ლანჩხუთის "კულტურის დაწესებულებათა გაერთიანებაში", რომელსაც არასამეწარმეო (არაკომერციული) იურიდიული პირის სტატუსი აქვს, სამომავლოდ 22 საშტატო ერთეულით ნაკლები თანამშრომელი ეყოლება, დარჩენილ თანამდებობებზე კი თანამშრომლების შერჩევა კონკურსის წესით მოხდება.
ოფიციალური ინფორმაციით, შტატების ოპტიმიზაციის გადაწყვეტილება უშუალოდ გაერთიანების ხელმძღვანელობამ მიიღო და ადგილობრივ "ზედა ეშელონებთან" შიგადაშიგ კონსულტაციას გადის.
კონკურსის ჩატარების ზუსტი თარიღი ჯერ გაურკვეველია, თუმცა, სექტემბრის ბოლომდე უნდა მოესწროს. საკონკურსო კომისია უკვე დაკომპლექტებულია _ გია იმნაიშვილის (გაერთიანების დირექტორის მოვალეობის შემსრულებელი), თამარ ფირცხალაიშვილის (გამგეობის სოციალურ საკითხთა, განათლების, კულტურის, სპორტისა და ახალგაზრდულ საქმეთა სამსახურის უფროსი), შოთა ჩაგუნავას (გამგეობის იურიდიული სამსახურის უფროსი), გია ნაჭყებიას (გამგეობის აუდიტის სამსახურის უფროსი) და საკრებულოს წევრ ელისო ჭიჭინაძის შემადგენლობით.
კონკურსის ჩასატარებლად აუცილებელია გარკვეული წინაპირობები. თუნდაც, ორგანიზაცია, რომელსაც სურს შეარჩიოს თანამშრომლები ვაკანტური თანამდებობის დასაკავებლად, შემუშავებული უნდა ჰქონდეს საკონკურსო პირობები, განსაზღვრული უნდა იყოს საკვალიფიკაციო მონაცემები, კომისიას უნდა ჰქონდეს დებულება და რაც მთავარია, უნდა არსებობდეს ვაკანტური თანამდებობები.
გაერთიანების ხელმძღვანელი და, ამავდროულად, კომისიის წევრი გია იმნაიშვილი, რომელმაც ამ საკითხთან დაკავშირებით, პრესკონფერენცია გამართა, ამბობს, რომ ამ ეტაპზე კომისია მუშა პროცესშია და საკონკურსო პირობებზე ხდება შეჯერება: "ჩვენთვის მთავარი და გადამწყვეტი მნიშვნელობა ექნება კონკურსანტის კვალიფიკაციას. პოლიტიკური შეხედულებებით არც პირველი რეორგანიზაციისას გაგვიშვია ვინმე და არც ახლა მოხდება მსგავსი რამ", _ თქვა იმნაიშვილმა.
ოპოზიციის ნაწილში ეჭვს არ ბადებს კომისიის წევრთა კომპეტენტურობა იმ დარგში, რომელსაც ისინი წარმოადგენენ, მაგრამ კულტურა სხვა სფეროა და იმნაიშვილის გარდა, ამ კუთხით გამოცდილება არც ერთ მათგანს არ აქვსო, _ ამბობენ ისინი.
სამომავლოდ დაგეგმილ ამ კონკურსს "კონკურსი-კონკურსისთვის" უწოდეს და შედარებისთვის მუნიციპალიტეტის გამგეობისა და საკრებულოს მაგალითები მოიყვანეს. ისინი ინტერესდებიან, რატომ გახდა ერთი რეორგანიზაციის შემდეგ რამდენიმე თვეში ხელახალი საკადრო ცვლილებების გატარება აუცილებელი და ვინ არის პასუხისმგებელი თანხების არამიზნობრივ ხარჯვაზე.
