დღეს, ოზურგეთში პოლიტიკურად ცხელი დღე იყო _ ოზურგეთის მუნიციპალიტეტისა და ქალაქ ოზურგეთის საკრებულოს სხდომები დეპუტატებსა და ხელისუფლების პირველ პირებს შორის ინციდენტისა და ურთიერთდაპირისპირების ფონზე ჩატარდა.
ქალაქ ოზურგეთის მუნიციპალიტეტის საკრებულოს სხდომაზე, ხმაური და დაპირისპირება ქალაქში საგზაო ნიშნების დაყენებამ გამოიწვია, კონკრეტულად კი აბაშიძის ქუჩაზე მომუშავე ტაქსისტებისთვის დგომის აკრძალვას მოჰყვა.
აღნიშნულმა საკითხმა დეპუტატებსა და ქალაქ ოზურგეთის მერის ბეგლარ სიორიძეს შორის დაპირისპირება გამოიწვია.
"ბატონო ბეგლარ, შეიძლება თუ არა საკრებულოს სხდომა ისე ჩატარდეს, რომ თქვენ შეურაცხყოფა არ მომაყენოთ?!" _ მიმართა ქალაქ ოზურგეთს მერ ქალაქ ოზურგეთის მუნიციპალიტეტის საკრებულოს დეპუტატმა ნათია შარაშენიძემ საკრებულოს სხდომის დასრულების შემდეგ.
ბეგლარ სიორიძემ საკრებულოს დეპუტატი სხდომის მიმდინარეობისას და დასრულების შემდეგაც არაერთხელ დაადანაშაულა ტყუილების თქმაში:
"რა შეურაცხყოფა მოგაყენე? ეს პირიქით ხდება, ტყუილებს ამბობთ, თქვენ ხართ არაადეკვატური, ვერ იგებთ, რას წერთ, რას კითხულობთ!"
საკრებულოს დეპუტატმა მერს განუმარტა, რომ ის ახორციელებს თავის უფლება-მოვალეობებს:
"თქვენ ტყუილებს ეძახით იმას, რაც სიმართლეა. არაადეკვატური თქვენ ხართ, ბატონო ბეგი _ ხან თანამშრომლებს სცემთ, ხან რას ეძახით და ხან _ რას. ამის შემდეგ მე მეუბნებით, არაადეკვატური ხარო?"_ მიმართავდა შარაშენიძე ბეგლარ სიორიძეს, რომელიც ძალიან გააღიზიანა ამ კითხვამ:
"რომელ თანამშრომელს ვცემე? ჩამოიარეთ სამივე და გადაამოწმეთ, თუ ვცემე. აი, მაგ გონების ხართ თქვენ! ქართული ლაპარაკი არ გესმით! მაშინ თურქულად მოისმინეთ და გაიგებთ! არავინ არსად არ ამბობს, რომ ბეგიმ ვინმე სცემა. მატყუარა ხარ შენ! არ გამოგვა ეგ ტყუილები!" _ უთხრა სიორიძემ, რაზეც უმალ უპასუხა შარაშენიძემ: "თქვენ "ნაციონალებს" და " ოცნებას" ერთად ემსახურებით!"
სიტუაცია მას შემდეგ განიმუხტა, როცა ბეგლარ სიორიძე საკრებულოს დეპუტატმა ირინა საჯაიამ გაიხმო.
საკრებულოს სხდომის დასრულების შემდეგ ბრიფინგი გამართა ფრაქციამ "ოზურგეთის მომავლისათვის".
თამარ ნადირიძის განცხადებით, საკრებულოს სხდომაზე ქალაქ ოზურგეთის მერის მიერ დეპუტატების შეურაცხყოფის ფაქტების გამო, პასუხისმგებლობა პარტია "ქართულმა ოცნებამ" უნდა აიღოს, რადგან, მისივე თქმით, თუ პარტია აღნიშნულ ფაქტს და საკრებულოში არსებულ სიტუაციას არ მიხედავს, შეიძლება სერიოზული პრობლემები შეექმნას:
"მაინტერესებს, რომელი პარტიის წევრია ჩვენი ქალაქის მერი _ " ქართული ოცნების" თუ " ნაციონალური მოძრაობის"? ამ ორიდან რომელი პარტიის ინტერესებს ემსახურება ბეგლარ სიორიძე? ვის მოვთხოვო პასუხი? ამის თქმის საფუძველს მაძლევს ის, რომ მერიაში დანიშნული კადრების აბსოლუტური უმრავლესობა არის "ნაციონალური მოძრაობის" აქტიური მხარდამჭერი და აქტივისტი, რომლებიც წლების მანძილზე ემსახურებოდნენ "ნაციონალური მოძრაობის" პარტიულ ინტერესებს. დღეს ისინი ბატონ ბეგის ემსახურებიან. ამ ადამიანებმა მიშას გაბრწყინებაზე იმუშავეს, დღეს ბატონი მერის გაბრწყინებაზე მუშაობენ," _ განაცხადა თამარ ნადირიძემ ბრიფინგზე.
