ლანჩხუთის გამგეობის ინფრასტრუქტურისა და არქიტექტურის სამსახურის უფროსის, ლევან ჩხაიძის ინფორმაციით, ზიანი, რომელიც გასული კვირის ბოლოს გადაუღებელი ძლიერი წვიმის შედეგად ლანჩხუთის მუნიციპალიტეტს მიადგა აღრიცხულია და ზარალის ოდენობამ დაახლოებით მილიონ 600 ათასი ლარი შეადგინა. ჩხაიძისვე თქმით, მონაცემები ინფრასტრუქტურის სამინისტროშია გადაგზავნილი შემდგომი რეაგირებისთვის.
საგულისხმოა, რომ რვა ივლისის ძლიერი წვიმის შედეგად არაერთ სოფელში დაიტბორა ოჯახები, დაზიანდა შიდა სასოფლო გზები, ხიდები და მილხიდები. ასევე ზარალი მიადგა საყანე ფართობებსაც.
შექმნილი სიტუაციიდან გამომდინარე რვა ივლისს, ღამის საათებში ლანჩხუთში მუშაობა განაახლა საგანგებო შტაბმა გამგებლის მოადგილის ნუგზარ ცინცაძის ხელმძღვანელობით.
უამინდობის გამო მუნიციპალიტეტის ზოგ ტერიტორიაზე გაითიშა სატელევიზიო ანტენები, ინტერნეტი. ჭექა-ქუხილმა არაერთ ოჯახში ასევე ძვირადღირებული საყოფაცხოვრებო ტექნიკა მწყობრიდან გამოიყვანა. სოფლების ნაწილს მცირე ხნით შეუწყდა ელექტროენერგიის მიწოდება, თუმცა ამ კუთხით ხარვეზების აღმოფხვრა დროულად მოხერხდა. მუნიციპალიტეტის სოფლების ძირითად ნაწილში მილხიდები დაზიანდა. განსაკუთრებით საშიში მდგომარეობა შეიქმნა სოფელ აცანაში, სადაც ძლიერი წვიმის შედეგად ვაზგენ ჩხაიძის სახლთან მეწყერი ჩამოწვა და გარესამყაროს ექვსი ოჯახი მოწყვიტა. აცანაშივე ე.წ. "მერვე ბრიგადისკენ" მიმავალი გზა მნიშვნელოვნად დაზიანდა. ადგილზე გეოლოგები მუშაობენ და ამ ეტაპზე ნიადაგის შესწავლა მიმდინარეობს. გზის ამ მონაკვეთზე გაწმენდითი სამუშაოები რამდენიმე დღეში დაიწყება.
ასევე რთული მდგომარეობა შეიქმნა სოფელ მამათშიც, სადაც ოზურგეთთან დამაკავშირებელი გზა დაიმეწყრა. 70-მდე ოჯახი კი რაიონულ ცენტრთან დაკავშირებას ვერ ახერხებს.საკმაოდ რთული ვითარებაა მამათში. დამეწყრილია ოზურგეთთან დამაკავშირებელი გზა. 70 ოჯახი რაიონულ ცენტრს ვერ უკავშირდება, ადგილზე შესაბამისი გაწმენდითი სამუშაოები ხორციელდება.
ადგილობრივთა ინფორმაციით, ნიაღვარმა დააზიანა ცენტრალური აკეთის გზა, რომელიც მანამდეც არ იყო სახარბიელო მდგომარეობაში. ასევე ჩაიხერგა ორაგვის გზა. სოფელ ნინოშვილში კი ნიაღვარმა სამეურნეო ნაგებობები წაიღო და საფრთხე შეექმა საცხოვრებელ სახლებსაც.
ძლიერი წვიმის შედეგად დაგროვილმა უხვმა ნალექმა ნიგვზიანში მოსახლეობის ეზოებისა და საცხოვრებელი სახლების დაიტბორვა გამოიწვია. ასევე სტიქიის შედეგად სერიოზული ზიანი მიადგა ჩოჩხათის ადმინისტრაციული ერთეულსაც.
უხვი ნალექის გამო წყალი იდგა ქალაქის არაერთ ქუჩაზეც, მათ შორის ცენტრალურ სკვერში, რაც გადაადგილებას მნიშვნელოვნად აფერხებდა, თუმცა ინფრასტრუქტურულ ზარალს აქ ადგილი არ ქონია.