ნონა მურვანიძე, რომელიც ლანჩხუთის საკრებულოში ბურჯანაძის პარტიას წარმოადგენს, ჩვენთან საუბრისას ამბობს, რომ, თავის დროზე, როცა გამგებელი საკრებულოში რეორგანიზაციაზე თანხმობის მიცემის მოთხოვნით შევიდა, მან მხარი არ დაუჭირა ამ ინიციატივას: "ფაქტი იყო, რომ საკითხი, რომელიც მაშინ გამგეობამ შემოიტანა საკრებულოში, ეკონომიკური თვალსაზრისით, არ იყო შესწავლილი და არც რეალურ გათვლებს ეყრდნობოდა. გამგებლის მტკიცებით, ცვლილების გახორციელების შემთხვევაში, მივიღებდით უფრო მოქნილ, ერთ მართვის სისტემაში მოქცეულ სტრუქტურას, რაც, უპირველესად, გამოიწვევდა ბიუჯეტის დაზოგვას, თუმცა, ხელახალი სტრუქტურული ცვლილებების გახორციელებით, ადგილობრივმა ხელმძღვანელობამ ძალაუნებურად აღიარა, რომ ძველი რეორგანიზაცია არ იყო შედეგის მომცემი და მხოლოდ არასასურველი კადრების სახლში გაშვებას ემსახურებოდა.
პირადადმე, არ ვფლობ ინფორმაციას, თუ ვინ არიან კომისიის წევრები, მაგრამ ერთია, რომ მათი გადაწყვეტილება არ უნდა იყოს დამოკიდებული პოლიტიკურ სიმპათიებზე. მიმდინარე პროცესებთან დაკავშირებით, ჩემი ვარაუდები გამაჩნია, თუმცა, წინასწარი დასკვნების გაკეთებისგან თავს შევიკავებ, ვამჯობინებ, დაველოდო რა გადაწყვეტილებას მიიღებს კომისია.
ჩემი აზრით, კულტურის სფეროს, ბიუჯეტის თვალსაზრისით, ნამდვილად მეტი ეკუთვნის. ეს ის ხალხია, ვინაც პროდუქტს ქმნის და მათი ანაზღაურება არ უნდა იყოს სასაცილოდ მიზერული", _ თქვა მურვანიძემ.
რეორგანიზაციას ეჭვით უყურებენ საკრებულოს ფრაქცია "ლანჩხუთი _ ევროატლანტიკური მომავლისათვის" წევრები, რომლებმაც ამ საკითხს პირველივე ფრაქციის სხდომაზე ძირითადი დროც კი დაუთმეს: "როცა გატარდა რეორგანიზაცია და სხვადასხვა სუბიექტები მოექცნენ ერთი ქოლგის ქვეშ, მაშინ იყო განმარტება, რომ ეს ბევრ სხვა სიკეთესთან ერთად, იქნებოდა ეკონომიკურად მომგებიანი. მოხდა პირიქით _ 110 ათასი ლარით გაძვირდა "პროდუქტი". საბოლოოდ, მივიღეთ "აჯაფსანდალი" და ახლა გვაინტერესებს _ კარგად მივირთვით ეს "აჯაფსანდალი" თუ ცუდად, ხელახალი ცვლილებები რომ იგეგმება?!
როცა ეს სამსახური საკრებულოში ბიუჯეტის მატების მოთხოვნით შემოვიდა, მაშინ თუ იყო დაგეგმილი შტატების შემცირება?! რეალობიდან გამომდინარე, ფაქტია, პირველი რეორგანიზაცია იყო ნაჩქარევი, რომელმაც გამოიწვია ბიუჯეტის მკვეთრი ზრდა. ამის ფონზე, გაერთიანების ხელმძღვანელობამაც სავსებით მართებულად მოითხოვა ბიუჯეტის გაზრდა, საკრებულომ კი არ მისცა თანხმობა და შედეგად გადაწყდა ამ ცვლილებების გატარება. ფაქტია ისიც, რომ გაერთიანების ხელმძღვანელს სკამი და ადგილი არ ყოფნის თანამშრომელთათვის. თუკი გახორციელებული რეორგანიზაციის შემდგომ გაორებული შტატები მივიღეთ, არამიზნობრივად გაიხარჯა ბიუჯეტის თანხები, ვინ უნდა აგოს პასუხი ამაზე _ იმნაიშვილმა თუ აღმასრულებელმა ხელისუფლებამ?!" _ კითხულობენ "ლანჩხუთი _ ევროატლანტიკური მომავლისთვის" ფრაქციის წევრები.
