გარდაბნის მუნიციპალიტეტის სოფელ კუმისში უცნაურ მამაკაცს, რომელიც სოფლის მოსახლეობას აშინებს ისევ ეძებენ. სოფელში გაძლიერებულია პოლიციის პატრულირება. მოსახლეობის ნაწილი კი დროებით გაიხიზნა.
რა ვითარებაა ამ დროისთვის კუმისში, იყო თუ არა სოფელში წუხელ სპეცრაზმი და რა ინფორმაციას ფლობს კუმისის გამგებელი, "გურია ნიუსი" ამ საკითხებზე გარდაბნის მუნიციპალიტეტის გამგებლის წარმომადგენელს სოფელ კუმისში ლევან ბეგლარიშვილს ესაუბრა.
_ბატონო ლევან, რამდენი ხანია რაც სოფელში უცნაური მამაკაცი გამოჩდა?
_დაახლოებით, 10 დღეა. მის მერე პოლიცია და ადგილობრივები სოფელში 24 საათის განმავლობაში პატრულირებენ.
_გუშინ ერთ-ერთ სატელევიზიო არხთან კომენტარისას განაცხადეთ, რომ მოსახლეობის მონაყოლის დაჯერება გიჭირთ…
_როგორ ვიტყოდი იმას, რომ არ მჯერა რაც სოფელში ხდება. მოსახლეობასთან და პოლიციასთან ერთად ვპატრულირებთ. მაგ სიტყვებს როგორ ვიტყოდი?! რომ არ მჯეროდეს პოლიციასთან ერთად არ გავიდოდი.
_რაიმე საფრთხეს ხედავთ ახლა კუმისში?
_საფრთხეზე რა გითხრათ, არავისთვის არაფერი დაუშავებია. საფრთხე რა არის?!
_გვაქვს ინფორმაცია, რომ წუხელ სოფელში სპეცრაზმი იყო შემოსული; შეესაბამება თუ არა ეს ინფორმაცია სიმართლეს?
_სპეცრაზმი არა, მაგრამ პოლიციის თანამშრომლები იყვნენ ძალიან ბევრი და ახლაც მუშაობენ; ერთად ვმუშაობთ.
_ახლაც ადგილზე იმყოფებიან პოლიციის თანამშრომლები?
_კი, კი, ახლაც პოლიციასთან ერთად ვარ.
_ხომ არ არის სოფელში ფსიქიური პრობლემების მქონე პირი, რომელსაც შეუძლია მსგავსი რამ გააკეთოს?
_ ეგეთი სოფელში არავინ არ არის. პოლიცია და ჩვენ მოსახლეობის გვერდზე ვართ რომ როგორმე ვიპოვოთ. პოლიცია მთელი ძალებითაა ჩართული.
_გვაქვს ინფორმაცია, რომ რამდენიმე ოჯახი დროებით გაიხიზნა სოფლიდან. თქვენ თუ გაქვთ ეს ინფორმაცია?
_გახიზვნის რა გითხრათ, თუ ვინმემ ცოლ-შვილი წაიყვანა დასასვენებლად, შეიძლება მაგაზე იძახიან.
_ჩვენ ვსაუბრობთ იმ ოჯახებზე, რომლებმაც თავად ნახეს უცხო ადამიანი მათ სახლში…
_არ ვიცი, ყველა ის მოსახლე გამოვკითხეთ. მიტოვებულ სახლებსაც ვათვალიერებთ. ყველანაირად მობილიზებულები ვართ.
_ბევრია სოფელში ასეთი მიტოვებული სახლები?
_არის კი. დღეც ვამოწმებთ და ღამეც.
_ადგილობრივებს, რომლებმაც ნახეს ეს პირი, ესაუბრეთ?
_ კი, ყველას ვესაბრეთ. პოლიცია ცალკე გამოკითხვებს აკეთებს. ამ ოჯახებთან პატრულირებენ კიდეც.
_დაახლოებით, ასეთი რამდენი ოჯახია?
_5-6 ოჯახია, მეტი არა.
ამავე თემაზე:
ამოუცნობი მოვლენა სოფელ კუმისში – მოსახლეობა დახმარებას ითხოვს
