რამდენიმე დღის წინ, ლანჩხუთელ მაყურებელს ქუთაისის ახალგაზრდულმა თეატრმა ლაშა თაბუკაშვილის პიესის მიხედვით დადგმული სპექტაკლი "შენსკენ სავალი გზები" შესთავაზა, რომლის რეჟისურაც მაგდა ჩიხრაძეს ეკუთვნოდა. ლანჩხუთელი მაყურებელი ნამდვილად არაა განებივრებული მსგავსი კულტურული ღონისძიებებით და ალბათ, ეს ფაქტიც დადებით მომენტად აღიქმებოდა, რომ არა ერთი დეტალი _ საქმე ისაა, რომ სპექტაკლზე დასასწრები ბილეთის ფასი ხუთი ლარი იყო და როგორც სხვადასხვა სამსახურის თანამშრომლები ჩვენთან საუბარში ამბობენ, მათ ავალდებულებდნენ მის შეძენას. როგორც ამბობენ, დაახლოებით 3 000-მდე ბილეთი გაიყიდა, არადა, კულტურის ცენტრის დარბაზი, სადაც წარმოდგენა გაიმართა, ამჯამად, დაახლოებით, 300 ადამიანს იტევს.
"ეს პირველი შემთხვევა არაა, როცა გვაიძულებენ, საკუთარი ნების საწინააღმდეგოდ რაღაც ბილეთები შევიძინოთ. ზამთარში საფეხბურთო კლუბ "გურიას" თამაშების 30-ლარიანი აბონემენტები გვაყიდინეს, ახლა კი ეს თეატრის ხუთლარიანი ბილეთის შეძენა დაგვავალდებულეს, მგონი, მარჯანიშვილისა და რუსთაველის თეატრში არ ექნება ამხელა ფასი ბილეთს. კარგია თეატრი და სანახაობა, მაგრამ გვკითხონ, გვაქვს კი შესაძლებლობა, ხუთლარიანი ბილეთი ვიყიდოთ?!
ერთ-ერთ ა(ა)იპ-ში ვმუშაობთ და მაღალი ანაზღაურება სულაც არ გვაქვს, თვიდან თვემდე ხელფასის შემყურეები ვართ და თითოეული თეთრიც წინასწარ განაწილებული გვაქვს. ძალიან არ გვინდოდა ბილეთის ყიდვა, მაგრამ რა გვექნა?! წინააღმდეგობა რომ გაგვეწია, ამით ჩვენც პრობლემები შეგვექმნებოდა და შეიძლება სამსახურის უფროსსაც. ბილეთი კი გვაყიდინეს, მაგრამ სპექტაკლზე უმრავლესობა არც წასულა.
ამას გარდა, სამსახურებში კინოს ერთლარიანი ბილეთების შეძენასაც გვავალებენ, მალე "გურია" ახალ სეზონს დაიწყებს და იმედია, აბონემენტის შეძენა ახალი სეზონიდან ისევ მოგვიწევს," _ აცხადებენ ისინი.
როგორც გაირკვა, საქართველოს კულტურისა და ძეგლთა დაცვის სამინისტროსა და საქართველოს კინემატოგრაფიის ეროვნული ცენტრის ინიციატივით, 23 ივლისიდან 10 სექტემბრამდე, საქართველოს 19 რეგიონის მცხოვრებელს შესაძლებლობა ეძლევა წარმატებული თანამედროვე ფილმები იხილონ. სწორედ ამ რეგიონთა ჩამონათვალში მოხვდა ლანჩხუთიც. კინოს შენობის არარსებობის გამო ფილმების ჩვენება კულტურის ცენტრში იქნება შესაძლებელი, სადაც სპეციალური აპარატურა უკვე კარგა ხანია გააჩნიათ, ბილეთის ფასი კი ერთი ლარია.
თავის მხრივ ა(ა)ი პ-ების თანამშრომლებზე ნებისმიერი სახის ბილეთის გავრცელებას კატეგორიულად უარყოფს კულტურის დაწესებულებათა გაერთიანების უფროსის მოვალეობის შემსრულებელი გია იმნაიშვილი:
"პირადად ჩემს სამსახურში თანამშრომლებმა ნებაყოფლობით შეიძინეს თეატრის ბილეთები, სხვა სამსახურებში რა მოხდა, ვერაფერს გეტყვით. რაც შეეხება კინოსეანსს, მე შევთავაზე დაინტერესებულ პირებს ეს ბილეთები და არანაირ ძალდატანებას ადგილი არ ქონია", _ ამბობს იმნაიშვილი.
