საქართველოს მთავრობის გადაწყვეტილებით, ლანჩხუთის მუნიციპალიტეტში სწრაფმზარდი ტყის სანერგე მეურნეობის გასაშენებლად 2 მილიონ 500 ათასი ლარის ინვესტიცია განხორციელდება.
როგორც ცნობილი ხდება, სახელმწიფო ქონების ეროვნულმა სააგენტომ შპს "ე.ჯ.სი ჯორჯიანს" 25 წლიანი სარგებლობის უფლებით 329,74ჰა ფართობი გადასცა. თუმცა, როგორც საკრებულოს წევრი გია გოგუაძე ამბობს, აღნიშნული ტერიტორიის დაახლოებით 80% სოფელ მამათის მოსახლეობის საყანე ფართობებს უკავია, რამაც შეიძლება დამატებითი პრობლემები შექმნას.
მუნიცილაპიტეტის გამგებლის, ზაზა ურუშაძის თქმით, საყანე ფართობების მეპატრონეებთან უშუალოდ ინვესტორი გამართავს მოლაპარაკებებს.
"ასეთი ინვესტიციებით ჩვენ არ ვართ განებივრებულები და შესაბამისად დადებითი ფაქტია, თანაც, როგორც ვიცი, საუბარია ინვესტიციის 10 მილიონ ლარამდე გაზრდაზე. საყანე ფართობების მეპატრონეებს ინვესტორი დაელაპარაკება, როგორვ ვიცი ისინი კომპენსაციას მიიღებენ"-ამბობს ურუშაძე.
კომპანია ლანჩხუთში მაღალტექნოლოგიური, ხის გადამამუშავებელი ქარხნის მშენებლობას გეგმავს, რომელიც სპეციალური ტექნოლოგიებითა და ეკოლოგიურად სუფთა დანამატებით ე.წ. ხის "გრანულებს" აწარმოებს, რომელიც, როგორც ამბობენ, ფართოდ გამოიყენება ევროპის ისეთი ქვეყნების ენერგომომარაგების სისტემაში, როგორებიცაა, გერმანია, იტალია, დანია, შვედეთი, ჰოლანდია და ნორვეგია.