დეპუტატებმა ასევე ისაუბრეს, საკრებულოს სხდომაზე მერის მიერ საკრებულოს წევრების მიმართ პიროვნული დაპირისპირების შესახებ:
"მერის ქმედებები იყო აგრესიული, არაადეკვატური. ფაქტობრივად, ყველა სხდომაზე ხდება ეს _ის გვაყენებს პიროვნულ შეურაცხყოფას. დღეს ვიხილეთ ნიღაბჩამოხსნილი მერი. არ შეიძლება თანამდებობის პირმა იკადროს ის, რაც დღეს ბატონმა ბეგლარ სიორიძემ აკადრა დეპუტატებს.
უნდა დადგეს მერის იმპიჩმენტის საკითხი, დღევანდელი მისი საქციელი, რომელიც ყველანაირ მორალს არის გაცდენილი, ხულიგნობად უნდა შეფასდეს. განსხვავებული აზრის მქონე დეპუტატების დევნას უნდა მიეცეს სერიოზული შეფასება. იმაზე უნდა ვიფიქროთ, რომ საკრებულოს სხდომაზე მერმა შეურაცხყოფა არ მოგვაყენოს?! მას გათავისებული არ აქვს თმენის ვალდებულება, მას არ გააჩნია მოსმენის უნარი!" _ განაცხადეს დეპუტატებმა ბრიფინგზე.
ნათია შარაშენიძის თქმით, ბეგლარ სიორიძემ მის ოჯახსაც მიაყენა შეურაცხყოფა:
"მან ძალიან ცუდ კონტექსტში მოიხსენია ჩემი მეუღლე _ მან ჩამაყენა დისკრიმინაციულ მდგომარეობაში და მიმითითა, რომ ჩემი მეუღლე არის თურქეთის მოქალაქე. კი, მას აქვს ორმაგი მოქალაქეობა, თუმცა, ეთნიკურად ქართველია. დღეს ბეგი სიორიძემ შეურაცხყოფა მიაყენა ჩემს ოჯახსაც," _აღნიშნა შარაშენიძემ.
ფრაქცია "ოზურგეთის მომავლისათვის" თავმჯდომარემ ლევან მგელაძემ საკრებულოს წევრებთან და თავმჯდომარესთან შეთანხმების შესახებ ისაუბრა. მისი თქმით, მათ წინა საკრებულოს სხდომაზე მოილაპარაკეს, რომ მაქსიმალურად შეიკავებდნენ თავს ურთიერთშეურაცხყოფისაგან, თუმცა, მისი თქმით ეს შეთანხმება ცალმხრივი აღმოჩნდა.
ნათია შარაშენიძემ ბრიფინგის ბოლოს საკრებულოს თავმჯდომარის მისამართით გააკეთა რამდენიმე განცხადება:
"ვთხოვ საკრებულოს თავმჯდომარეს, რომ ერთხელ და სამუდამოდ გადაწყდეს ის საკითხი, რომ საკრებულოს სხდომაზე ბატონმა ბეგლარ სიორიძემ არ მოგვაყენოს ასეთი შეურაცხყოფა, არ იყოს აგრესიული მისი გამოსვლები და უზრუნველყოს დეპუტატების უფლებამოსილების გახორციელება. შეზღუდულები ვართ, ჩვენს უფლებამოვალეობებს ვერ ვახორციელებთ მშვიდად, მერის სისტემატური აგრესიული და შეურაცხმყოფელი ქმედებები გაცდენილია ყოველგვარ ზღვარს. ჩვენ ვიწყებთ ბატონი ბეგის იმპიჩმენტის საკითხის დაყენებას".
