მიუხედავად პაპანაქება სიცხისა, ლანჩხუთის მოსახლეობას სანიაღვრე არხების პრობლემა აწუხებს _ არხები გაუწმენდავია და ძლიერი წვიმის შემთხვევაში, როგორც ამბობენ, ქალაქის ნაწილს სერიოზული დატბორვა ემუქრება. ამ საკითხთან დაკავშირებით, მოსახლეობის თქმით, საქმის კურსშია ადგილობრივი ხელისუფლება, თუმცა, მათგან არანაირი რეაგირება არ ყოფილა.
"ნამდვილად არ გვახსოვს, ბოლოს როდის გაიწმინდა აქაურობა. როგორც შეგვეძლო, გავწმინდეთ, მაგრამ ბარითა და თოხით ამას არაფერი ეშველება. ჭაობადაა ქცეული, ხეებია ამოსული. გვეშინია, ბავშვები ქვეწარმავლებმა არ დაგვიკბინოს. ახლა სიცხეებია და ამ დღეში ვართ, რომ გაწვიმდება, წყალი სახლებში შემოგვდის.
შიშველი ხელებით ამ პრობლემას ვერ გავუმკლავდებით, სპეციალური ტექნიკაა საჭირო ამ არხის გასაწმენდად, კეთილი ინებონ და მოგვხედონ!" _ ამბობენ ზენაიშვილის ქუჩის მცხოვრებლები.
ძლიერი წვიმის შემთხვევაში ქალაქის შესაძლო დატბორვის შესახებ არაერთხელ გააკეთა განცხადება საკრებულოს წევრმა გია გოგუაძემ: "გარდა ზენაიშვილის ქუჩისა, გასაწმენდია ორაგვის ღელე, რომელიც შუაზე ჰყოფს ქალაქს და რკინიგზის ლიანდაგამდე გაივლის მარჯანიშვილის, მდინარაძის, გორგასლის, გურიელის, ებრალიძის, ვადაჭკორიას ქუჩებს. ეს არხი მთლიანად ამოვსებულია და თუ არ გაიწმინდა, ამ ქუჩებს დატბორვა ემუქრება. გორგასლის ქუჩაზე არხი ბოლოს 2008 წელს ამოიწმინდა. ამის შემდეგ მოსახლეობამ მიმართა გამგეობას არხის გაწმენდის მოთხოვნით, თუმცა, უშედეგოდ. არაერთხელ გავაჟღერე, რომ ერთი ძლიერი წვიმა და მოსახლეობა დაიტბორება, ისეთი სავალალო მდგომარეობაა. დღეს თუ ამ საქმისთვის, პირობითად, ერთი ლარია საჭირო, ხვალ 15 ლარი დასჭირდება. თავის დროზე, როგორც ჩანს, რკინიგზამ არ გაითვალისწინა ქალაქის განვითარების პერსპექტივა _ სამწუხაროდ, ლიანდაგს ქვეშ გამავალი ყველა მილხიდი სუსტია და უჭირს მოჭარბებული წყლის მასის გატარება. ამიტომაც, რკინიგზა ვალდებულია, სისტემატურად გაწმინდოს ქალაქის ტერიტორიაზე არსებული ეს ხიდები. ქალაქსა და ლაშისღელის ტერიტორიას შორის არსებული ხიდი ბოლომდე ამოვსებულია და რკინიგზამ დროულად უნდა გაწმინდოს. რთული მდგომარეობაა ზენაიშვილის ქუჩაზე, აქ არხში უკვე ხეებია ამოსული, მოსახლეობა ფიზიკურად ვერ შეძლებს თავად მოაგვაროს ეს პრობლემა.
მაშინ, როცა ბიუჯეტი მილიონნახევრიდან სამ მილიონამდე გაზარდეს, ამ დროს ინფრასტრუქტურის სამსახური ამბობს, რომ საჭირო თანხა არ გაგვაჩნია ამ სამუშაოების შესასრულებლადო", _ თქვა გოგუაძემ.
აღნიშნულ პრობლემაზე განსაკუთრებულ ყურადღებას ამახვილებს საკრებულოს კიდევ ერთი წევრი დარეჯან ბურჭულაძე:
"რამდენიმე სხდომაზე ზედიზედ მესმის არსებული პრობლემის შესახებ. გაგონილს ნანახი ჯობიაო და ადგილზე გადავწყვიტე მისვლა. ნანახმა ყოველგვარ მოლოდინს გადააჭარბა. მოსახლეობას ჟურნალისტი ვეგონე და თავად მოვიდნენ პრობლემაზე სასაუბროდ. ჩვენი მისამართით ძალიან მძიმე და სამართლიანი საყვედურების მოსმენა მომიხდა. გამგეობის შესაბამისმა სამსახურმა აუცილებლად უნდა მიაქციოს ამას ყურადღება. მოსახლეობას საკუთარი ეზოების წინ არხები მოწესრიგებული აქვთ, იქ არსებულ მდგომარეობას კი სათანადო ტექნიკის გარეშე ვერაფერს მოუხერხებენ", _ ამბობს ბურჭულაძე.
გამგეობის ინფრასტრუქტურისა და არქიტექტურის სამსახურის უფროსის, ლევან ჩხაიძის თქმით, არსებული პრობლემა მისთვის კარგად ნაცნობია: "ეს არხები ნამდვილად გასაწმენდია და მოსახლეობაც საკუთარი ძალებით ვერაფერს გახდება _ ამაზე ყველა ვთანხმდებით. ამ ეტაპზე ვმუშაობთ ამ საკითხთან დაკავშირებით და ვცდილობთ, შესაბამისი თანხები მოვიძიოთ. შეძლებისდაგვარად, მალე მივიღებთ გადაწყვეტილებას. რაც შეეხება რკინიგზის ვალდებულებას, ამასთან დაკავშირებით, რამდენჯერმე მივმართეთ მას წერილობით, თუმცა, ჯერჯერობით, პასუხი არ უცნობებიათ. კიდევ ვაპირებთ დამატებით ვაცნობოთ. სიტყვიერად კი გვეუბნებიან გავასუფთავებთო, მაგრამ დაპირება არაფერს შველის".
