აჭარის უმაღლესი საბჭოს წევრის მედეა ვასაძის ინფორმაციით, აჭარის ავტონომიური რესპუბლიკის მთავრობის ხელმძღვანელი არჩილ ხაბაძე თანამდებობიდან გადადგა.
რატომ დატოვა თანამდებობა ხაბაძემ, იყო თუ არა ის "ნაციონალური მოძრაობის" მხარდამჭერი, რა საქმეებს უწუნებს ვასაძე და ვინ შეცვლის აჭარის მთავრობის მეთაურს, ამ საკითხებზე "გურია ნიუსი" მედეა ვასაძესთან ჩაწერილ ინტერვიუს უცვლელად გთავაზობთ.
_ქალბატონო მედეა, ცოტა ხნის წინ განაცხადეთ, რომ არჩილ ხაბაძემ თანამდებობა დატოვა. რამდენად დადასტურებული ინფორმაცია გაქვთ?
_გარკვეული კომუნიკაცია მქონდა მასთან და დამიდასტურა, რომ წასული ვარ რეალურადო. "ქართული ოცნების" უმაღლესი საბჭოს წევრებისგან ვიცი, რომ 6 თუ არა 7-ში აუცილებლად უნდა დაწეროს განცხადება. ახალ კანდიდატურაზე მიდის შეხვედრები და კონსულტაციები. პრაქტიკულად, ვფიქრობ, რომ 7-ში დაიწერება განცხადება, არ ვიცი შეიძლება სიტყვიერადაც გაკეთდეს ეს განცხადება. ვიცი, რომ უნდა გაკეთდეს.
_ვინ არის თქვენი ინფორმაციით ახალი კანდიდატი?
_ახალი კანდიდატურა გახლავთ ყაზახეთში საქართველოს სრულუფლებიანი ელჩი ბატონი ზურაბ პატარაძე.
_ვრცელდება ინფორმაცია, რომ ხაბაძის გადადგომა აჭარაში ლევან ვარშალომიძის დაბრუნებას მოყვა. რამდენად უკავშირებთ ამ ორ ფაქტს ერთმანეთს?
_ ვარშალომიძის ჩამოსვლა კი, სწორია, რომ ერთი კვირით ადრე იყო გაცხადებული რეალურად, მაგრამ ხაბაძის გადაყენება, თუ გადადგომა, რადგან იურიდიულად მისი განცხადებით მიდის, არა მგონია, ერთმანეთს უკავშირდებოდეს. ძალიან ბევრი საკითხი იყო დაგროვილი საიმისოდ, რომ ამ ადამიანის მუშაობა შეფასებულიყო და საარჩევნოდ მისი მოსახლეობაში გასვლა და ამომრჩეველთან შეხვედრა მიზანშეუწონლად მიიჩნიეს და გადააყენეს. ანუ მოხდა ის, რასაც ჩვენ ვამბობდით ორი წლით ადრე.
_გადააყენეს თუ გადადაგა?
_ასეთი თანამდებობიდან თავისი სურვილით და ნებით ძალიან იშვიათად მიდიან ადამიანები. რა თქმა უნდა, უთხრეს უნდა წახვიდეო და მიდის. თქვენ იცით, რომ ერთი წლის წინ ის ამბობდა, მომავალი 4 წელი იქნება ან მთავრობის თავმჯდომარე ან საბჭოს წევრი. ასეთი იყო მისი განწყობა. ახლა ასეთი რეალობის წინაშე ვდგევართ.
_ხომ არ გაქვთ ინფორმაცია სად მიდის ხაბაძე?
_მოარული აზრები არის, რომ შეიძლება საქართველოს პარლამენტის სიაში ჩაიწეროს, მაგრამ არა მგონია, ეს გამსვლელი ნომერი იყოს. ამავე დროს ამბობენ, რომ შეიძლება ბატონმა ბიძინამ წაიყვანოს თავის ბიზნეს ჯგუფებში, სადღაც რაღაც ადგილი გამოუნახოს.
_ანუ "ქართულ ოცნებას" არ ტოვებს?
_მე ვიცი, რომ მთავრობის თავმჯდომარის პოსტს ტოვებს და დანარჩენზე ვერც გეტყვით და არც მაინტერესებს.
_ხაბაძის თანამდებობიდან შესაძლო წასვლასთან დაკავშირებით განცხადებები ადრეც ვრცელდებოდა. კრიტიკულად იყვნენ ოპონენტები მის მიმართ განწყობილი. შეგიძლიათ გვითხრათ რამდენიმე საქმე მაინც რაშიც ხაბაძეს არ ეთანხმებოდით?
