თბილისის ადამიანის უფლებათა სახლი ადვოკატ გიორგი მიდინარაძის ცემის გამო განცხადებას ავრცელებს, რომლითაც გმობს მასზე განხორციელებულ ძალადობას.
"თბილისის ადამიანის უფლებათა სახლი და მისი წევრი ორგანიზაციები ვგმობთ, იურიდიული დახმარების სამსახურის ადვოკატ, გიორგი მდინარაძის ცემის ფაქტს.
გიორგი მდინარაძე ამჟამად ელისაბედ ბლექველის სახელობის ჰოსპიტალში იმყოფება, სადაც იგი სასწრაფო დახმარების ბრიგადამ ტვინის შერყევითა და სხეულის მძიმე დაზიანებებით გადაიყვანა. მდინარაძის ინტერესებს თბილისის ადამიანის უფლებათა სახლის უფლებადამცველთა მობილური ჯგუფის იურისტი ეკა ქობესაშვილი და ადვოკატი მუხრან ღურწკაია იცავენ.
დღეს, 9 ნოემბერს ბლექველის სახელობის ჰოსპიტალში იმყოფებოდა თბილისის ადამიანის უფლებათა სახლის უფლებადამცველთა მობილური ჯგუფის იურისტი, რომელიც დაზარალებულთან არ შეუშვეს, თუმცა იგი პირადად ესაუბრა გიორგი მდინარაძის მეუღლეს, რომელმაც დეტალური ინფორმაცია მიაწოდა მომხდართან დაკავშირებით.
იურიდიული დახმარების სამსახურის ადვოკატი გიორგი მდინარაძე 8 ნოემბერს სამართალდამცავებმა ვაკე-საბურთალოს მეხუთე განყოფილებაში სცემეს. დაზარალებულის მეუღლის, სალომე ჭყონიას განცხადებით, 8 ნოემბერს 24 საათზე გიორგი მდინარაძეს დაუკავშირდა თბილისის იურიდიული დახმარების სამსახურის ბიუროს უფროსი სულხან კომახიძე და ერთ-ერთი არასრულწლოვანი პატიმრის შესახებ მიაწოდა ინფორმაცია.
კომახიძის მოთხოვნის საფუძველზე, გიორგი მდინარაძე, დაახლოებით, დილის 8 საათზე გაათავისუფლეს. მეუღლის ინფორმაციის თანახმად, მას ჩამორთმეული ჰქონდა პირადი ნივთები და არავის ჰქონდა მისი ნახვის უფლება.
გიორგი მდინარაძის მეუღლის განცხადებით, დაკითხვაზე მისული ადვოკატი არასრულწლოვანის დედას გასაუბრებია. მას უთქვამს, რომ დილით კერძო ადვოკატი უნდა აეყვანათ, ამიტომ გიორგის უთქვამს, რადგან კერძო ადვოკატი უნდა ჩაერთოს საქმეში, დაველოდოთ და ხვალ მისცეს ჩვენებაო. თუმცა, პოლიციელები დაჟინებით მოითხოვდნენ, რომ არასრულწლოვნისაგან იმ ღამესვე აეღოთ ჩვენება. რადგან არასრულწლოვანმა დუმილის უფლება გამოიყენა, პოლიციელები გაღიზიანებულან და გიორგი უფროსთან შეუყვანიათ, სადაც ხელები შეუკრეს და პოლიციის, დაახლოებით, 5 თანამშრომელი ფიზიკურად გაუსწორდა.
საქართველოში ამ დრომდე არ ყოფილა მსგავსი შემთხვევა, რომ პოლიციელებს ხეელი შეეშალათ ადვოკატისთვის პროფესიული მოვალეობის შესრულებისას და ფიზიკურად გასწორებოდნენ მას.
მოვითხოვთ, გიორგი მდინარაძის ცემის ფაქტს სწორი სამართლებრივი კვალიფიკაცია მიეცეს და უმოკლეს ვადაში გამოიძიონ აღნიშნული ფაქტი. ამასთან, მოვითხოვთ, პოლიციის მე-5 განყოფილების თანამშრომლების სამართლებრივი პასუხისმგებლობის დაყენებას."– ნათქვამია თბილისის ადამიანის უფლებათა სახლის მიერ გავრცელებულ განცხადებაში.
შეგახსენებთ, რომ გიორგი მდინარაძე ორი დღის წინ ვაკე-საბუთალოს პოლიციის მეხუთე განყოფილების თანამშრომლებმა, მაშინ ცემეს, როცა ის არასრულწლოვანის უფლებებს იცავდა. ადვოკატმა ცემის შედეგად მიიღო მძიმე ტრავმა და ამ დრომდე კლინიკაში მკურნალობს.
მდინარაძის საქმის გამოძიება უკვე დაწყებულია, დაზარალებული დაკითხეს პროკურატურის წარმომადგენლებმა. ის ასევე მოინახულეს სახალხო დამცველის რწმუნებულებმა.
