„გურია ნიუსის“ ინფორმაციით, ტელეკომპანია „რუსთავი 2“-ის დამფუძნებლებს დავით დვალს, ჯარჯი აქიმიძესა და ტელეკომპანიის ყოფილ მფლობელს ქიბარ ხალვაშს შორის მოლაპარაკება შედგა.
როგორც გვითხრეს, სამეულის შეთანხმების თანახმად, იმ შემთხვევაში, თუკი სასამართლო ხალვაშს ტელეკომპანიას დაუბრუნებს, „რუსთავი 2“ მართვაში დვალს და აქიმიძეს გადაეცემათ.
აღნიშნულ ინფორმაციას ჩვენთან საუბრისას არ ადასტურებს ქიბარ ხალვაში, რომელიც დვალს, მისივე ინფორმაციით, 2013 წელს შეხვდა.
_ მოსაკლავი დათვის ტყავის გაყოფა არ მომხდარა. ვიცი ისტორია და მზად ვარ მოველაპარაკო. როგორც მე ვედავები სააკაშვილს, იგივე უფლება მათაც აქვთ. დამოკიდებულია მათ გემოვნებაზე და მიმდინარე სასამართლოზე, _ ამბობს „გურია ნიუსისთვის“ მიცემულ ექსკლუზიურ ინტერვიუში ქიბარ ხალვაში.
_ გქონდათ მათთან ამ თემაზე საუბარი?
_ კონკრეტულზე არა. დვალს შევხვდი, 2013 წელი იქნებოდა. ორივეს ცალ-ცალკე გვქონდა და გვაქვს შეტანილ საჩივარი პროკურატურაში. ის, რაც დვალმა შემომთავაზა, მე არ მომეწონა და მაშინ ვერ შევთანხმდით. მათ კი იზარალეს, მაგრამ მე გაცილებით მეტი ვიზარალე. მათი უპირატესობა (დვალის) ის არის, რომ სული მეტი აქვს ჩადებული, მე უფრო მეტი მატერიალური ზარალი მომადგა. არც ისე მარტივია კომპრომისის ნახვა.
_ კონკრეტულად რა შემოგთავაზათ?
_ ახლა არ ვიტყვი. ჩემს საქმეს არ წაადგება.
_ არსებული ინფორმაციით, თქვენი და დვალის მორიგება ბიძინა ივანიშვილს სურს. ამ თემაზე გქონიათ ივანიშვილთან საუბარი?
_ მე ვფიქრობ, რომ ჩვენს შორის მორიგება „ნაციონალური მოძრაობის“ აქტივისტების გარდა, ყველას სურს ანუ ყველა ნორმალურად მოაზროვნე ადამიანს. ივანიშვილს რა სურს, მას ჰკითხეთ. მასთან მქონდა 15-წუთიანი საუბარი ბრიუსელში 2012 წელს. ვერ მოვასწარი, რომ მეკითხა, რა მოსწონს.
_ „რუსთავი 2“-ზეც ესაუბრეთ? ივანიშვილი ამბობს, რომ დახმარებას დაგპირდათ. კონკრეტულად, რისი პირობა მოგცათ?
_ ვთხოვე, რომ დახმარება გაეწია და რაც დავკარგე, დაებრუნებინათ. ძირითადად, მონოლოგი იყო ჩემი მხრიდან. მოვუყევი, რა წნეხი გადავიტანე. ყველაფერი ვერ მოვასწარი, მაგრამ „რუსთავი 2“-ის შესახებაც მოვუყევი და კიდევ მადლობა ვუთხარი, რომ გვიშველა.
_ შეგისრულათ თხოვნა?
_ არაფერი არ მომხდარა გარდა იმისა, რომ დამატებითი ხარჯები გავწიე და დრო დავხარჯე.
_ სასამართლოსგან რა მოლოდინი გაქვთ?
_ ჩემი საჩივარი სამართლიანია, იმედი მაქვს, გავიმარჯვებ, თუ პოლიტიკური ზემოქმედება არ მოხდება მოსამართლეზე. მიშამ წამართვა ტელევიზია _ არ უნდა დააბრუნოს?!
