ოზურგეთის მუნიციპალიტეტის სოფელ ბახვში მცხოვრებმა გურამ გოგოლაშვილმა "გურია ნიუსს" "საქართველოს ფოსტასთან" დაკავშირებული ინცინდენტის შესახებ მოუთხრო.
"გაცნობებთ, რომ 2015 წლის აპრილში Ebay.com – დან გამოწერილი მქონდა ნივთი, რომელიც ჩემს მიერ მითითებულ მისამართზე გადმოგზავნილი იქნა 2015 წლის 20 აპრილს.
ნივთი არ მიმიღია და 45 კალენდარული დღის გასვლის შემდეგ, დადგენილი წესისამებრ, მივმართე რეზოლუციის ცენტრს ლუქსემბურგში, რის შემდეგაც პრობლემა მოაგვარეს და დამიბრუნეს გადახდილი თანხა.
2015 წლის 2 ივლისს ჩემს ნომერზე 10.23 სთ-ზე დაფიქსირდა შემომამავალი ზარი ნომრიდან 577 92 62 31, რომელზეც იმავე დღეს დავრეკე და შემატყობინეს, რომ ჩემს სახელზე შემოსული იყო მცირე პაკეტი და უნდა გამოვცხადებულიყავი მისაღებად.
მეორე დღეს, 2015 წლის 3 ივლისს გამოვცხადდი ამანათების მიღების განყოფილებაში და მივიღე აღნიშნული პაკეტი.
სახლში რომ მივიტანე, დავხედე გამოგზავნის და ოზურგეთის საფოსტო განყოფილებაში მიღების თარიღს და აღმოჩნდა, რომ პაკეტმა ოზურგეთის განყოფილებაში ისე დაჰყო 48 დღე – ღამე, რომ ჩემთვის არც ტელეფონით უცნობებიათ და არც რაიმე უწყება საფოსტო განყოფილებიდან არ მიმიღია.
დავურეკე ოპერატორს ამანათების განყოფილებაში და შევეკითხე რატომ არ არ შემატყობინეს, ამდენი ხნის განმავლობაში პაკეტის მიღების შესახებ. მან მიპასუხა რომ დამირეკა და მე ზარს არ ვუპასუხე. მაშინ მე ვუთხარი რომ გავარკვევდი ყველაფერს ჟურნალისტებთან დახმარებით. ამის შემდეგ მან
ტელეფონი გამითიშა“ _ ამბობს გოგოლაშვილი და ოზურგეთის საფოსტო ცენტრის მენეჯერის მოვალეობის შემსრულებელს შორენა გარაყანიძეს მიმართავს:
"ქალბატონო შორენა, როგორც ჩანს, თქვენდამი დაქვემდებარებულ სამსახურში შრომის დისციპლინა ვერ არის სათანადო დონზე. გთხოვთ გაარკვიოთ აღნიშნული საკითხი და პასუხი მაცნობოთ დადგენილ ვადაში" _ წერს ოზურგეთის მუნიციპალიტეტის სოფელ ბახვში მცხოვრები გურამ გოგოლაშვილი ოფიციალურ განცხადებაში.
ოზურგეთის საფოსტო ცენტრის მენეჯერის მოვალეობის შემსრულებელი შორენა გარაყანიძე "გურია ნიუსთან" ამბობს, რომ ის კომენტარს აღნიშნულ საკითხთან დაკავშირებით ვერ გააკეთებს.
"არ მაქვს უფლება გავაკეთო კომენტარი, დავურეკავ უფროსს და ამის შემდეგ შეგიძლიათ მას გაესაუბროთ" _ გვითხრა გარაყანიძემ.
როგორც ოზურგეთის საფოსტო ცენტრის მენეჯერის მოვალეობის შემსრულებელმა შორენა გარაყანიძემ გვითხრა, საქართველოს ფოსტის დეპარტამენტის უფროსმა მერი ბასილაშვილმა მას განუცხადა, რომ "გურია ნიუსი" , აღნიშნულ საკითხთან დაკავშირებით , დაუკავშირდეს მოგვიანებით და პიარ -მენეჯერი გააკეთებს კომენტარს, რომელსაც მოგვიანებით შემოგთავაზებთ.
