12 კვერცხის ცილა ავთქვიფოთ გათეთრებამდე და ნელ-ნელა დავამატოთ ჭიქანახევარი შაქარი. ასევე, დავუმატოთ 50 წვეთი წითელი ჭარხლის წვენი, რომელიც წინასწარ გვექნება მომზადებული. შემდეგ დავუმატოთ კვერცხის გული, ვანილი და კვლავ ავთქვიფოთ. ისევ დავამატოთ ორი ჩაის კოვზი ჭარხლის წვენი. ბოლოს ნელ-ნელა დავამატოთ ჭიქანახევარი უმაღლესი ხარისხის ფქვილი და ასევე ნელა მოვურიოთ კოვზით.
მასა მოვათავსოთ ცხიმწასმულ ყალიბში და დაბალ ტემპერატურაზე გამოვაცხოთ ერთი საათის განმავლობაში. როცა გამოცხვება, ბისკვიტი დავდოთ ცალკე _ კარგად გაგრილდეს.
მოვამზადოთ დასანამი სითხე: ერთად წამოვადუღოთ ერთი ჭიქა წყალი და სამი სუფრის კოვზი შაქარი. გაგრილდეს, ჩავასხათ ორი სუფრის კოვზი ჭარხლის წვენი, ერთი სუფრის კოვზი კარგი არაყი ან კონიაკი.
კრემი: 500 გრამი დარბილებული კარაქი გათეთრებამდე ვთქვიფოთ ჭიქანახევარ შაქართან ერთად. დავამატოთ ვანილი და დასანამი სითხის ნახევარი. კვლავ მოვურიოთ. შემდეგ ბისკვიტი გავჭრათ შუაზე, დავნამოთ და წავუსვათ ვარდისფერი კრემი. დარჩენილ კრემს კვლავ დავუმატოთ 15 წვეთი ჭარხლის წვენი, რომ უფრო მუქი ვარდისფერი გახდეს და ტორტი მოვრთოთ სასურველი ზომის და ფორმის ყვავილებით. შევდგათ მაცივარში. სააღდგომო სუფრა ვარდისფერი ტორტით დავამშვენოთ, დავდოთ დაუჭრელად.
ფერისთვის სპეციალური ფხვნილის გამოყენებაც შეგიძლიათ, თუმცა რაც უფრო მოვერიდებით ქიმიას, მით უკეთესი. ამასთანავე ჭარხლის წვეთები ბისკვიტსა და კრემს გამორჩეულ ნაზ ფერსა და თავისებურ არომატს სძენს.