_ ბატონო ქიბარ, ახლა რატომ შეიტანეთ სარჩელი და არა 2012 წელს, ხელისუფლების ცვლილებისთანავე?
_ ვაი, მეეე! საჩივარი შევიტანე 4-ჯერ _ 2008, 2009, 2013, და 2015 წელს.
_ ეს გასაგებია, მაგრამ როგორ ფიქრობთ, ახლა რატომ გახდა აქტუალური ეს საკითხი და არა მაშინ, როცა შეიტანეთ? ეს არჩევნებს ხომ არ უკავშირდება? არსებობს ეჭვი, რომ თუკი ტელევიზიას თქვენ დაიბრუნებთ, „რუსთავი 2“ კრიტიკული არ იქნება ხელისუფლების მიმართ…
_ 2008 და 2009 წელს შეტანილს აჟიოტაჟი არ მოჰყოლია იმიტომ, რომ მიშამ თაროზე დადო საჩივარი. პროკურატურას რომ ფხა გამოეჩინა, დროზე დაემთავრებინა გამოძიება და მათი მხრიდან შესულიყო საქმე სასამართლოში, ზუსტად იგივე ხმაური მოყვებოდა ყველაფერს და იქნებოდა საუბარი, აი, საპრეზიდენტო არჩევნების დროს შემოიტანაო, მერე იტყოდნენ, აი, ადგილობრივი არჩევნების დროს შემოიტანაო. და რა ვქნა, ვის ველოდო?! თქვენ რას ფიქრობთ, ნებისმიერ სხვა დროს რა რეაქცია მოჰყვებოდა ჩემს საჩივარს „ნაციონალური მოძრაობის“ და მისი სატელიტების მხრიდან?! მე მერჩივნა, ეგ საქმე პროკურატურის მიერ ორი წლის წინ შესულიყო სასამართლოში _ „თავისუფალი დემოკრატებით“ და მარგველაშვილით ნაკლები ოპონენტი მეყოლებოდა.
_ სასამართლოში შეტანილ სარჩელში მითითებულია, რომ გადაცემა „ფორტი ბოიარდი“ და თქვენ იყიდეთ… დაობთ ლოგოზეც… ჟურნალისტი დავით კიკალიშვილი ამბობს, რომ ლოგო მისმა ძმამ შემქნა და თქვენ ამ ყველაფერთან კავშირი არ გაქვთ. ფლობთ თუ არა დამამტკიცებელ დოკუმენტებს, რომ გადაცემა ნამდვილად თქვენ შეისყიდეთ და ლოგოს დამზადებაში ფული გადაიხადეთ?
_ როცა „რუსთავი2“-ში მივედი, კიკალიშვილი გაქცეული იყო სხვა არხზე და დავაბრუნე. რა იცის მაგან, მე რა გავაკეთე?! გაკოტრებული და ინფრასტრუქტურა მორყეული კომპანია მოგებაზე გავიყვანე; იმიჯი შევუცვალე, ახალი საინტერესო გადაცემების უფლება შევიძინე და გავაცოცხლე. დიახ, ლოგოც შევცვალეთ. საავტორო უფლების შესახებ წესებში რაღაც ხარვეზი გაიპარა. კომპანია „რუსთავი 2“-მა 2006 წელს იმაზე მეტი მოიგო, ვიდრე ნიკა გვარამიას ხელმძღვანელობის დროს _ 2013 და 2014 წელს. თუ გაარკვევთ, კარგი იქნება და იმ მატყუარებს „რუსთავი 2“-ით რომ გამოდიან და იტყუებიან, ნუ უსმენთ. შეგიძლიათ გადაამოწმოთ და მათ მოსთხოვოთ თავიანთი მოჩმახულის დადასტურება.
_ ამ ყველაფრის დამამტკიცებელი დოკუმენტი წარუდგინეთ სასამართლოს?
_ სასამართლოს წარვუდგინეთ ერთი დოკუმენტი: რამდენი იყო „რუსთავი2“-ის აქტივები მაშინ, როცა დამათმობინეს კომპანია, მეტი არაფერი.
