"რატომ მაშინ არ შეაგინეს მურუსიძეს, მეორე ვადით რომ აირჩიეს?! მაგრამ ახლა იმიტომ აგინებენ, რომ აღარ ემორჩილება მათ", _ ეს განცხადება ყოფილმა პრემიერ-მინისტრმა ბიძინა ივანიშვილმა ტელევიზიის ჟურნალისტებთან შეხვედრისას გააკეთა.
ივანიშვილმა იუსტიციის უმაღლესი საბჭოს მდივნის, ლევან მურუსიძის არჩევის საკითხზე ისაუბრა და აღნიშნა, რომ ეს სპეციალურად, „ნაციონალური მოძრაობის“ მიერ აგორებული თემაა.
" – ეს თემა, "ნაციონალური მოძრაობის" აწეულია. მათ რიცხვში პრეზიდენტიც ხშირად მათ წისქვილზე ასხამს წყალს, არ მგონია მათი კაცი იყოს, მგონია, რომ მათგანაც გამოუყენებელია. მაგრამ ბევრი ჩაერთო შემთხვევით ამ საკითხში და ბევრმა დაასხა იმ წისქვილზე წყალი. თემა მათი აწეული იყო და რატომ? ეს ხელწერა მათია. რატომ მაშინ არ აგინებდნენ, მეორე თანამდებობა რომ მისცეს?! – ალბათ იმიტომ, რომ მათ აღარ ემორჩილება. ახლა წარმოაჩინეს, რომ ყველაფერი ლევან მურუსიძემ გააკეთა და არა იმ სისტემამ, რომელიც მათივე შექმნილი იყო. ეს გუნდი ედავება მას, ვისი მსხვერპლიც იყო სასამართლოც და მურუსიძეც", _ დასძინა ბიძინა ივანიშვილმა.
მისივე თქმით, „ყველაზე დიდი ტრაგიზმი გირგვლიანის თემა იყო, თუმცა წინა ხელისუფლებამ სხვა მკვლელობებიც მოახერხა“.
"მაგრამ გირგვლიანის საქმეზე 6 თვის მოკლება აღარ არის საკამათო. ის, რომ მურუსიძე 2013 წლის ოქტომბერში მეორე პირად აირჩიეს საერთო სასამართლოში გაგიგიათ რაიმე ხმაური, იგივე NGO-ებისგან, რუსთავი 2-სგან, „ნაციონალური მოძრაობისგან“?! 3 წლით უგრძელებენ თანამდებობას, არავითარი ხმაური. არანაირი თანამდებობა მას „ნაციონალური მოძრაობის“ მმართველობის დროს არ ჰქონდა. თუმცა, კუბლაშვილმა მოახერხა, რომ ის აერჩიათ. მე ვეახლე კუბლაშვილს, შევხვდი და ვთხოვე, როგორმე გათავისუფლდი ძველი გუნდის წნეხისგან. არ იფიქრო, რომ ახალი ხელისუფლება დახმარების გარდა რამეს გთხოვს, რამეში ჩაერევა, რაც დავიცავით კიდეც პირუთვნელად. თუმცა, იმ ერთი წლის განმავლობაში თქვენც შეგიძლიათ ნახოთ როგორ ექცეოდნენ პროკურატურას, ძალიან მძიმე დამნაშავეების დასჯის უფლებასაც არ აძლევდნენ. მივხვდი რომ კუბლაშვილისგან არაფერი გამოვიდოდა. ისევ ჩემი ინიციატივით შევხვდი ახლადარჩეულს ფინანსთან მინისტრთან ერთად, არავითარი ხმაური მაშინაც არ ყოფილა", _ აღნიშნა ყოფილმა პრემიერმა.
ივანიშვილმა ლევან მურუსიძის არჩევისას ადვოკატთა ასოციაციის თავმჯდომარისა და გიორგი მარგველაშვილის როლზეც ისაუბრა და აღნიშნა,რომ ”ადვოკატთა ასოციაციის თავმჯდომარემ პრეზიდენტს მიმართა არ დაენიშნა მურუსიძე".
”ადვოკატთა ასოციაციის თავმჯდომარე მიმართავს პრეზიდენტს, რომ არ დაუშვას რომელიმე მოსამართლის არჩევა. გესმით, როგორი ამბავია?! ვინ ჰკითხავს პრეზიდენტს ვის აირჩევს სასამართლო? თანაც ნახეთ ვინ მიმართავს, ადვოკატთა ასოციაციის თავმჯდომარე. აბა, ნახეთ როგორია, პრეზიდენტიც ცდილობს, რომ არ დაუშვას. ნახეთ რამდენ შეცდომას უშვებს. აბა, ნახეთ ადვოკატურა რა დღშია, ადვოკატთა ასოციაციის თავმჯდომარე მიმართავს პრეზიდენტს, არ დაუშვას რომელიღაც მოსამართლის არჩევა. და პრეზიდენტიც როგორ ცდილობს რომ არ დაუშვას?! ნახეთ, რამდენ შეცდომას უშვებს, აბსოლუტურად შეუთავსებელს კანონმდებლობასთან. ახლა სხვა პოლიტიკოსებს აღარ ჩამოვთვლი", _ აღნიშნა ივანიშვილმა.
