გაზეთ „ქრონიკა პლუსის“ რედაქტორმა, ელისო კილაძემ, „TVპირველზე“, ჟურნალისტ ინგა გრიგოლიას ეთერში განაცხადა, რომ ბიძინა ივანიშვილი „მაესტროში“ განვითარებულ მოვლენებში ორი სანდო ადამიანის მეშვეობით ჩართული იყო.
ასეთ „ორ სანდო ადამიანად“ ივანიშვილის დეიდაშვილი უჩა მამაცაშვილი და გადაცემა 2030-ის ჟურნალისტი დაასახელა.
კილაძემ აღნიშნა, რომ 2030-ის ჟურნალისტის ვინაობა იცის, თუმცა „გარკვეული ეთიკური მოსაზრებების გამო არ ასახელებს“
2030-ის რედაქცია ელისო კილაძის მიერ ნახსენები ჟურნალისტის გვარის დასახელებაში ვერანაირ ეთიკურ პრობლემას ვერ ხედავს.
"პირიქით, თუ ქალბატონ ელისოს მართლაც შეუძლია თავისი ნათქვამის დასაბუთება და მხოლოდ ჭორს არ ეყრდნობა, რაც, სამწუხაროდ, ხშირი მოვლენა გახდა, მაშინ მისი, ისევე როგორც ყველა ჟურნალისტის სწორედაც რომ პროფესიული მოვალეობაა, დაასახელოს ამ ჟურნალისტის ვინაობა და საზოგადოებას მიაწოდოს ინფორმაცია, რა ფორმით მონაწილეობდა 2030-ის ჟურნალისტი მაესტროში მიმდინარე პროცესებში.
ჟურნალისტური სტანდარტის მიხედვით, არაეთიკურ და არაპროფესიულ საქციელს წარმოადგენს სწორედაც რომ მედიისთვის არასწორი ინფორმაციის მიწოდება საზოგადოების შეცდომაში შეყვანის მიზნით, მედიის მხრიდან ამ არასწორი ინფორმაციის ტირაჟირება და შემდეგ არასწორ ინფორმაციაზე დაყრდნობით დასკვნების გაკეთება" _ აღნიშნულია 2030-ის მიერ გავრცელებულ განცხადებაში.
განცხადებას განცხადებით უპასუხა ელისო კილაძემ და აღნიშნა, რომ ჟურნალისტის ვინაობას მაშინ დაასახელებს, როცა საჭიროდ ჩათვლის:
"20/30 ინგა გრიგოლიას ეთერში ჩემს მიერ გაკეთებულ განცხადებას შეუშფოთებია-"მაესტროს"მოლაპარაკებებში მონაწილე ჟურნალისტის ვინაობა დაასახელოსო.
ვადასტურებ-უჩა მამაცაშვილთან ერთად "მაესტროს"წილების გაფორმების მოლაპარაკებებში ნამდვილად მონაწილეობდა 20/30-ის ჟურნალისტი (ბიძინა ივანიშვილის მხრიდან). მის ვინაობას დავასახელებ მაშინ როცა ამას საჭიროდ ჩავთვლი.
არც დამატებითი განმარტებების გაკეთებას ვაპირებ და არც იმას ვფიქრობ, რომ ვასიკო მაღლაფერიძემ შეიძლება იცოდეს, ბიძინა ივანიშვილის გეგმების შესახებ.
ძალიანაც ნუ გამოიდებთ თავს" _ წერს კილაძე.
ვასილ მაღლაფერიძე ამ თემაზე კომენტარს მოგვიანებით, "გურია ნიუსთან" ექსკლუზიურ ინტერვიუში გააკეთებს, რომელსაც მალე შემოგთავაზებთ.
ამავე ინტერვიუდან გაიგებთ იქნება თუ არა მაღლაფერიძე "ოცნების" სიაში და რა ურთიერთობა აქვს მას ბიძინა ივანიშვილთან.
