თბილისის მედიათეკების გაერთიანების" დირექტორი მაკო ჭოღოშვილი თანამდებობიდან გაათავისუფლეს.
"გუშინ, ქალბატონმა ნინა ხატისკაცმა დაიბარა მაკო ჭოღოშვილი და აცნობა, რომ გათავისუფლებულია მედიათეკების გაერთიანების დირექტორის თანამდებობიდან, მიზეზად კი ცუდი მენეჯმენტი დაასახელა, თითქოს ის ვერ ხელმძღვანელობდა კარგად და საჭირო იყო, რომ მემედიათეკას ჰყოლოდა ახალი და წარმატებული დირექტორი, რომელიც სიახლეებს შემოიტანდა.
ხვალ ჩვენ შევხვდებით ჟურნალისტებს და მათ ქალბატონი მაკო პირადად მიაწვდის ინფორმაციას. გარდა ამისა, 18:00 საათზე ჩვენ შევხვდებით მკითხველებს, სადაც მედიათეკის თანამშრომლები დავაფიქსირებთ ჩვენს აზრს, რომ ქალბატონი მაკო კარგად უძღვებოდა თავის საქმეს და მისი გათავისუფლების მიზეზი არ არსებობდა. მედიათეკის თანამშრომლები ერთსულოვნები ვართ", – განაცხადა მაკო ჭოღოშვილის თანაშემწემ ნესტან მედოლაშვილმა.
თბილისის მერის მოადგილე ნინა ხატისკაცი "გურია ნიუსთან" მაკო ჭოღოშვილის გათავისუფლების კონკრეტულ მიზეზებს განმარტავს: "დღეს მთავრობის განკარგულებით მივიღეთ გადაწყვეტილება და მაკო ჭოღოშვილმა დატოვა "თბილისის გაერთიანებული მედიათეკების" დირექტორის თანმდებობა. ამ გადაწყვეტილებას ერთპიროვნულად იღებს მთავრობა. ეს გადაწყვეტილება ეფუძნებოდა არა კონკრეტულად ვინმეს სურვილს, რომ ჭოღოშვილი თანამდებობიდან გაგვეთავისუფლებინა, არამედ ეფუძნებოდა მედიათეკების საქმიანობის საკმაოდ დეტალურ შესწავლას.
თბილისის მედიათეკების გაერთიანებას აფინანსებს მერია და ამაში წელიწადში ხარჯავს 700 ათას ლარს. გავაკეთეთ დეტალური კვლევა და მივედით დასკვნამდე, რომ საკადრო რესურსი რომელიც არის ორი ფილიალისთვის, თავისუფლად ეყოფა სამ ფილიალსაც.
მაკო ჭოღოშვილის შემთხვევაში იყო ორი პრობლემა. პირველი პრობლემა მდგომარეობდა საკადრო რესურსის არასწორად დაგეგმვაში, რაც გულისხმობს ხელოვნურად გაბერილ კადრებს და მეორეა ვარკეთილის ფილიალის არასათანადოდ განვითარება. შევისწავლეთ ვარკეთილში მოსახლეობის აზრი და მივედით დასკვნამდე, რომ მათ თითქმის არ აქვთ წარმოდგენა მედიათეკის მუშაობაზე.
რაც შეეხება ფინანსური რესურსებს, მედიათეკების გაერთიანება თითქმის მთლიანად ფინანსდება მერიიდან. მედიათეკამ უნდა დანერგოს ალტერნატიული ფინანსების მოძიების გზები. მედიათეკა არის ობიექტი, რომელიც მართავს სხვადასხვა ღონისძიებებს, არსებობს ბევრი სხვა გზაც, რომლის საშუალებითაც ეს დაწესებულება მთლიანად არ იქნება ჩამოკიდებული თბილისის მერიის დაფინანსებაზე.
ამ თამანდებობაზე დღეს ჩვენ ახალი კანდიდატურა გურამ ნიკოლაშვილი წარვადგინეთ. პირდაპირ გეტყვით სანამ მკითხავთ, ეს არ იყო ერთადერთი კანდიდატურა და ის შევარჩიეთ 7 კანდიდატიდან. ამ ეტაპზე მივიღეთ ყველაზე ოპტიმალური და სწორი გადაწყვეტილება,"-აცხადებს ნინა ხატისკაცი.
