საქართველოში ყველაზე ცნობილმა ხემ _ ლილიოდენდრონმა, რომელსაც საქართველოში „ივანიშვილის ტიტას ხეს“ უწოდებენ, დენდროლოგიურ პარკში ბინა უკვე დაიდო, თუმცა, მიწაში ჯერ არ ჩაურგავთ. აყვავებული ხის დასარგავად სამუშაოები ინტენსიურ რეჟიმში მიმდინარეობს და როგორც სამუშაოთა მწარმოებლები ამბობენ, ხვალისთვის, ხე დარგული იქნება.
შავიზღვისპირეთის ყველაზე მაღალი ხის ირგვლივ ტერიტორია ცარიელია და როგორც ჩვენთვის ექსკლუზიურად გახდა ცნობილი, მალე დაიტვირთება. უფრო კონკრეტულად კი ლილიოდენდრონს რაბათის, გელათის, ბაგრატის, სვეტიცხოვლის და სხვა ღირსშესანიშნავი ობიექტების მინიატურული ქანდაკებები დაამშვენებს.
გვითხრეს ისიც, რომ ქანდაკებები უკვე დამზადებულია და მისი დენდროლოგიურ პარკში დადგმა ამ თვეში იგეგმება.
სამუშაოთა მწარმოებლებმა არ იციან, ღია იქნება თუ არა პარკი მოქალაქეებისთვის _ ამ დროისთვის ტერიტორია შემოღობილია და დაცვა მის პერიმეტრსაც მკაცრად აკონტროლებს. უფრო მეტიც, ივანიშვილის სახლის წინ მდებარე პლაჟზე ფეხით გავლაც კი აკრძალულია. პლაჟი ნაგვით არის სავსე და მისი მიმდებარე ტერიტორია, ხის გადმოტანის სამუშაოების გამო, ამ დრომდე გადათხრილია:
_ ხვალისთვის გაიწმინდება პლაჟი. ფილებსაც გავიტანთ და სილასაც გავასწორებთ, _ გვითხრეს იქ მომუშავე ადამიანებმა.
ამ დრომდე უცნობია, ჰქონდა თუ არა კომპანიას ნებართვა ადგილობრივი მუნიციპალიტეტიდან პლაჟზე ჩასატარებელი სამუშაოებისთვის და ზღვაში გზის შეყვანისთვის. ამ საკითხზე ოზურგეთის მუნიციპალიტეტის გამგეობაში კომენტარს არ აკეთებენ.
