დათუნა კიკვაძე ოზურგეთის მუნიციპალიტეტის დაბა ნასაკირალიდანაა. 2012 წლის შემდეგ, მისი ეკონომიკური მდგომარეობა არ გაუმჯობესებულა, მაგრამ სოციალური დახმარება მაინც მოუხსნეს. სამაგიეროდ, მიუხედავად იმისა, რომ შეზღუდული შესაძლებლობის პირია, ჯარში გამოიძახეს აღრიცხვაზე რომ დააყენონ.
"ერთი ხე უფრო მეტად ფასობს საქართველოში მთავრობისთვის, ვიდრე ათასობით დათუნასნაირი ადამიანი…" – წერს სოციალურ ქსელში დაბა ნასაკირალში მცხოვრები ბესო ქათამაძე.
"გურია ნიუსი" დაინტერესდა ამ საკითხით და დათუნა კიკვაძეს დედას, ციური კიკვაძეს დაუკავშირდა.
"პრობლემების მეტი რა გვაქვს. ვარ შეზღუდული შესაძლებლობის მქონე პირის მშობელი. ძალიან ნიჭიერი ბავშვია, მაგრამ სკოლაში ვერ დამყავს, რადგან ამის საშუალება არ მაქვს. დათუნა 16 წლისაა და გვესაჭიროება ეტლი, მაგრამ შესაძენად ფული არ გვაქვს და ყველას ვთხოვთ, იქნებ მოგვაქციონ ყურადღება! სოციალური დახმარება გვქონდა, მაგრამ მოგვიხსნეს. ჩემი შვილი ახლობლებმა დასასვენებლად წაიყვანეს ესპანეთში და როდესაც დაფიქსირდა საზღვარზე გადასვლა, მაშინვე მოგვიხსნეს დახმარება," – გვითხრა ციური კიკვაძემ.
მისივე თქმით, ამ დღეებში მასთან სოფლის წარმომადგენელი მივიდა და სამხედრო აღრიცხვისთვის საბუთების შეგროვება თხოვა.
"ნეტავ იმის შესაძლებლობა ჰქონდეს, რომ ჯარში წავიდეს, არავინ იტყოდა უარს. მოგვთხოვეს ოთხი ცალი ფოტოსურათი, პასპორტის ასლი, ოჯახის წევრების პირადობის მოწმობის ასლები," – თქვა ჩვენთან საუბრის დროს ციური კიკვაძემ.
დაბა ნასაკირალში ოზურგეთის მუნიციპალიტეტის გამგებლის წარმომადგენელის მოვალეობის შემსრულებლის დათო ტუნაძის თქმით, ყველა მოზარდი აღრიცხვაზე უნდა იყოს აყვანილი.
"არანაირი პრობლემა არ არის, 16 წლისაა და რომ დაჭირდეს რამე საბუთი, მაგალითად სამხედრო ბილეთი, პირადობის მოწმობა, მხოლოდ ამისთვის ვიყავით მასთან. ყველაფერი კანონის ფარგლებში მოხდა,"– გვითხრა ტუნაძემ.
ჩვენ ასევე დავინტერესდით, მიმართა თუ კიკვაძეების ოჯახმა ადგილობრივ ხელისუფლებას დახმარებისთვის, რომ ოჯახმა შეძლოს ეტლის მიღება . კიკვაძეების ოჯახში გვითხრეს, რომ დახმარებისთვის ხელისუფლებას 8 წლის წინ მიმართეს და რადგან ყურადღება არავინ მიაქცია, ახალი ხელისუფლება საქმის კურსში არ ჩაუყენებიათ.
"ამ წელს დახმარების სახით დათუნა კიკვაძეზე არაფერი გაცემულა, მაგრამ სოციალურად შეჭირვებულებისთვის ორ დღეში ჩამოგვივა საკვები პროდუქტები და კიკვაძეების ოჯახი ამ სიაში ნამდვილად გათვალისწინებულია," – გვითხრეს ოზურგეთის მუნიციპალიტეტის გამგეობის პრესსამსახურში.
