საქართველოში, კონკრეტულად, გურიაში, უკვე ძალზე ეფექტურად მუშაობს ფურის ხელოვნური განაყოფიერების პრაქტიკა. ახლა ამას დაემატა ღორის საუკეთესო ჯიშთა განახლების მეთოდიც, რაც ასევე წარმატებით დაიწყო _ გურიაში უკვე მიღებულია 4 ათასამდე გაუმჯობესებული ჯიშის ხბო, რომელიც მომდევნო ეტაპზე უფრო უნდა გაიზარდოს და არ უნდა მოხდეს ჩვილობის ასაკში მისი დაკვლა.
რა ხდება ამ კუთხით ჩვენს რეგიონში? სამწუხაროდ, ჩვილი ხბოსა და გოჭის დაკვლის პრაქტიკა ადრე, კომუნისტურ ეპოქაშიც იყო, თუმცა, ახლა ეს პროცესი განსაკუთრებით საგანგაშო ელფერს იძენს. ვითარება უფრო თვალში საცემია ზაფხულობით, ტურისტულ სეზონზე _ უამრავ რესტორანსა და კაფეებში მუდამ აქვთ ჩვილი ხბოს ხორცი, რაც ძალიან ძვირი ღირს.
ბუნებრივია, ადამიანს ვერ აუკრძალავ საკუთარი შრომით გაზრდილი პირუტყვის გაყიდვას. მას უჭირს, არ აქვს საკვები ბაზა. აქ უფრო მოქალაქეობრივ და მეურნის მიზანმიმართულ, გონივრულ აზროვნებასა და მიდგომაზე უნდა იყოს ყოველივე დაფუძნებული. არის ქვეყნები, სადაც ჩვილობის ასაკში ხბოს თუ გოჭის დაკვლა კანონით აკრძალულია.
წინააღმდეგ შემთხვევაში, უეჭველად შემცირდება მსხვილფეხა რქოსანი პირუტყვის რაოდენობა და ისედაც შემცირებული და ჭირისგან განადგურებული ღორი. ვიდრე სახელმწიფოს უზრუნია ამ ვითარების კანონის მიღებით დარეგულირებაზე, თითოეულ ფერმერს მინდა ვურჩიო, როგორმე დავინდოთ ჩვილობის ასაკში მყოფი ხბო თუ გოჭი. გაზრდილი გაცილებით მეტ მოგებას მოგცემთ და ამასთანავე გამრავლდება და გაძლიერდება მსხვილფეხა რქოსანი თუ დანარჩენი შინაური პირუტყვის ბაზა რეგიონში, რაც ქვეყნის ეკონომიკური ძლიერების უმნიშვნელოვანესი ბერკეტია.
თამაზ კილაძე, ვეტექიმი
