ოზურგეთში, ერთ-ერთ სოფელში, დაახლოებით, 30 ოჯახს რამდენიმე დღის წინ, დამსხვრეული, ტალახიანი ფეხებით მოსვრილი, შეურაცხყოფილი, ამოთხრილი საფლავის ქვები და განადგურებული, საფლავები დახვდათ.
"გურია ნიუსის" წყაროს ინფორმაციით, აღნიშნულ ფაქტზე პოლიციამ ერთი პირი დააკავა, რომელიც, შსს-ს ინფორმაციით, ფსიქიკურად აშლილობის მქონეა. თუმცა, დანაშაულში ბრალდებული "გურია ნიუსთან" საუბრისას აღნიშნულს უარყოფს და ამბობს, რომ ის სასაფლაოზე არ ყოფილა.
"დაკავებულია ერთი პირი, რომელიც ფსიქიკურად დაავადებულია და პროკურატურის გადაწყვეტილებით გავათავისუფლეთ. ამ ეტაპზე პროკურატურის გადასაწყვეტია, რა სახის სასჯელს გამოიტანს ამ დანაშაულთან დაკავშირებით. სავარაუდოდ, მას ფსიქიატრიულ საავადმყოფოში სამკურნალოდ გადაიყვანენ ",_ აღნიშნეს შსს პრესსამსახურში.
პირი, რომელსაც ბრალად საფლავების შეურაცხყოფა ედება, ოზურგეთის მუნიციპალიტეტის ერთ-ერთ სოფელში მცხოვრები, 31 წლის გ.ტ.-ძეა.
"გურია ნიუსი" დანაშაულში ბრალდებულის სოფელში იმყოფებოდა. ახალგაზრდა მამაკაცის მეზობლები მის უდანაშაულობაზე საუბრობენ. დანაშაულს უარყოფს თავად ბრალდებულიც.
"ძალიან კარგია, რომ დაინტერესდით და ნახავთ, სადაც ცხოვრობს, არაა მაგის გამკეთებელი და თან მარტო, მაგას არ იზამდა, ვერ იზამდა. იქ ისეთი რამეებია გაკეთებული, გამორიცხულია მისი გამკეთებელი იყოს. ლოგინი არ აქვს, არც საჭმელი, არც სასმელი, ერთი ბეტონის ქოხი აქვს. ეს ბავშვი არის სამკურნალო, უპატრონობით კვდება, არავის არ აწუხებს, სიგარეტს თუ მოითხოვს ხანდახან. მატარებლის სადგურზე ზის და ვინმე თუ წაიყვანს იმუშავებს და საჭმლის ფულს შოულობს. სასაფლაოს როგორ გეკადრება? რაც სასაფლაოზე მოხდა, ამას ის და თან მარტო არ და ვერ გააკეთებდა", _ აცხადებენ მეზობლები.
გ.ტ-ს მეზობლები დახმარებას ადგილობრივი თვითმმართველობის ორგანოებსა და ეკლესიას სთხოვენ.
"ჩვენთან არანაირი ურთიერთობა არ აქვს მაგას, გარიყულია. პატრონობა უნდა, იქნება მიაქციოთ ყურადღება. ამ უბანში ცხოვრობს და არავისთვის არაფერი მოუპარავს. თავისთვის არის, არავის აწუხებს. ასანთი რომ დასჭირდება, ბოდიშის მოგიხდის და ისე გთხოვს. შეშას უჩეხავს ხალხს და და აჭმევენ საჭმელს.
რამდენჯერ მოვიდა სოციალური სამსახური და არ დამხვდა სახლში და ვერ დავუნიშნავთ დახმარებასო, – იძახიან. ეს სამართალია? იქნებ დაეხმარონ.
პატრულს მოჰყავს ხშირად, როცა ნასვამს ნახულობენ არ ტოვებენ გზაში, ისეთები აკეთებენ სიგლახეს ფულში რომ ცურავენ ეს გაჭირვებული საჭმელს თუ გთხოვს, იმისიც ერიდება.
რამდენჯერ მიტირია პური ვერ მივეცი, უსინათლო ქალი ვარ, გზაზე რომ გამოვალ, რამე ხომ არ გიჭირს რუსიკო დეიდაო უთქვამს, აგერ ვართ მეზობლები დედა, ჯოხის ნატეხი არ გადმოუტანია არავისგან, დედა გარდაცვლილი ჰყავს, უდედობით მოკვდა, მამამისმა არ მიაქცია ყურადღება. ყველას გვეცოდება.
არ შეგვაწუხებს არავის, გზაზე აცდენილია უპატრონობით. ერთხელ ციხეში იჯდა. ცხოვრებაზე ხელჩაქნეული ბიჭია. გამიგონია, გზააცდენილი გზას დადგომია, წაიყვანონ ათასი მამაოა, ამოიყენონ გვერდით, ამუშაონ, საჭმელი აჭამონ, არ შეიძლება? ეკლესიებია, მთავრობამ მიხედოს ასეთ გაჭირვებულს, სასაფლაოზე თუ მივიდა და ქვა გატეხა, ჩვენ მაშინ მეზობლებს თავს არ გაგვიტეხავდა? "ბატონოს" გარეშე არ დაგელაპარაკება", _ გვითხრეს მეზობლებმა.
"გურია ნიუსი" დაზარალებულებსაც ესაუბრა, რომლებიც გამოძიების შედეგს ეჭვქვეშ აყენებენ.
ერთერთი დაზარალებულის შორენა ხელაძის თქმით, მისი ნათესავების სასაფლაოზე წარწერა იყო დატოვებული, პიროვნებამ კი, რომელიც შსს-მ ბრალდებულად ცნო, წერა-კითხვა არ იცის.
"ჩვენს სასაფალოზე იყო წარწერა დატოვებული. ამ ბიჭის მეზობლები კი ამბობენ, რომ მან წერა-კითხვა არ იცის. თუ წერა კითხვა არ იცის, მაშინ როგორ დატოვა ეს წარწერა? ვერაფერს ვერ გეტყვით, მე ეჭქვეშ ვაყენებ ამ ამბავს", _ გვითხრა ხელაძემ.
ამავე თემაზე:
ბარბაროსულად შეურაცხყოფილი საფლავები ოზურგეთში- ფოტორეპორტაჟი