_მე ზოგადად, მუდმივ წინააღმდეგობაში ვიყავი მის მიერ მიღებულ გადაწყვეტილებებთან. მასთან პიროვნულად რაიმე კონფრონტაციაში არ შევსულვარ, მაგრამ გადაწყვეტილებებს ღებულობდა სრულიად დაუსაბუთებელს და არაგონივრულს. ნეპოტიზმის ძალიან სერიოზული ფაქტები იყო, შემცირდა ინვესტიციები. რეალურად რისი გახსნაც ახლა ხდება ეს არის ძველი პროექტები. მოგეხსენებათ,უმაღლეს საბჭოსთან მისი კონფრონტაციული დამოკიდებულება, წერილებზე პასუხის გაუცემლობა, უსკოს არჩევნები ჩიხში შეიყვანა. რეალურად, "ქართული ოცნება" დაშალა უმაღლეს საბჭოში. ზოგადად, არაოპერატიული აზროვნებით ხასიათდებოდა. პატარა ბავშვივით იყო, ყველაფერი სწყინდა; რა უხაროდა არ ვიცოდით. ვერ ვხვდებოდით ვერაფერს. მოკლედ, სრულიად უცხო გარემოში აღმოჩნდა ადამიანი, აბსოლუტურად არ იცოდა მებრძოლი ადამიანების პატივისცემა, წარსულის პატივისცემა. დაკავებული იყო სულ იმით, რომ სადღაც რაღაც… ასე იშლებოდა "ქართული ოცნება", რადგან შეუთავსებლობა ჰქონდა სულით მებრძოლ ადამიანებთან. ანგარიშს ვერ უწევდა იმას, რომ ხელისუფლება რომელიც დადგა ჩვენი საშუალებით, ჩვენი მეშვეობით, რა თქმა უნდა, გარკვეული, მაგალითად, ბიძინა ივანიშვილის მხარდაჭერით თუ გადაწყვეტილებით, ის ანგარიშს სრულიად არ უწევდა რეალურ ვითარებას. 5-იანი შემოხაზა და მერე აღმოჩნდა 2012 წლის 26 ოქტომბერს პოლიტიკური თანამდებობაზე ისე, რომ ერთი მხარდამჭერი განცხადება არ ჰქონდა გაკეთებული "ქართული ოცნებისთვის" და "ნაციონალებში" ეძებდა სამუშაო ადგილს არჩევნების შემდეგ.
_ხაბაძე არჩევნების დროს "ნაციონალურ მოძრაობას უჭერდა მხარს?
_ კი, კი, 5-იანი ჰქონდა შემოხაზული. მამამისი ვარშალომიძესთან დაახლოებული პირი იყო. მამა გახლავთ ერთ-ერთი მაღალჩინოსანი ეკონომიკისა და ფინანსთა სამინისტროში. აჭარის საწარმოთა მართვის მთელი ბერკეტები მამამისს ეჭირა სადავეები და დღესაც ასეა. ეს კაცი ვერ გავათავისუფლებინეთ დაკავებული თანამდებობიდან რაღაც გარკვეული სალაპალარაკო თემა და უხერხულობები რომ მოხსნილიყო. ახალი თავმჯდომარის პირობებში ალბათ დავაყენებთ ამ საკითხს. რასაკვირველია, "ნაციონალურ მოძრაობასთან" დაახლოებული პირია. ფინანსთა სამინისტროში არცერთი მაღალჩინოსანი არ შეცვლილა. მინისტრი მოიყვანა ბატონი დავით ბალაძე, რომელიც ღიად გვიპირისპირდებოდა თავშივე და ზოგადად გახლდათ ერთ-ერთი სამშენებლო კომპანიის ფინანსური მენეჯერი, რომელიც კურირებდა "ნაციონალებსა" და ამ სამშენებლო კომპანიას შორის ე.წ. ფინანსურ ურთიერთობებს შემოწირულობების სახით.
_ხომ არ გაქვთ ინფორმაცია ამჟამად სად იმყოფება ხაბაძე?
_რა მოგახსენოთ. კაბინეტში ზის ალბათ. გვიანობამდე სინათლე უნთია, არ ვიცი ტოვებს თუ მუშაობს, ნამუშევარს შედეგის მიხედვით ვერაფერს ვერ ვხედავთ.
"გურია ნიუსი" არჩილ ხაბაძესთან დაკავშირებასაც ცდილობს. მის პოზიციას აღნიშნულთან დაკავშირებით, მოგვიანებით შემოგთავაზებთ.
