ქალაქ ოზურგეთში, აპოლონ წულაძისა და გიორგი ჭანტურიას ქუჩებს შორის მდებარე 9 აპრილის პარკში საავტომობილო გზის გაყვანა ამ დრომდე განხილვის თემაა.
ქალაქის მერის, ბეგლარ სიორიძის მტკიცებით, გზის გაყვანა საგზაო მოძრაობის უსაფრთხოებას გაზრდის და მოძრაობის განტვირთვას შეუწყობს ხელს.
მოქალაქეების ნაწილი კი მიიჩნევს, რომ სარეკრეაციო ზონაში გზის გაყვანა კანონის დარღვევაა და სიორიძეს მშენებლობის შეწყვეტასა და პარკის აღდგენას სთხოვენ.
სწორედ ამ საკითხზე, ოზურგეთის დემოკრატიული ჩართულობის ცენტრის ორგანიზებით, 16 აგვისტოს, სამშაბათს დისკუსია გაიმართა, რომელსაც ყველა მხარე ესწრებოდა.
პრესკონფერენციის მეორე დღეს გაიმართა დისკუსია, რომელსაც, როგორც დაანონსებული იყო, ქალაქის მერიც უნდა დასწრებოდა, თუმცა, როგორც შეხვედრაზე მერიის პრესსამსახურის ხელმძღვანელმა ხათუნა შარაძემ განმარტა, ბეგლარ სიორიძე „ქართული ოცნების“ ცენტრალურ ოფისში დაიბარეს და შეხვედრას მხოლოდ ამ მიზეზით ვერ დაესწრო.
დისკუსიის მონაწილეებს მერის წერილობითი პოზიცია ხათუნა შარაძემ გააცნო:
“საზოგადოების გარკვეული წრის მაღალი ინტერესიდან გამომდინარე, მინდა კიდევ ერთხელ განვმარტო ვითარება და ყველა დეტალი, რომელიც შესაძლოა დაინტერესებულ პირთათვის მნიშვნელოვანი იყოს.
კიდევ ერთხელ ვამბობ, რომ პროექტის დამტკიცება და განხორციელება კანონის სრული დაცვით მოხდა.
არასამთავრობო სექტორს და დაინტერესებულ მოქალაქეებს მინდა მადლობა გადავუხადო აქტიურობისთვის, ქალაქის გულშემატკივრობისთვის, რომელიც თითოეულ ჩვენგანს ეკუთვნის. იმედი მაქვს, არასამთავრობო ორგანიზაციების წარმომადგენლები ვითარებას სწორად შეაფასებენ, სამომავლოდ კი ადგილობრივ ხელისუფლებასთან უფრო დროულად ითანამშრომლებენ, განსხვავებით ამ შემთხვევისგან, როცა მათი პროტესტი სკვერში სამუშაოების დაწყების შემდეგ დაიწყო. მერწმუნეთ, ყველა ინიციატივა, რომელსაც ვახორციელებთ, გამჭვირვალეა და თუ რომელიმე მათგანზე განსხვავებული აზრი გექნებათ, ჯობს, ამის შესახებ დროულად გვაცნობოთ, რათა სამომავლოდ ერთობლივად ვიმსჯელოთ.
აღნიშნული ინიციატივა მომზადდა პროექტის სახით და 2016 წლის 11 თებერვალს წარედგინა საკრებულოს. არასწორია გავრცელებული მოსაზრება, თითქოს საკრებულოს წევრებმა ამის შესახებ არაფერი იცოდნენ. პროექტში, რომელსაც წარმოგიდგენთ, ნათლად წერია, რომ აღნიშნული ქუჩის რეაბილიტაცია მოხდებოდა სკვერის ხარჯზე. შესაბამისი სატენდერო დოკუმენტაცია 19 თებერვალს აიტვირთა და დღესაც დევს ინტერნეტში და არა მხოლოდ საკრებულოს წევრებს, არამედ ნებისმიერ დაინტერესებულ პირს შეეძლო ენახა“.
მერის წერილში ხაზგასმულია, რომ ქალაქის სივრცით-ტერიტორიული დაგეგმარებასა და განვითარებაზე, ასევე, ხსენებული ქუჩის ავტოტრანსპორტის მოძრაობის განტვირთვის შესახებ ოზურგეთელ არქიტექტორებთან შეხვედრაზე 6 აგვისტოს იმსჯელეს და საკითხი 2015 წლის დეკემბერში სამხარეო საკონსულტაციო საბჭოს სხდომაზეც განიხილეს:
„ვერ დავეთანხმები მოსაზრებას, თითქოს, სკვერი ნადგურდება. ხაზგასმით ვამბობ, რომ მას მოაკლდა მხოლოდ მცირე, არა მწვანე საფარიანი, არამედ ფილებდაგებული ნაწილი, ასევე, ტროტუარზე არსებული დეკორატიული მუხა, რომელიც გადარგული იქნა სხვა ტერიტორიაზე. სკვერს ჩაუტარდება რეკონსტრუქცია და თუ ამ სკვერით ჩვენი თანაქალაქელები ამ დრომდე ნაკლებად სარგებლობდნენ, ამიერიდან ის რეალურ ფუნქციას შეიძენს.
