ოქსფორდის უნივერსიტეტის დიპლომის გამოგზავნა სთხოვა:
_ ოქსფორდი არ დამიმთავრებია _ იქ სტუდენტური გაცვლითი პროგრამით ვიმყოფებოდი, _ განმარტა სალუქვაძემ და უფრო მეტი კონკრეტიკისთვის CV-ის "თანამედროვე ვერსია" გამოგვიგზავნა.
"თანამდროვე სტილში" გაკეთებულ ბიოგრაფიაში ვკითხულობთ: 1985 წელს დაამთავრა თბილისის ივ. ჯავახიშვილის სახელობის სახელმწიფო უნივერსიტეტი _ სპეციალობა, სამართალმცოდნე.
1979-1982 წწ. _ ინგლისი ოქსფორდის უნივერსიტეტი, სტუდენტური გაცვლითი პროგრამა; 2001 წ. _ ბუდაპეშტი, აშშ იუსტიციის დეპარტამენტი FBI-ს აკადემია, სერტიფიკატი (კანონის ძალის დაცვა და ურთიერთთანამშრომლობა მთელ მსოფლიოში); 2002 წ. _ აშშ, ამერიკის იურისტთა ასოციაცია. აუდიტორთა და ინსპექტორთა საპროცედურო ტრეინინგი;
2007-2013 წწ. _ პოლიტიკური მოღვაწეობა; 2011-2013 წწ. _ საპატიმრო, სტატუსი _ პოლიტპატიმარი; 2014 წ. _ არასამთავრობო ორგანიზაცია "ყველა თაობა საქართველოსთვის" თავმჯდომარე.
ამჯერად განხილვის თემა 1979-1982 წლებში ოქსფორდში წასვლა-ყოფნა გახდა. სოციალურ ქსელში ჩვენ მიერ გამოქვეყნებულ მასალას ბევრი კომენტარი მოჰყვა. როგორც აღნიშნავენ, ამ წლებში ქვეყნის გარეთ მხოლოდ ერთ შემთხვევაში იყო შესაძლებელი წასვლა _ თუ კგბ-ს აგენტი იყავი.
"გურიის გუბერნატორმა, 1979-82 წლებში ოქსფორდში ვსწავლობდიო. გაგანია კომუნისტების დროს კგბ-ს ერთგული კადრის გარდა უცხოეთში ვინმეს უშვებდნენ?" "ეს კაცი, რომ იძახის მაგ წლებში, როგორ და ვისი ნებართვით დადიოდნენ ოქსფორდში და საერთოდ, საზღვარგარეთ… ამას ,რატომ არ კითხულობთ? თუ არ იცით, მე გეტყვით… იმ ორგანიზაციას ერქვა სუკი. ე.წ. კგბ. განვმარტავ _ სახელმწიფო უშიშროების კომიტეტი" _ ასეთი სახის კომენტარები სოციალურ ქსელში მრავლადაა.
ამ ბრალდებებთან დაკავშირებით გია სალუქვაძე ამბობს, რომ ოქსფორდში გაცვლითი პროგრამით მოხვდა:
_ ბატონო გია, თქვენი ბიოგრაფიის გამოქვეყნებას ბევრი გამოხმაურება მოჰყვა. წერენ, რომ იმ პერიოდში ვერ გახვიდოდით ქვეყნის გარეთ, თუ სუკი-ს აგენტი არ იყავით. ამაზე რას გვეტყვით, როგორ მოახერხეთ ქვეყნიდან გასვლა?
_ ეს იყო სტუდენტური გაცვლითი პროგრამა. არ ვიცი, ვინ რას წერს, მაგრამ ძალიან აფორიაქებულები არიან, მე კი საქმის საკეთებლად ჩავდივარ გურიაში.
_ რომელი პროგრამა იყო გახსოვთ?
_ სტუდენტური საბჭოთა კავშირიდან გავიდნენ სტუდენტები და იქიდან ჩამოვიდნენ იგივე რაოდენობის ბავშვები. ეს არ იყო დღევანდელი არსებული პროგრამა, ეს იყო სახელმწიფოს დროებითი დათბობის პერიოდი სხვა ქვეყანასთან, _ დააზუსტა სალუქვაძემ.
ამავე თემაზე: ახალ გუბერნატორს ოქსფორდის დიპლომს სთხოვენ _ რა წერია სალუქვაძის ბიოგრაფიაში
