ოზურგეთის მუნიციპალიტეტის სოფელ გურიანთაში, 41 ჰექტარ საყანე ფართობებში რკინაბეტონის მილები ამოიღეს.
ოფიციალურ დოკუმენტში, რომელიც ოზურგეთის მუნიციპალიტეტის გამგებლის წარმომადგენელმა სოფელ გურიანთაში კოტე ჩიკაშუამ მოგვაწოდა, აღნიშნულია, რომ გამყიდველი აწოდებს მყიდველს, სოფელ გურიანთაში მიწის საფარის ქვეშ არსებულ მეორად რკინაბეტონის 800 მმ-იან მილს. ერთი ცალის ფასი შეადგენს 550 ლარს, ხელშეკრულების საერთო ღირებულება კი 165 000 ლარია, მილების რაოდენობა _ 300 ცალია.
საყანე ფართობებიდან ამოღებული რკინაბეტონის მილები სოფელ გურიანთაში ე. წ. კარიერების ტერიტორიაზეა დასაწყობებული.
"გურია ნიუსის" წყაროს ინფორმაციით, აღნიშნულ ფაქტთან დაკავშირებით ოზურგეთის პოლიციაში გამოძიება დაიწყო.
აღნიშნული სამუშაოები ოზურგეთში მცხოვრებმა კერძო პირმა თამაზ ვაშალომიძემ შეასრულა. ის სოფელ შრომის ყოფილი ჩაის ფაბრიკის დირექტორად მუშაობდა 1996-2005 წლებში. როგორც თავად ამბობს, 2005 წელს დააპატიმრეს და 2008 წლამდე პატიმრობაში იმყოფებოდა.
გურიანთის მოსახლეობა აცხადებს, რომ არ იციან, ვინ შეასრულა სამუშაო, სად მიაქვთ მილები, რომელიც ინფრასტრუქტურული სამუშაოებისთვის გამოდგება, ასევე აინტერესებთ, ვინ გასცა ნებართვა.
გურიანთაში მცხოვრები თამაზ ჭიტაძე ამბობს, რომ რკინაბეტონის ერთი მილი ტონას იწონის:
"ამოიღეს ასობით მილი. ეს იყო ძველი კანალიზაციის მილები, ამჟამად არ ფუნქციონირებდა. ვინ ამოიღო და სად წაიღეს, არ ვიცი. ყველას საყანე ფართობში ამოთხარეს, დაახლოებთ 40 ჰექტარზე, სიგრძით კილომეტრზე მეტი იქნება. მოპარვით ვერ მოიპარავდნენ, იმიტომ, რომ ეს ხდებოდა დღისით, დაახლოებით ერთი თვის განმავლობაში. ზოგმა მოსახლემ არ მისცა ნება, ვინც მისცა, სანაცვლოდ ყანები დაუთესეს. ანუ მოსახლეობამ გაყიდა მილები, ციხისფერდის ზოლი იყო მხოლოდ წინააღმდეგი, დანარჩენი _ არა. დღეს ყველას უჭირს, ყანები დათესა მოსახლეობამ. შემდეგ ტრაქტორისტებს გადაუხადეს თანხა."
ოზურგეთის მუნიციპალიტეტის გამგებლის წარმომადგენელი სოფელ გურიანთაში კოტე ჩიკაშუა "გურია ნიუსთან" ამბობს, რომ აღნიშნულ ფაქტთან დაკავშირებით ყველა საჭირო დოკუმენტაცია წესრიგშია:
"მაისში დაიწყეს მილების ამოღება. ჩემთან მოიტანეს ხელშეკრულება, სადაც გარკვევით წერია, ვინ არის ამ მილების მფლობელი. ნახევარი არ ამოუღიათ. მილები ჩვენს ტერიტორიაზეა, თუმცა, სხვისი საკუთრებაა. 41 ჰექტარზეა საუბარი. დოკუმენტაცია წესრიგშია, მუნიციპალიტეტის გამგეობის ზედამხედველობის სამსახური საქმის კურსშია. პირი, რომელმაც ეს სამუშაოები შეასრულა, შეხვდა ყანების მეპატრონეებს, მორიგდნენ თანხაზე _ მათ აიღეს ფული და დათესეს ყანები," _ამბობს სოფლის რწმუნებული. მისი თქმით, საქმე პოლიციაშია, თუმცა, ვინ მიმართა საჩივრით პოლიციას, მისთვის უცნობია:
"ჩემთან მოვიდნენ მხოლოდ ისინი, რომლებსაც უნდოდათ ყანის დათესვა. პოლიცია იყო მოსული და ვაჩვენეთ დასაწყობებული მილები. სოფელსაც გვაჩუქეს რამდენიმე მილი. მათი უკან ჩალაგებაც არ შეიძლება გაგვაფრთხილეს _ ხელი არ ახლოთო. იმ დასაწყობებულ მილებს ვერსად ვერ წაიღებენ, სანამ გამოძიება არ დასრულდება," _ ამბობს ჩიკაშუა.
