ქალაქ ლანჩხუთში, ინფრასტრუქტურული პროექტების ფარგლებში გათვალისწინებული სამუშაოების გახორციელება, რომელიც, მთლიანობაში, 800 ათას ლარს აღემატება, აგვისტოდან ანონსდებოდა, თუმცა, გაურკვევლობა ჯერ კიდევ გრძელდება _ პროექტზე გამოცხადებულ ტენდერში გამარჯვებულმა ფირმამ პირობა არ შეასრულა. ხელმეორედ გამოცხადებისას კი სხვა ფირმამ მოიგო. თუმცა, კონკრეტულად, რა სამუშაოები უნდა გახორციელებულიყო, ამაზე უმრავლესობაშიც კი აზრთა სხვადასხვაობა იყო.
გამგეობის ინფრასტრუქტურისა და არქიტექტურის სამსახურის უფროსის ლევან ჩხაიძის თქმით, პროექტი ქალაქის რეაბილიტაციასთან დაკავშირებით უკვე შედგენილია და განსახილველად ინფრასტრუქტურის სამინისტროშია გადაგზავნილი: "კონკრეტული თარიღი, თუ როდის დაიწყება სამუშაოები, ამ ეტაპზე არ ვიცით, მიმდინარე წელს არ გადავაცილებთ. თუ ისე მოხდა, რომ სამუშაოები წელს ვერ დასრულდა, არაა პრობლემა, შედეგ წელს გაგრძელდება", _ ამბობს ჩხაიძე.
გარდა ამ პროექტისა, ინფრასტრუქტურის პროგრამით ქალაქის რამდენიმე ქუჩაზე სანიაღვრე არხები და მილხიდები გაკეთდა, სადაც სამომავლოდ, როგორც ლევან ჩხაიძე განმარტავს, აუცილებლად დაიგება ასფალტი.
წმინდა ნინოს ქუჩა იმ ჩამონათვალშია, სადაც შპს "სამკუთხედი", რეაბილიტაციის ფარგლებში, სანიაღვრე არხებსა და მილხიდებს აკეთებს. თუმცა, რატომღაც აღნიშნულ პროექტში არ მოხვდა იმ ორი შესახვევის რეაბილიტაცია, რომელიც ამ ქუჩას ოფიციალურად მიეკუთვნება.
"გვაიმედებდნენ, რომ პროექტის შედგენისას აუცილებლად იქნებოდა გათვალისწინებული შესახვევებიც და წელს ქუჩის სრული რეაბილიტაცია მოხდებოდა, თუმცა, სამწუხაროდ, ასე არაა, მხოლოდ ძირითად ქუჩას აკეთებენ. არადა, წმინდა ნინოს მეორე შესახვევში, პერიფერიული ქუჩის პირობაზე, საკმაოდ ხშირად უწევთ მოძრაობა, როგოც მანქანებს, ისე ქვეითად მოსიარულეებს. გზის ამ მონაკვეთით სარგებლობს მესამე საჯარო სკოლის კონტიგენტის დიდი ნაწილი. აქ კი ერთი წამოწვიმებაც საკმარისია, რომ წყლითა და ტალახით დაიფაროს ყველაფერი", _ ამბობენ ამ შესახვევის მაცხოვრებლები.
ლევან ჩხაიძის თქმით, არასაკმარისი თანხების გამო, რაც, გარკვეულწილად, ლარის ინფლაციამაც განაპირობა, ვერ მოხერხდა წმინდა ქუჩის სრულად რეაბილიტაცია: "წმინდა ნინოსა და დუმბაძის ქუჩები ყველაზე დიდია ლანჩხუთის მასშტაბით და ხარჯთაღრიცხვის შედგენისას, თანხები არასაკმარისი აღმოჩნდა, ამიტომაც შესახვევებისა და ჩიხების რეაბილიტაცია სამომავლოდ გადაიდო. ყოველ შემთხვევაში, პირობას ვდებ, რომ სანამ შესახვევებშიც არ გაკეთდება სანიაღვრე არხები და მილხიდები, ამ ქუჩაზე ასფალტი არ დაიგება", _ გვითხრა ჩხაიძემ.
