საქართველოს პრემიერ-მინისტრის, ირაკლი ღარიბაშვილის განცხადებით, ხელისუფლების მთავარი ამოცანა დემოკრატიის გაღრმავება და ადამიანის უფლებების დაცვაა. ამის შესახებ ღარიბაშვილმა მთავრობის საქმიანობის სამწლიანი ანგარიშის წარდგენისას განაცხადა.
"დემოკრატიის გაძლიერება არის პროცესი, რომელიც გრძელდება. თითოეული მოქალაქის უფლებათა დაცვა არის ჩვენი ქვეყნის კონსტიტუციური მოვალეობა. მიუხედავად იმისა, რომ არც თუ ისე ცოტა ხნის წინ ჩვენი წინა ხელისუფლება, ვიტყოდი, ფეხქვეშ თელავდა ადამიანის ყველა ფუნდამენტურ უფლებას, ამ სამი წლის თავზე ჩვენ ეს გამოვასწორეთ და დავამკვიდრეთ ადამიანის უფლებათა დაცვის მაღალი სტანდარტები. მივიღეთ ადამიანის უფლებათა დაცვის ეროვნული სტრატეგია, რომელიც ყველაზე მაღალ სტანდარტებს ითვალისწინებს ადამიანის უფლებათა დაცვის სფეროში. ასევე, მივიღეთ შრომის კოდექსი, რომელიც შესაბამისობაშია ევროპულ სტანდარტებთან; შევქმენით პერსონალურ მონაცემთა დაცვის ინსპექტორის აპარატი; ავამუშავეთ რეგიონში პირველი და ნამდვილად საამაყო არასრულწლოვანთა მართლმსაჯულების კოდექსი", _ აღნიშნა ღარიბაშვილმა.