“როგორც ოზურგეთელები, ასევე, ქალაქის სტუმრები ვხედავთ, რომ აღნიშნულ ქუჩაზე, სავაჭრო ობიექტების სიმრავლის გამო, მუდმივად გადატვირთული მოძრაობაა. ბოლო პერიოდში დაფიქსირდა საგზაო მოძრაობის წესების 100-ზე მეტი დარღვევა და 4 მძიმე ავტოსაგზაო შემთხვევა. სწორედ ამიტომ გადაწყდა ორ პარალელურ ქუჩაზე ცალმხრივი მოძრაობის დაწესება. მათ დასაკავშირებლად კი საჭირო გახდა 9 აპრილის სახელობის სკვერის მცირე ნაწილის გამოყენება.
ნამდვილად ამაყი ვარ, რომ გვაქვს ქალაქი, რომელიც სკვერებისა და პარკების სიმრავლით გამოირჩევა. მიუხედავად იმისა, რომ ქალაქში მასშტაბური ინფრასტრუქტურული სამუშაოები მიმდინარეობს და იგება უამრავი გზა, მერწმუნეთ, თითოეულ ამ საქმეს აზრი დაეკარგება, თუ არ გვექნება სარეკრეაციო ზონები და სიმწვანე.
მას შემდეგ, რაც ქალაქის მერი გავხდი, ოზურგეთში გამწვანების საკითხებს განსაკუთრებული ყურადღება დავუთმე. დაირგო სხვადასხვა ჯიშის 300-ზე მეტი დეკორატიული მცენარე, გამწვანდა აღმაშენებლისა და ჭავჭავაძის ქუჩები და სადგურის მიმდებარე ტერიტორია. რეაბილიტაცია ჩაუტარდა კლდიაშვილის ქუჩაზე მდებარე სკვერს.
და ბოლოს, მივმართავ ოპოზიციურ პარტიებსა და საკრებულოს ოპოზიციონერ დეპუტატებს: მესმის, რომ ასეთი ხმაურიანი თემები თქვენთვის სახარბიელოა, გასაგებია, რომ ერთმანეთს ასწრებთ, რომელი უფრო მწვავედ გააპროტესტებთ ქალაქის მერის ‘’საშინელ გადაწყვეტილებას’’, მაგრამ გაიხსენეთ ზემოაღნიშნული 4 ავარია, მისი უსიამოვნო შედეგები და ნუ დაივიწყებთ, რომ ოზურგეთი მხოლოდ ბეგი სიორიძე არ არის და ჩემთან პოლიტიკური ბრძოლის მიზნით, ქალაქის პროგრესს ნუ დაუპირისპირდებით“, _ ნათქვამი იყო მერის განცხადებაში.
შეხვედრაზე მთავარი მომხსენებლები იყვნენ გელა კობალაძე, ქალაქ ოზურგეთის მუნიციპალიტეტის საკრებულოს თავმჯდომარე; თამაზ ტრაპაიძე, საქართველოს ახალგაზრდა იურისტთა ასოციაციის ოზურგეთის ოფისის ხელმძღვანელი და ლევან ხინთიბიძე, ა/ო „საქართველოს დემოკრატიული განვითარების კავშირის“ აღმასრულებელი დირექტორი.
გელა კობალაძის თქმით, პროექტი სრულყოფილია, რომელიც გასული წლის 26 ოქტომბერს საკრებულოს სხდომაზე განიხილეს:
“სხდომაზე იყო კითხვები და შესაბამისად, ყველა კითხვას გაეცა პასუხი. ეს პროექტი ხორციელდება სამინისტროს მიერ გამოყოფილი თანხით და სამინისტროს გვერდით გავლით ვინ ჩაიდენდა უკანონობას? ყველა საქმის კურსში და აქ არაფერი იყო დამალული“, _ თქვა გელა კობალაძემ.