_ აპირებთ თუ არა სხვა წართმეული ქონების დასაბრუნებლად ბრძოლას?
_ სხვა კომპანიების პროცესები მორჩა სამივე ინსტანციაში და არსებული კანონებით კიდევ განხილვას არ ექვემდებარება. კიდევაც რომ გადაიხედოს ეს საქმე, ამას კანონების შეცვლა სჭირდება. ამ ცვლილებებს პარლამენტის გადაწყვეტილება უნდა და ხელისუფლებას სურვილი უნდა ჰქონდეს _ მაშინ დაახლოებით 100 მილიონი უნდა გადაიხადონ, რისი სურვილი და რესურსი ხელისუფლებას არ აქვს. მარტო მე ხომ არ ვარ _ ჩემისთანები ხომ კიდე არიან?! ასე რომ, არ არსებობს ვინმე ხელისუფლებაში, ვისაც ეს „აწყობს“, არ „აწყობს“ „ნაციონალურ მოძრაობასაც“, მაგრამ მე მაინც გამოვნახავ რაიმე გზას საბრძოლველად. „რუსთავი 2“-ის შემთხვევა სხვაა _ სასამართლო არ ყოფილა აქამდე.
_ ანუ, ის პროცესები წააგეთ…
_ ის, რაც მიშას დრო იყო, იმას თუ სასამართლო ჰქვია, წავაგეთ. მინდა დავამატო, რომ ჩვენი ქონება ყოველგვარი აღსრულების ქაღალდის გარეშე დაიტაცეს მაშინდელი ხელისუფლების მიერ გამოგზავნილმა ხალხმა. დატაცებული ქონება არ იყო ჩამოკლებული იმ დავალიანებაზე, რაც სააკაშვილმა და ადეიშვილმა დაგვაკისრეს. ქონების ნაწილი არის თავდაცვის სამინისტროში ისე, რომ ბალანსზე დღემდე არ აუყვანიათ. ეს ახალაიას ნადავლი იყო. მერე თავის მეგობრებს აძლევდა რომ იმ ტექნიკით მისი დაკვეთები შეესრულებინათ. ნაწილი სასჯელაღსრულებას აქვს; ერთი გენერატორი რომელიც 100 ათასზე მეტი ღირდა და ქარხანაში იდგა, მიშამ წაიღო რეზიდენციაში და მგონია, ისევ იქ არის. რაც გადაწვეს და სადაზღვევო სააგენტოს თვითონ გამოართვეს, კიდევ სხვა თემაა.
_ გასულ კვირას პრეზიდენტთან შეხვედრის სურვილი გამოთქვით. ჩვენთან ინტერვიუში პრეზიდენტის ადმინისტრაციის წარმომადგენელმა თქვა, რომ დღეს უნდა დაგგკავშირებოდნენ. თუ დაგირეკეს და რა თემაზე გსურთ მარგველაშვილთან საუბარი?
_ ოფიციალურად მიწვევა არ მიმიღია. არაოფიციალურად დღეს დამიკავშირდნენ და იყო დროის შეთანხმების მცდელობა _ მეტი არაფერი. მინდა ამ უსამართლობებზე ველაპარაკო და დახმარება ვთხოვო. მარტო ყარამანაშვილის პრეზიდენტი ხომ არ არის?! მით უმეტეს, მე ავირჩიე და დარწმუნებული ვარ ყარამანაშვილმა საწინააღმდეგოდ მისცა ხმა. დავამატებ, რომ გია ყარამანაშვილს ვიცნობდი და ცუდი კაცი არ ჩანდა. ცუდია, რომ მიშამ ამ დონემდე მიგვიყვანა.
_ ანუ, შესაძლოა, მალე საქართველოში ჩამოხვიდეთ?
_აქამდეც ვყოფილვარ და მარტო ამიტომ ვარ ივანიშვილის მადლობელი.
„გურია ნიუსი“ დეტალების გადამოწმებას დავით დვალთანაც შეეცადა, თუმცა, მან არც სატელეფონო ზარებს უპასუხა და არც სმს გზავნილებს.