ოზურგეთის მუნიციპალიტეტის გამგეობის ზედამხედველობის განყოფილების უფროსი გელა ჭანუყვაძე "გურია ნიუსთან" ამბობს, რომ აღნიშნული მილები არ არის მუნიციპალიტეტის საკუთრება და ეკუთვნის კერძო პიროვნებას, რომელიც ამ სამუშაოებს აწარმოებს:
"მათ წარმოადგინეს საბუთები, რომ ეს არის კერძო საკუთრება," _ ამბობს ჭანუყვაძე.
"გურია ნიუსი" თამაზ ვაშალომიძეს დაუკავშირდა, რომელიც ამბობს, რომ მისთვის გაუგებარია, ვინ და რატომ მიმართა პოლიციას საჩივრით, რადგან მიაჩნია, რომ სოფელ გურიანთის მოსახლეობას სასიკეთო საქმე გაუკეთა:
"რამ გამოიწვია თქვენი ასეთი დაინტერესება? ვიცი, რომ პოლიციაში ჩემზე შეტანილია საჩივარი, თუმცა არ ვიცი, ვინ მიჩივის. ერთი რამ შემიძლია გითხრათ _ მოსახლეობა კმაყოფილი დავტოვე," _ ამბობს ვაშალომიძე;
მისივე თქმით, რკინაბეტონის მილები, რომელიც ამოიღო, არავის საკუთრება არ არის:
_ არავის ბალანსზე არ ირიცხება. ეს მილები კომუნისტების დროს ჩადეს მიწაში. უნდა გაკეთებულიყო გამწმენდი ნაგებობა, სადაც უნდა გაევლო მთელი ქალაქის კანალიზაციას. შემდეგ, დროთა განმავლობაში, ამ არეულობის წლებში, ეს მილები გაიძარცვა. თქვენ ხომ ბრძანდებოდით გურიანათში? მოსახლეობა ხომ გამოკითხეთ? არ გითხრეს, რომ 40 ჰექტარი ყანა დავუთესე?
_ ბატონო თამაზ, ვინ მოგცათ მილების ამოღების ნებართვა და რაში უნდა გამოიყენოთ ისინი?
_ არავისგან არ ამიღია ნებართვა _ ჩემი ნებით გავაკეთე. ჯერჯერობით, არკვევენ ვისი საკუთრებაა ეს მილები. დევს ერთ ადგილზე, დასაწყობებულია, თუ არავის საკუთრებას არ წარმოადგენს, მაშინ დამიბრუნდება ისევ მე, იმიტომ, რომ მოსახლეობას გადავუხადე 47 ჰექტარი ყანის დახვნა-დათესვის ფული. 1200 ლარამდე კიდევ მაქვს გასაცემი. მივედი, დაველაპარაკე მოსახლეობას, ვის ყანებშიც გადიოდა ეს მილები, შევუთანხმდი, წავედით გარიგებაზე, რომ დავუხნავდი და დავუთესავდი ყანებს. მოსახლეობა კმაყოფილი დარჩა. ამოვიღე მილები და სამ ადგილზე დავასაწყობე, პოლიციამაც გადაუღო სურათები. გავაფორმე ხელშეკრულება ჩინურ კომპანიასთან, რომელიც აწარმოებს მაგისტრალის მშენებლობას და მილებით დატვირთული მანქანები პოლიციამ გააჩერა სოფელ მერიაში. პოლიციამ მილები იმ პირობით გაატანა მათ, რომ სანამ არ დამთავრდება გამოძიება და ოფიციალური ნებართვა არ იქნება პოლიციიდან, მილები არ გამოიყენოთო. ამიტომ, თანხაც ვერ ჩამომირიცხეს ჯერ. პოლიციაში სამჯერ ვიყავი დაკითხვაზე, თუმცა, არ ვიცი, საჩივარი ვისგან არის შესული. მიმაჩნია, რომ უანგაროდ გავაკეთე კარგი საქმე. დარჩენილ მილებს ოფიციალურად გავყიდი _ ისინი, ძირითადად, რეალიზაციისთვის მჭირდება.
თუ ჩემს ქმედებაში გამოიკვეთება სისხლის სამართლის დანაშაულის ნიშნები, მზად ვარ ვაგო პასუხი კანონის შესაბამისად, კანონსაწინააღმდეგოს არაფერს ვაკეთებ,"_ გვითხრა ვაშალომიძემ.
