გუშინ, "ქართული ოცნება-დემოკრატიული საქართველოს" პოლიტსაბჭოს სხდომაზე, გურიის კანდიდატებზე იმსჯელეს. ამის შესახებ ინფორმაცია პოლისტაბჭოს წევრმა მამუკა მდინარაძემ დაადასტურა, თუმცა, მათი ვინაობა არ დაუსახელებია.
"გურია ნიუსმა" კი გაარკვია, რომ ოზურგეთის საარჩევნო ოლქში, მმართველი პარტია, შინაგან საქმეთა მინისტრის მოადგილეს, არჩილ თალაკვაძეს წარადგენს.
აღნიშნულ ინფორმაციას "ქართული ოცნების" პრესსამსახურში არ ადასტურებენ. კომენტარს არც თალაკვაძე აკეთებს და არც პოლიტსაბჭოს წევრები.
თუმცა, ჩვენს მიერ მოპოვებული ექსკლუზიური ინფორმაციით თალაკვაძის კანდიდატად დაყენება საბოლოოდ გადაწყდა და მას 26 ივლისს, ოზურგეთში, პრემიერ-მინისტრი წარადგენს.
არჩილ თალაკვაძე 1983 წლის 16 იანვარს ოზურგეთში დაიბადა. დაამთავრა ოზურგეთის #1 საჯარო სკოლა. 2000-2006 წლებში თბილისის სახელმწიფო სამედიცინო უნივერსიტეტში, მედიცინის ფაკულტეტზე სწავლობდა;
2010 წელს, საქართველოს საზოგადოებრივ საქმეთა ინსტიტუტში (GIPA), საზოგადოებრივი ჯანდაცვის პოლიტიკის და მენეჯმენტის პროგრამა შეისწავლა.
მისი სამუშაო გამოციდილება ასე გამოიყურება:
2006-2007 წწ. – აშშ საერთაშორისო განვითარების სააგენტოს (USAID) ქალთა ჯანმრთელობის პროგრამა, პროექტის კოორდინატორი;
2007 წ. – ფონდი „ღია საზოგადოება საქართველო", ადამიანის უფლებათა დაცვის მონიტორინგის პროექტის მენეჯერი;
2008-2009 წწ. – საქართველოს სახალხო დამცველის მრჩეველი;
2009-2011 წწ. – საქართველოს სახალხო დამცველის თანაშემწე მენეჯმენტის საკითხებში;
2011-2012 წწ. – აშშ საერთაშორისო განვითარების სააგენტოს (USAID) დემოკრატიული მმართველობის პროგრამა, დირექტორის მოადგილე;
2012-2014 წწ. – საქართველოს სასჯელაღსრულებისა და პრობაციის მინისტრის მოადგილე;
2014 წ. დეკემბრიდან – საქართველოს შინაგან საქმეთა მინისტრის მოადგილე;
არჩილ თალაკვაძე 2012 წლიდან შიდსის, ტუბერკულოზის და მალარიის წინააღმდეგ ეროვნული საკოორდინაციო მექანიზმის წევრია; 2012-2015 წლებში იყო გლობალური ფონდის აღმოსავლეთ ევროპისა და ცენტრალური აზიის დელეგაციის კოორდინტორი; ხოლო 2015 წლიდან- გლობალური ფონდის სამეთვალყურეო საბჭოს წევრი აღმოსავლეთ ევროპისა და ცენტრალური აზიის ქვოტით.