გამგეობის სოციალურ საკითხთა, განათლების, კულტურის, სპორტისა და ახალგაზრდულ საქმეთა სამსახურის უფროსის თამარ ფირცხალაიშვილის თქმით, როცა გამგებელმა მიიღო თანხმობა რეორგანიზაციის გატარებაზე, მაშინ მოხდა რამდენიმე ა(ა)იპ-ის გაერთიანება კულტურის სფეროში: "ამ რეორგანიზაციას, ფაქტობრივად, შედეგად არ მოჰყოლია შტატების შემცირება. ამიტომაც კულტურის გაერთიანებამ მიიღო გადაწყვეტილება, შემდგარიყო მუშა ჯგუფი და კულტურაში ორგანიზაციული ცვლილებები მოეხდინა. სწორედ, ამ მუშაჯგუფის მუშაობის შედეგიდან გამომდინარე, ჩამოყალიბდება ახალი სტრუქტურა. გასათვალისწინებელია, რომ ამ ეტაპზე კულტურის გაერთიანებაში არ იგეგმება რეორგანიზაცია, ეს არის მხოლოდ და მხოლოდ შიდა ორგანიზაციული ცვლილებები", _ ამბობს ფირცხალაიშვილი.
ჩავლილ თუ მოსალოდნელ საკადრო ცვლილებებზე საკუთარ წილ პასუხისმგებლობას არ გაურბის გაერთიანების დირექტორის მოვალეობის შემსრულებელი გია იმნაიშვილი: "ყველაფერზე პასუხისმგებელი მე ვარ. კადრების შერჩევისას პირადად ვიღებდი გადაწყვეტილებას. შიგადაშიგ ანგარიშს ვაბარებდი გამგებელს, ზაზა ურუშაძეს. ყველასთან ახლო ურთიერთობა მაქვს, სხვათაშორის, სამსახურიდან ჩემი სიძეც გავუშვი. ყველაფერზე ჩემი ხელწერაა. ჩვენ არავის სახლში გაშვებას არ ვაპირებთ ხელაღებით. მართალია, 22 შტატი გაუქმდა, მაგრამ ყველას ვაძლევთ შესაძლებლობას, მონაწილეობა მიიღოს კონკურსში".
იმნაიშვილი ამბობს, რომ მართალია, ჯერ კიდევ ბევრი რამ არის გასაკეთებელი, მაგრამ არც გაკეთებულის არდანახვა ვარგა: "ის თანხა, რომლის დამატებაც მოვითხოვეთ, მხოლოდ სახელფასო ფონდის შესავსებად არ გვჭირდებოდა. ძალიან ბევრი რამაა გასაკეთებელი ინფრასტრუქტურის თვალსაზრისითაც, თუნდაც მხარეთმცოდნეობისა და ეგ. ნინოშვილის მუზეუმებში, თავად კულტურის ცენტრში, სოფლებში ბიბლიოთეკებია მოსაწესრიგებელია.
ძალიან ბევრი კარგი რამ გაკეთდა და ამასაც უნდა გავუსვათ ხაზი, მხოლოდ ცუდზე ნუ გავაკეთებთ აქცენტს. 2010 წელში, სამსახურში რომ მოვედი, "მკვდარი სულები" დამხვდა. დღეს კი ვერ ნახავთ თანამშრომელს, ხელფასს იღებდეს და სამსახურში არ დადიოდეს. ეს ხალხი, ვინც კომისიაშია შესული, ყველანაირად გვერდში მიდგას", _ თქვა იმნაიშვილმა.
გავრცელებული ინფორმაციით, მსგავსი სიახლე სხვა ა(ა)იპ-ებშიც იგეგმება.
