მოახლოებული არჩევნები, განსახორციელებელი და გახორციელებული ინფრასტრუქტული პროექტები, ტენდერები, სამსახურებში დასაქმებულთა ინფორმაციები, – ეს ის თემებია რაზეც გურიის გუბერნიაში, სახელმწიფო უსაფრთხოების სააგენტოს გურიის სამსახურის უფროსი გოჩა ალფაიძე და ასევე სახელმწიფო უსაფრთხოების სააგენტოს აჭარის უფროსი გიორგი პაპუაშვილი ადგილობრივი ხელისუფლების წარმომადგენლებს ესაუბრნენ.
დახურული შეხვედრა 20 ივნისს გურიის გუბერნატორის გია სალუქვაძის ოთახში შედგა და მას მოადგილეები ქეთი მოისწრაფეშვილი და სოსო ერქომაიშვილი, სახელმწიფო უსაფრთხოების სააგენტოს გურიისა და აჭარის სამსახურების უფროსები, ასევე გურიის სამივე მუნიციპალიტეტის გამგებლები, ქალაქ ოზურგეთის მერი და საკრებულოს თავმჯდომარეები ესწრებდნენ.
" გურია ნიუსის" წყაროს ინფორმაციით, ძალოვანი სტრუქტურის მაღალჩინოსნებთან შეხვედრის წინასწარი დეტალების შესახებ ინფორმაციას, ხელისუფლების არცერთი წარმომადგენელი არ ფლობდა.
" ოზურგეთში არ ვიმყოფებოდი და მითხრეს აუცილებლად უნდა გამოცხადდე შეხვედრაზეო, არ ვიცი რაზე იქნება საუბარი" _ გვითხრა ხელისუფლების ერთერთმა წარმომადგენელმა.
“გურია ნიუსის“ წყაროს ინფორმაციით, დახურულ შეხვედრაზე სუს- უფროსებმა დეტალურად მოისმინეს მუნიციპალიტეტებში განსახორციელებელი პროექტებისა და შესრულებული სამუშაოების, ასევე, კომპანიების მიერ აღებული ვალდებულებების შეუსრულებლობისა და გადაწეული ვადების შესახებ ინფორმაცია მუნიციპალიტეტების პირველი პირებისგან.
სუს-ის ხელმძღვანელობამ ყურადღება გაამახვილა გამოცხადებულ ტენდერებზე და საჯარო სამსახურებში დანიშნულ და დასანიშნ პირთა შესახებ ინფორმაციების მოპოვებასთან დაკავშირებითაც.
"თუ კი ვინმეს დანიშვნას დააპირებთ, აუცილებლად გაიარეთ ჩვენთან კონსულტაციები, შესაძლოა ამა თუ იმ პირზე არ ფლობდეთ ისეთ დეტალურ ინფორმაციას რაც საჭიროა, ამაში დაგეხმარებით და გამოგვიყენეთ მაქსიმალურად." _ამბობს "გურია ნიუსთან" ხელისუფლების ერთ-ერთი წარმომადგენელი.
ჩვენი წყაროს ინფორმაციით, სუს-ის ხელმძღვანელმა პირებმა ტენდერებთან დაკავშირებით ხელისუფლების წარმომადგენლებს გარკვეული მითითებები და გაფრთხილებები მისცეს.
"გაფრთხილებთ, იმუშავეთ სუფთად. არ ითანამშრომლოთ შავ სიაში მყოფ კომპანიებთან, არ წახვიდეთ გარიგებებზე ტენდერებთან დაკავშირებით, ჩაგვაყენეთ საქმის კურსში და მაქსიმალურად გამოგვიყენეთ"- ასეთი დირექტივა გასცეს სუს-ის უფროსებმა.
დახურული შეხვედრის ერთ-ერთი თემა მოახლოებულ არჩევნებსაც შეეხებოდა.
