დღეს, ლანჩხუთის სპორტულ ცენტრში ახალი დირექტორის წარდგენა იგეგმება. "გურია ნიუსის" ინფორმაციით, ამ თანამდებობას დღეიდან გაგა იმნაიშვილი დაიკავებს, რომელიც ამ პოსტზე მინდია დვალიშვილს ჩაანაცვლებს.
გაგა იმნაიშვილი სახელმწიფო სამსახურში 2012 წლის არჩევნების შემდეგ გამოჩნდა, იგი ამ პერიოდიდან მაჩხვარეთის ადმინისტრაციაში გამგებლის წარმომადგენლი იყო. მანამდე კი იმნაიშვილი სპორტით იყო დაკავებული და საფეხბურთო კლუბ ლანჩხუთის "გურიას" ღირსებას იცავდა. როგორც ამბობენ იმნაიშვილს უმაღლესი განათლება არ აქვს მიღებული.
ინფორმაციის გადამოწმების მიზნით, "გურია ნიუსი" გაგა იმნაიშვილს დაუკავშირდა, თუმცა, მან მოუცლელობა მოიმიზეზა და ტელეფონი გაგვითიშა.
"ჯერ არ მცალია, ძალიან დაკავებული, ვარ, მოგვიანებით თავად გადმოგირეკავთ", _ დაგვპირდა იმნაიშვილი და ტელეფონი გათიშა.
რაც შეეხება დვალიშვილს, იგი საკმაოდ წარმატებულ მენეჯერადაც მიიჩნეოდა და ბევრისთვის გაუგებარი დარჩა, რა გახდა რეალური მიზეზი მისი თანამდებობიდან წასვლის. ოფიციალური ინფორმაციით, დვალიშვილმა სპორტული ცენტრის დირექტორობა საკუთარი განცხადების საფუძველზე დატოვა, თუმცა კულუარებში საუბრობენ, რომ მან ეს ნაბიჯი უშუალოდ გამგებლის მოთხოვნით გადადგა.
დვალიშვილის თქმით, მან თანამდებობა საკუთარი განცხადების საფუძველზე დატოვა და გამგებლის მხიდან ამასთან დაკავშირებით არანაირი მოთხოვნა არ ყოფილა.
კომენტარისთვის დაკავშირება გამგებელთანაც ვცადეთ, თუმცა, მან ამჯერადაც ჩვენი სატელეფონო ზარი რეაგირების გარეშე დატოვა.
