ლანჩხუთის საკრებულოს წევრი სამი ქალბატონი: დარეჯან ბურჭულაძე, ნონა მურვანიძე და ელისო ჭიჭინაძე ფრაქციის შექმნას გეგმავენ, რომელიც, როგორც თავად ამბობენ, ოპონირებას გაუწევს საკრებულოს უმრავლესობას. ფრაქციის შექმნის თაობაზე მათ განცხადებით მიმართეს კიდეც სამანდატო, საპროცედურო, იურიდიულ საკითხთა და ეთიკის კომისიას. კომისიის წევრებმა დეპუტატთა განცხადება განიხილეს და საკმაო ხნიანი სჯა-ბაასის შემდეგ დაადგინეს, რომ ქალბატონ დეპუტატთა მიერ წარმოდგენილი დოკუმენტაცია ამ ეტაპზე არასრულყოფილია, ამიტომაც ეს საქმე სამომავლოდ გადაიდო.
განსაკუთრებით კრიტიკული ქალბატონების მიმართ კომისიის თავმჯდომარე, რომან ბიწაძე იყო, რომლის განმარტებითაც დეპუტატთა მიერ წარმოდგენილი დოკუმენტაცია არ შეესაბამება საქართველოს ორგანული კანონის თვითმმართველობის შესახებ 30-ე მუხლის მოთხოვნებს. მისი აზრით, საკითხის განხილვა დღის წესრიგში მას შემდეგ დაბრუნდეს, როცა დოკუმენტაცია სრულყოფილი იქნება.
"ალბათ, დამეთანხმებიან ბიუროს წევრი დეპუტატები, რომ მე არასადროს არ ვიყავი მომხრე, წარმოდგენილიყო პარტიის წევრობის დამადასტურებელი დოკუმენტი. თუმცა, როცა განვიხილავდით ფრაქცია "ლანჩხუთი-ევროატლანტიკური მომავლისთვის" შექმნის საკითხს, ბიურომ რამდენჯერმე უკან დააბრუნა იგი ზემოაღნიშნულის გამოისობით. თანაც, კანონის თანახმად, ფრაქციის შექმნა შეუძლია ორი ან მეტი პარტიის წევრს, ჩემს ხელთ არსებულ დოკუმენტაციაში კი მხოლოდ ქალბატონ ნონა მურვანიძის პარტიული კუთვნილების დამადასტურებელი დოკუმენტი მაქვს. ამის გარდა, განსაკუთრებით გასათვალისწინებელია ერთი დეტალი- მე ხელთ მაქვს საოლქო-საარჩევნო კომისიის 2014 წლის ადგილობრივი თვითმმართველობის არჩევნების შემაჯამებელი ოქმი, სადაც წერია ვინ რა გზით მოვხვდით საკრებულოში. დეპუტატებს: რომან ბიწაძეს, ამირან ქანთარიას, გურამ კერესელიძეს და ელისო ჭიჭინაძეს ამ ოქმში პარტიულობა არ უწერიათ, აქ ყველას "ქართული ოცნება" უწერია. ასე რომ, ჯერ ქალბატონმა ელისომ განცხადება უნდა დაწეროს უმრავლესობის დატოვების თაობაზე და შემდეგ გაერთიანდეს ფრაქციაში ოპოზიციურ სპექტრთან. აქვე, "ეროვნული ფორუმის" თავმჯდომარის განცხადების თანახმად ადგილობრივ დონეებზე პარტიის წევრები უმრავლესობის რეჟიმში აგრძელებენ მუშაობას", – ამბობს რომან ბიწაძე, რომელმაც საკითხზე მსჯელობისას, ფრაქციის სახელწოდებასა და პლატფორმასაც დასდო წუნი.
"თქვენი გამკვირვებია, ერთი "პატრიოტთა ალიანსის" წევრია, მეორე "ბურჯანაძის პარტიის", ქალბატონი ელისო კი "ეროვნულ ფორუმში" გაწევრიანებულა, სად ეს პარტიები და სად ლიბერალიზმი, პლატფორმაში რომ გიწერიათ. სახელწოდებაც "ქალები პოლიტიკაში" ვფიქრობ, დისკრიმინაციულია, რადგან საკრებულოში "პატრიოტთა ალიანსიდან" ბატონი ომარ გოგიჩაიშვილიც ბრძანდება. რატომ გაწირეთ ეს კაცი სამუდამო მარტოობისთვის?!" -ხუმრობანარევი კრიტიკით მიმართა ქალბატონ კოლეგებს კომისიის თავმჯდომარემ.
საკრებულოში ახალი ფრაქციის შექმნის სურვილით გამსჭვალული დეპუტატების აზრით კი მთავარი მიზეზი, რის გამოც ამ ეტაპზე მათ უარი ეთქვათ, ერთადერთია – ეთიკის კომისიის თავმჯდომარის მხრიდან არ არსებობს საამისოდ კეთილი ნება.
"პრობლემა არ არის, ჩვენ მოვიტანთ პარტიის წევრობის დამადასტურებელ დოკუმენტს, უბრალოდ, მე ვენდე ბატონ რომანს, როგორც იურიდიული კომისიის თავმჯდომარეს, რომელმაც რამდენიმე დღის წინ დამპირდა, რომ რადგან მე ფიზიკურად ვერ ვახერხებდი თბილისში წასვლას, თავად გამოითხოვდა "ეროვნული ფორუმიდან" ჩემი პარტიის წევრობის დამადასტურებელ დოკუმენტს, რაც ასე არ მოხდა," -ამბობს ელისო ჭიჭინაძემ.
როგორც ირკვევა, ფრაქციის დარეგისტრირების შემთხვევაში, თავმჯდომარედ ნონა მურვანიძე მოიაზრება, რომელიც საკრებულოში ნინო ბურჯანაძის პარტიას -"გაერთიანებულ დემოკრატიულ მოძრაობას" წარმოადგენს, ხოლო დარეჯან ბურჭულაძე "პატრიოტთა ალიანსის" სიით შევიდა ადგილობრივ საკანონმდებლო ორგანოში. რაც შეეხება ელისო ჭიჭინაძეს, იგი თავიდან "თავისუფალ დემოკრატებში" ირიცხებოდა, თუმცა გასულ წელს პარტიაც და ფრაქციაც საკუთარი განცხადების საფუძველზე დატოვა. დაახლოებით ერთი თვის წინ კი "ეროვნულ ფორუმში" გაწევრიანდა. საკუთარ გადაწყვეტილებას ქალბატონი ელისო ასე ხსნის –"სტუდენტობიდან ეროვნულ მოძრაობაში ვარ და ძალიან ბევრი მეგობარი მყავს "ფორუმში," ამიტომაც მივიღე გადაწყვეტილება მათ რიგებს შევერთებოდი".