არის თუ არა არაეთიკური ქალაქ ოზურგეთის მუნიციპალიტეტის მერის ბეგლარ სიორიძის მიერ საკრებულოს სხდომაზე დეპუტატების მიმართ გახორციელებული ქმედებები, ერევა თუ არა ის საკრებულოს საქმიანობაში უხეშად _ ამ კითხვებზე საკრებულოს თავმჯდომარე გელა კობალაძე პასუხობს, რომ საკრებულოს დარბაზი არის ის ადგილი, სადაც მიდის ცხარე კამათი, რომლებიც უნდა დარჩეს დებატების ფორმაში და არ გადაიზარდოს შეურაცხყოფაში:
"მე გავაფრთხილე დეპუტატები, რომ ერთმანეთისთვის მოესმინათ და პატივი ეცათ, ჩვენ ვართ შეკრებილები იმისთვის, რომ გავაკეთოთ სასიკეთო საქმეები და არა იმისთვის, რომ საკრებულოს სხდომაზე იყოს შეურაცხყოფისა და ურთიერთდაპირისპირების ფაქტები.
რაც შეეხება მერის უხეშ ჩარევას საკრებულოს საქმიანობაში, გიპასუხებთ, რომ ხშირად არის ისეთი შემთხვევები, როცა მერს ცილს სწამებენ. შესაბამისად, ეს ხდება ემოციურად. ყველას მოვუწოდებ, დაიოკონ ნერვები! პოლემიკა არ უნდა გადაიზარდოს ურთიერთშეურაცხყოფაში _ ეს ყველას ეხება.
მე მიუღებლად მიმაჩნია ასეთი დაპირისპირება და პიროვნული შეურაცხყოფა. მე არავის არ მივაყენებ შეურაცხყოფას და შესაბამისად, ვერც ვერვინ მომექცევა სხვაგვარად.
მერის იმპიჩმენტთან დაკავშირებით ნამდვილად ვერ დავეთანხმები დეპუტატებს. დღეს მერი და მერიის სამსახურები ძალიან რთულ რეჟიმში მუშაობენ, საკრებულო მათ მხარს ვუჭერთ. ამიტომ, ნუ ვიქნებით ჩასაფრებულის პოზიციაში," _ განაცხადა საკრებულოს თავმჯდომარემ.
რაც შეეხება ქალაქ ოზურგეთს მერის ბეგლარ სიორიძის პოზიციას, მისი პოზიცია დღევანდელ ინციდენტთან დაკავშირებით ასეთია:
"ნათია შარაშენიძის ნებისმიერი ბრალდება, რომელიც მას ქალაქ ოზურგეთის მუნიციპალიტეტის მერიისა და მერის მიმართ აქვს, ყოველთვის ცალსახად უსაფუძვლოა. მე ფაქტის კონსტატაცია მოვახდინე, რადგან ის მატყუარაა. მადლობა მედიის წარმომადგენლებს, რომლებიც საკრებულოს სხდომებს ესწრებიან. დღეს მათ თავად დაინახეს, როგორ ვუხსნიდი ქალბატონ ნათიას, რამდენად წინააღმდეგობაში მოდის მისი ბრალდებები სიმართლესთან და როგორია რეალობა. რაც შეეხება ინიციატივას იმპიჩმენტის შესახებ, ეს ისეთივე არასერიოზულია, როგორც მათი სხვა განცხადებები. თუმცა, დაიწყონ პროცედურა _ ამის უფლებას მათ კანონი აძლევთ. რაც შეეხება ‘’ნაციონალური მოძრაობის’’ აქტივისტების საჯარო სამსახურში დასაქმებას, ჩვენ თანამშრომლები პოლიტიკური ნიშნით არ შეგვირჩევია. სამსახურში აყვანის მთავარი განმსაზღვრელი კრიტერიუმი კონკურსი გახლდათ. მაოცებს ჩვენი საკრებულოს ხსენებული წევრების სრულიად უთანასწორო დამოკიდებულება ადამიანების მიმართ. შეურაცხყოფა კი სწორედ ეს არის. გამომდინარე იქედან, რომ ჩვენ ნათია შარაშენიძეს შავით თეთრზე დაწერილი ფაქტებით ვუმტკიცებთ სიმართლეს, ამის აღიარება მას მაინც არ შეუძლია. სწორედ ამას მოჰყვა ჩემი რეპლიკა ქართულსა და თურქულთან დაკავშირებით. ვიცი, რომ მისი მეუღლე თურქული წარმომავლობისაა და იქნებ, მეუღლის მშობლიურ ენაზე მაინც წაიკითხოს ის, რაც მისთვის ქართულად გაუგებარია. ქალბატონი ნათია რომ ინგლისური ენის სპეციალისტი ყოფილიყო, მაშინ ინგლისურზე მივუთითებდი. შესაბამისად, ეს არ ყოფილა ჰომოფობიური მიზნით განპირობებული რეპლიკა. მე პატივს ვცემ და აბსოლუტურად თანასწორად განვიხილავ ყველა ერის წარმომადგენელს."
