"ამ სამი წლის განმავლობაში მე რაც დავინახე, მიზანმიმართულად შექმნილი კრიზისი იყო, რამაც გამოიწვია სასამართლოებში 300-დან 800 საქმემდე ასვლა. დღეს ზოგიერთ მოსამართლეს სწორედ 800 საქმე აწერია", _ ამის შესახებ თბილისის საქალაქო სასამართლოს ყოფილი თავმჯდომარე მამუკა ახვლედიანი "გურია ნიუსთან" ინტერვიუში საუბრობს.
"2012 წელს, ბევრი სასამართლო სისტემიდან და ქვეყნიდან რომ გარბოდა, მაშინ ჩავთვალე, რომ შეიძლებოდა სასამართლოს დამოუკიდებლობისთვის ბრძოლა, თუ ამას სასამართლო ხელისუფლება სწორად გამოიყენებდა, მაგრამ პირიქით მოხდა. დაამახინჯეს ეს ფორმები და სათავისოდ გამოიყენეს ეს პროცესები და არა სასამართლო სისტემისთვის. დღეს რაც ხდება სასამართლო სისტემაში სწორედ არასწორი რეფორმის შედეგია.
ამ სამი წლის განმავლობაში მე რაც დავინახე, მიზანმიმართულად შექმნილი კრიზისი იყო, რამაც გამოიწვია სასამართლოებში 300-დან 800 საქმემდე ასვლა. დღეს ზოგიერთ მოსამართლეს სწორედ 800 საქმე აწერია. ეს არის ხელოვნური კრიზისი. აგიხსნით რამ გამოიწვია და რა გააკეთა საბჭომ. ისინი ძველ მოსამართლეებს ეუბნებოდნენ, რომ აგვირჩიეთ ჩვენ და დაგნიშნავთ თქვენო. მე ვიყავი იუსტიციის უმაღლესი სკოლის სამეთვალყურეო საბჭოს თავმჯდომარე, კატეგორიულად ვითხოვდი, რომ ხალხი გამოეშვათ სასწავლებლად და სწავლების კურსი გაგვეზარდა. ვფიქრობდი, რომ ათეულობით კი არა, ასეულობით ადამიანს უნდა ესწავლა ამ სკოლაში, შეგვექმნა ბაზა, რომლითაც სასამართლო კორპუსი გადახალისდებოდა, შეემატებოდა სისტემას და ა.შ. დღეს, თვითონ საბჭოს გათვლებით 200 მოსამართლე აკლია სასამართლო სისტემას და გვაქვს კრიზისი.
ივნისის ბოლომდე, თუ არ ვცდები, 50 მოსამართლეს ეწურება ვადა, წლის ბოლომდე კიდევ მეტს, დაახლოებით, 100-მდე. საიდან უნდა შეივსოს ეს დანაკლისი? ახლა თუ არ დავნიშნეთ ის მოსამართლეები, ჩავთვალოთ, 800 საქმე რომ მოსამართლეს აწერია, გაჭიანურდება ეს პროცესი და ძალიან ცუდი სიტუაცია შეიქმნება სისტემაში. ამით აპელირებენ სწორედ და უნდათ მათთვის სასურველი მოსამართლეები გადანიშნონ პირდაპირ, იშვიათი გამონაკლისების გარდა. ფაქტიურად, აშანტაჟებენ საზოგადოებას, თუ ამას არ გავაკეთებთ, თქვენი საქმეები უახლოეს წლები არ განიხილება, რადგან მოსამართლე არ ჰყავს. დღეს არავინ არ სწავლობს იუსტიციის უმაღლეს სკოლაში. ამ წლებში ჯამში, ალბათ, 20-30-მა ადამიანმა დაამთავრა. 30-ვე, რა თქმა უნდა, არ მოხვდა სასამართლო სისტემაში", _ აღნიშნავს ახვლედიანი.
მისივე თქმით, შემდეგი ეტაპი სასამართლო სისტემაში "სასურველი კანდიდატების" მოყვანა იქნება.
"ამის მერე რა პროექტს დაიწყებენ იცით? – წინასაარჩევნოდ, ალბათ, ამას ვერ გაბედავენ, მაგრამ აუცილებლად იტყვიან, რად გვინდა მოსამართლეთა სკოლა, ვისაც აქვს 10-წლიანი გამოცდილების ვადა, ყოველგვარი სწავლების და შეფასების გარეშე პირდაპირ მოიყვანონ თავიანთი კანდიდატები და დანიშნონ სასამართლო სისტემაში. ამის დაწყება უნდათ. აბა, როგორ შეავსებენ იმ 200 ადამიანს, თუ სკოლაში არ ასწავლიან? ამის ალტერნატივა, უბრალოდ არ არსებობს. ან ყოფილი მოსამართლე უნდა იყოს, ან ამ სკოლაში ისწავლოს, რომ შემდგომ მოსამართლედ დაინიშნოს. ძველ მოსამართლეებს დატოვებენ სისტემაში და ვინც უნდათ იმას მოიყვანენ ყოველგვარი სწავლების გარეშე. ალბათ, იმით შეაფასებენ მათ ცოდნას, ტელევიზორში ვინ რამდენი ხანი ჩანს. ალბათ განაწილდება ისე, რომ 12 კაცი ვიღაცის იქნება, 7 ვიღაცის, სამი ვიღაცის და ა.შ. რაოდენობით ივაჭრებენ, სახელებს და გვარებსაც კი არ ექნება მნიშვნელობა", _ ამბობს ახვლედიანი.
ვინ არიან სასამართლო სისტემის "გენერლები" და "პოლკოვნიკები", ვინ მართავს დღეს მოსამართლეებს, რა როლი აქვს მართვაში ნინო გვენეტაძეს, რატომ ტიროდნენ მოსამართლეები ახვლედიანის კაბინეტში და როგორ აპირებს არასამთავრობო სექტორიდან სისტემაში მიმდინარე მოვლენების კონტროლს, _ ამ საკითხებზე "გურია ნიუსი" თბილისის საქალაქო სასამართლოს ყოფილ თავმჯდომარესთან, მამუკა ახვლედიანთან ინტერვიუს მოგვიანებით შემოგთავაზებთ.
