დღეს, ოზურგეთის მუნიციპალიტეტის სოფელ ნაგომრის ცენტრში, ადგილობრივი მოსახლეობის წარმომადგენლებმა საპროტესტო აქცია გამართეს. მათი მოთხოვნა არაერთ საკითხს შეეხებოდა, თუმცა ძირითადად ისინი დღემდე შეჩერებული გამრიცხველიანების პროცესის გამო ბრაზობდნენ.
"გაზის გამოყვანაზე საუბარი არაა, არადა, 300 მეტრში გადის ცენტრალური მილსადენი, გზა ჩვენ არ გვაქვს, გამრიცხველიანებისთვის ხომ დღემდე ვყვირით, წაქცეული ბოძები, ჩამოყრილი სადენები, ფულის გადახდის დროს კი არის _ "გამიშვი და გაგიშობ". სადამდე ვიყოთ ასე? გადავკეტავთ ამ ცენტალურ გზას და მერე მოგვაქციონ, იქნებ, ყურადღება! _ ამბობენ "გურია ნიუსთან" ჯუმბერ კვასტიანი, ომარ ტვილდიანი, ციალა ლიპარტელიანი, ქეთევან მიქაშავიძე, გენო ჯაში…
_ ამ მწვავე პრობლემების გამო თუ მიმართეთ გამგებლის წარმომადგენელს, სოფლის მაჟორიტარ დეპუტატს ან მუნიციპალიტეტის გამგებელს? _ ვკითხეთ მათ.
აქციის მონაწილეებიის პასუხი ასეთია: არაერთი თხოვნის მიუხედავად, "სოფელში არაფერი გაკეთებულა კომუნისტების ბატონობის მერე".
აქციის დაწყებიდან რამდენიმე წუთის შემდეგ ადგილზე მოვიდა ოზურგეთის მუნიციპალიტეტის გამგებელი მერაბ ჭანუყვაძე. შეხვედრა კრების რეჟიმში გადავიდა და მერაბ ჭანუყვაძემ და "ენერგო-პრო ჯორჯიას" ოზურგეთის სერვისცენტრის მენეჯერმა გია ნაკაიძემ საპროტესტოდ შეკრებილების კითხვებს უპასუხეს და გამოთქვეს საკუთარი თვალსაზრისიც.
"მე ყოველთვის მზად ვარ თქვენთან შესახვედრად. როცა პირველად მოვედი სოფელში და შეგხვდით, ვისაუბრეთ არაერთ პრობლემაზე. ახლაც გპირდებით, რომ ორი უმნიშვნელოვანესი პროექტი, გზის რეაბილიტაცია და გამრიცხველიანება მაისის თვეში დაიწყება. ამასთანავე მზად ვარ, როცა გნებავთ, შევხვდეთ ერთმანეთს, პრობლემების ირგვლივ ვისაუბროთ და ერთად განვიხილოთ ყველა საკითხი. ნუ გგონიათ, რომ მხოლოდ ნაგომარში არაა გამრიცხველიანება. სოფელი სილაურიც ანალოგიურ მდგომარეობაშია. არც იქაა გამრიცხველიანება დაწყებული და სილაურელიც იტყვის იგივეს, რასაც თქვენ ამბობთ. გპირდებით, რომ ნაბიჯ-ნაბიჯ თქვენთან ერთად მოხდება ყველა პრობლემის გადაწყვეტა თქვენდა სასიკეთოდ, ერთად კი ყველაფერი არ კეთდება. თქვენ გაქვთ უფლება, გამოხატოთ პროტესტი, თუმცა მანამდე ვინმე ჩემამდე მოვიდა? მუდამ ღიაა ჩემი კარი, არსებობს კომუნიკაციის მრავალი საშუალება. მუდამ მზად ვარ, მოგისმინოთ, "_ თქვა მერაბ ჭანუყვაძემ.
ადგილობრივმა მკვიდრმა ჟორა კვასტიანმა ითხოვა, როგორმე მაისამდე დაიწყოს გამრიცხველიანება, რადგან ყველა პრობლემაზე უმწვავესი დღეს სოფლისთვის სწორედ ესაა.
_ უფრო ადრე რომ დაიწყოთ გამრიცხველიანების სამუშაოები, არ შეიძლება? _ იკითხა მან.
" გამრიცხველიანებას თქვენთან დავიწყებთ მაისის ბოლოს. მანამდე სოფელ შრომაში ვმუშაობთ და პარალელურ რეჟიმში ვერ ვიმოქმედებთ. ამ საკითხს გაგებით უნდა მოვეკიდოთ. ჩემი თხოვნაა, გაითვალისწინოთ ეს ყველაფერი. ნაგომარში 320 კომლია, 340 ბოძზე მეტი კი დასადგამია. ასევე დასამონტაჟებელია ქვესადგურები. ეს ყველაფერი საფუძვლიანად გაკეთდება ამ წელს და ამდენი დავიდარაბაც არ იქნება," _ უთხრა ადგილობრივ მცხოვრებლებს "ენერგო-პრო ჯორჯიას" ოზურგეთის სერვისცენტრის მენეჯერმა გია ნაკაიძემ.
სოფელ ნაგომრის მცხოვრებლებმა და ოზურგეთის მუნიციპალიტეტის გამგებელმა კიდევ არაერთი პრობლემის შესახებ ისაუბრეს, რაც სოფელში არსებობს და შეთანხმდნენ, რომ მეტი სიხშირით შეხვდებიან ერთმანეთს და ყველა პრობლემას ერთობლივად გადაწყვეტენ.
