ნიადაგის გადაღლა იმ შემთხვევაში ხდება, როცა რომელიმე ბოსტნეული კულტურა, მრავალი წლის განმავლობაში, მოჰყავთ ერთსა და იმავე ადგილას. ნიადაგის "გადაღლის" მიზეზების შესახებ არსებობს სხვადასხვა თეორია _ ჩვეულებრივ მიიჩნევენ, რომ ეს იმიტომ ხდება, ყოველი მცენარე არა მარტო ცალმხრივად აღარიბებს ნიადაგს, არამედ ამასთანავე გამოყოფს ნივთიერებას, რომელიც იმავე კვალზე თრგუნავს იმავე სახეობის მცენარის ზრდას.
იმისთვის, რომ თავიდან ავიცილოთ უსიამოვნება, რაოდენ საჭიროდაც არ უნდა ჩათვალოთ, უნდა გქონდეთ უბის წიგნაკი და ზუსტად აღირიცხოს, საბოსტნე ნაკვეთის რომელ კვალზე მოგვყავდა ესა თუ ის კულტურა. აუცილებლად უნდა ვეცადოთ, თავიდან ავიცილოთ ერთი და იმავე კულტურის მოყვანა ერთსა და იმავე ადგილზე ზედიზედ ორი წლის განმავლობაში. არა ერთ კარგ მეურნეს აქვს ამოჩემებული, ყოველ წელს ერთსა და იმავე ადგილზე დათესოს ქინძი, ოხრახუში, კიტრი, ლობიო… თუ გვინდა მოსავლიანობა გავაუმჯობესოთ, ეს წესი უნდა შევცვალოთ.
ნიადაგის გადაღლა შეიძლება თავიდან ავიცილოთ სწორედ კულტურების მუდმივი მონაცვლეობით და არა მხოლოდ ერთხელ, როცა მოგვეხასიათება. ეს ნამდვილად უზრუნველყოფს წარმატებას საღი და ბევრი მოსავლის მისაღებად. კონკრეტულად: ნაკელით განოყიერებულ ნიადაგზე მოჰყავთ ისეთი ბოსტნეული კულტურები, რომლებიც მოითხოვენ ბევრ საკვებ ნივთიერებას და იტანენ ამ სასუქს. იგივე წელს, მაგრამ მეორადი კულტურის სახით შეიძლება მოვიყვანოთ სალათი, პრასი, სტაფილო, სუფრის ჭარხალი. შემდეგ წელს ხდება ნიადაგის გაკირიანება. ეს უმჯობესია ორ წელიწადში ერთხელ მოხდეს და მოვიყვანოთ ნებისმიერი კულტურა, რომელიც ამ ადგილზე არ დაგვთესია ან არ დაგვირგავს წინა წელს.
მიზანშეწონილია, ნაკვეთი გავყოთ ისე, რომ ერთ ნახევარზე შეიძლებოდეს იმ კულტურების მოყვანა, რომლებიც იტანენ ნაკელს. ხოლო მეორეზე იმ კულტურებისა, რომლებიც ვერ იტანენ ნაკელს. უნდა გვახსოვდეს ერთი უმნიშვნელოვანესი, საყურადღებო დეტალი ნიადაგის მოკირიანებისას _ კირი არ უნდა მოხვდეს ნაკელში! ეს ბევრმა ნაცადმა მეურნემ არ იცის! თუ ეს მოხდა, ნაკელიდან აზოტი მთლიანად დაიკარგება! ამიტომ უნდა გაკირიანდეს იმ წელს, როცა ნიადაგში არ შეგვაქვს ნაკელი და ის მომდევნო წელს შევიტანოთ. ზოგადად კი ნიადაგის ტიპი განსაზღვრავს, ჩამქრალი (დაშლილი) კირის შეტანაა საჭირო თუ ჩაუმქრალი (დაუშლელი).
დაფქული კირქვა, მერგელი, ტკილი (თიხაკირი) ან ჩამქრალი კირი შეიძლება ნიადაგში შევიტანოთ ყოველგვარი ზიანის გარეშე. ჩაუმქრალ კირს აქვს გაცილებით ძლიერი მოქმედება და ამიტომ იგი უნდა შევიტანოთ მძიმე ნიადაგში. იგი, ძირითადად, ფქვილის სახითა იყიდება. ჩაუმქრალი კირი ჰიგროსკოპიულია და წყალთან შერევისას ძლიერ სუსტდება. იგი უნდა შევინახოთ მხოლოდ შენობის გარეთ. მუდამ უმჯობესია, ის შევიძინოთ, მოვიპოვოთ შემოდგომაზე და მაშინვე გამოვიყენოთ, რომ საგაზაფხულოდ გამზადებული, გადაუღლელი ნიადაგი გვექნეს ჩვენს საბოსტნე ნაკვეთში.