თამაზ ტრაპაიძის თქმით, როდესაც მსგავს რამ კეთდება, საჭიროა საჯაროობის პრინციპების დაცვა:
_ განხილვა ორ ეტაპად, კანონის შესაბამისად უნდა მომხდარიყო _ პირველად ადმინისტრაციული წარმოებით, ხოლო შემდეგ საჯარო ადმინისტრაციული წარმოებით.
ფაქტობრივად, სკვერმა შეიცვალა ფუნქცია და მივიღეთ სატრანსპორტო დანიშნულების ქუჩა. ამას კი სჭირდებოდა შესაბამისი ნორმების დაცვა, რომელიც არ მომხდარა.“ – თქვა თამაზ ტრაპაიძემ.
ლევან ხინთიბიძემ თავის გამოსვლაში აღნიშნა პროცესს საჯაროობა აკლდა.
“არ მომხდარა მოქალაქეების ჩართულობა და ნაკლებად იყო ცნობილი, თუ რა კეთდებოდა იქ“, _ თქვა ლევან ხინთიბიძემ.
მთავარი მომხსენებლების შემდეგ შეხვედრის ორგანიზატორმა, გრიგოლ მახარაძეს სიტყვა “მმართველობითი სისტემების განვითარების ცენტრის“ დირექტორს, კოკა კიღურაძეს და საინიციატივო ჯგუფის წევრს ნათია ვაშალომიძეს მისცა.
გრიგოლ მახარაძის ამ გადაწყვეტილების დარბაზში მყოფი საზოგადოების ერთი ნაწილის პროტესტი მოყვა.
“აქ რატომ ვართ მოსული? თითქმის ერთი საათი გადის, ჩვენც გვაქვს სათქმელი“, _ გაისმა დარბაზიდან.
ვაშალომიძის თქმით, სკვერის შენარჩუნება ახლაც შესაძლებელია და ამისთვის არ არის საჭირო „ასფალტის აყრა, რომელიც ამ დღეებში ჩქარ ტემპში დაიგო“.
“აღნიშნული სივრცე უნდა გამოვიყენოთ მიზნობრივად, რომ ის ადგილი ბავშვებისთვის, მოხუცებისთვის და ყველასთვის მოსახერხებელი იყოს“, _ აღნიშნა ვაშალომიძემ, რომელსაც სიტყვა არ დაასრულებინა ქალაქ ოზურგეთის მერიის თანამშრომელმა, აბესალომ სარიშვილმა:
_ “შენ ნორმალური ხარ, შვილო? აქ იმიტომ მოვედი, რომ მხოლოდ თქვენს პოზიციას ვუსმინო? ეს ყველაფერი მიზანმიმართულად ხდება და იმ ადგილას რაც კეთდება, ნამდვილად კარგი საქმეა და ამას საერთოდ არ უნდა განხილვა“, _ თქვა სარიშვილმა და დარბაზი დატოვა.
ქალაქ ოზურგეთის მუნიციპალიტეტის საკრებულოს დეპუტატის ვასილ ჩიგოგიძის თქმით, მისთვის ბევრ კითხვებს ბადებს ის, რომ ერთი წლის წინანდელი საკითხი აქტუალური ახლა გახდა:
“თუკი ჩემი ქალაქისთვის კარგი გაკეთდება ამაში პრობლემას ვერ ვხედავ. მე საკრებულოს დეპუტატი ახლა გავხვდი და გაკვირვებული ვარ ჩემი კოლეგებით. ბალიშზე გეძინათ, ძმაო? საკრებულოზე საკითხი რომ განიხილება, ჩაყოლა უნდა ბოლომდე იმ საკითხს“, _ თქვა ვასილ ჩიგოგიძემ.
საკრებულოს ოპოზიციონერი დეპუტატი, ლევან მგელაძე ჩიგოგიძეს არ დაეთანხმა:
“მინდა, კიდევ ერთხელ ვთქვა, რომ ეს საკითხი, რომელზეც ახლა ვსაუბრობთ, ვმსჯელობთ, არ განხილულა საკრებულოზე და არსად თქმულა, რომ სკვერი ორად უნდა გაყოფილიყო. ეს არ შეესაბამება სიმართლეს და ამაში დარწმუნებული ვარ. ნამდვილად ვესწრებოდი სხდომას და არსად თქმულა ამ პროექტის შესახებ“, _ თქვა ლევან მგელაძემ.
საბოლოოდ, სამსაათიანი შეხვედრის შემდეგ მხარეები შეთანხმდნენ, რომ მსგავსი საკითხები საჯარო განხილვებით უნდა გადაწყდეს. თუმცა, ვერ შეთანხმდნენ მთავარ სადაო საკითხზე _ დაიბრუნებს თუ არა 9 აპრილის პარკი პირვანდელ სახეს.
