გუშინ ევროპის კვირეულთან დაკავშირებით სახელმწიფო მინისტრი ევროპულ და ევროატლანტიკურ სტრუქტურებში ინტეგრაციის საკითხებში დავით ბაქრაძე ქალაქ ოზურგეთს სტუმრობდა.
ქალაქ ოზურგეთის მუნიციპალიტეტის მერიისა და ნატოსა და ევროკავშირის შესახებ საინფორმაციო ცენტრის მიერ ორგანიზებული ღონისძიება სხვადასხვა ტიპის აქტივობით იყო დატვირთული.
ევროპასთან ინტერგაციის თემაზე შექმნილი ნამუშევრების გამოფენა, ხატვა ღია ცის ქვეშ და ახალგაზრდების ფლეშმობი დღეს საზოგადოებას საკმაოდ საინტერესო აქტივობების ხილვის შესაძლებლობა ჰქონდა.
ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა დავით ბაქრაძემ გამოსვლისას ყურადღება საქართველოსთვის ევროინტეგრაციის მნიშვნელობაზე გაამახვილა:
"ოზურგეთში ჩვეული, გურიისთვის დამახასიათებელი ოპტიმისტური განწყობა დამხვდა. გურია ყოველთვის იყო პოლიტიკურად ყველაზე აქტიური, ჯანსაღად მოაზროვნე და ტოლერანტული მხარე და ასეთად რჩება. საქართველო მუდამ ევროპული ოჯახის წევრი იყო, ჩვენ ბევრი საერთო ღირებულება გვაქვს და ჩვენი ისტორიული ადგილი სწორედ ევროპაშია. დიდი იქნება ის სარგებელი, რომელსაც ჩვენ ასოცირების ხელშეკრულებით, თავისუფალი ვაჭრობითა და ვიზალიბერალიზაციის საკითხებით მივიღებთ და ამ მიმართულებით ჩვენი ხელისუფლება კიდევ უფრო ქმედით ნაბიჯებს გადადგამს."
"საკმაოდ საინტერესო შეხვედრა შედგა. ძალიან კმაყოფილი დავრჩი, განსაკუთრებით ახალგაზრდების დამოკიდებულებით და მათი ნამუშევრებით. ისინი ძალიან სწორად ხედავენ ჩვენს ევროპულ არჩევანს და მის მართებულობას. განსაკუთრებით მნიშვნელოვანია ის გარემოება, რომ არა მხოლოდ ხელისუფლება, არამედ საზოგადოება სრულიად მზად არის გახდეს ევროკავშირის სრულუფლებიანი წევრი. ამ მიმართულებით უკვე სერიოზული პროცესებია დაწყებული, ვიზალიბერალიზაციაც ფაქტიურად დასრულებულია. ამ საქმეში კი განსაკუთრებული როლი დავით ბაქრაძის უწყებას მიუძღვის და დიდი მადლობა მას ამისთვის" – განაცხადა შეხვედრაზე ქალაქ ოზურგეთის მერმა ბეგლარ სიორიძემ.
შეხვედრა ანსამბლ "ვახტანგურის" მიერ შესრულებული გურული კრიმანჭულით დასრულდა.
საზოგადოებასთან შეხვედრის შემდეგ მინისტრმა და გურიის ოთხივე მუნიციპალიტეტის პირველმა პირებმა გურიის სამხარეო ადმინისტრაციაში გადაინაცვლეს, სადაც დავით ბაქრაძემ საქართველოს პოლიტიკაზე ევროპასთან დაკავშირებით, მიმდინარე პროცესებსა და სამომავლო გეგმებზე ისაუბრა.
(R)
