გუშინ, ქალაქ ოზურგეთის სახელმწიფო თეატრის დარბაზში ტელეკომპანია “GDS“-ის ახალი პროექტი _ “შეხვედრები რეგიონული მედიასთან“ გაიმართა.
მედიის წარმომადგენლების გარდა, შეხვედრაზე “ქართული ოცნების“ მხარდამჭერები, არასამთავრობო ორგანიზაციის და საზოგადოების ნაწილი მოხვდა. მათგან კითხვები არასამთავრობო ორგანიზაციის “ახალგაზრდა მეცნიერთა კლუბის“ ხელმძღვანელმა მინდია სალუქვაძემ და ალექსანდრე წუწუნავას სახელობის დრამატული თეატრის სამხატვრო ხელმძღვანელმა ვასილ ჩიგოგიძემ დასვეს.
“გურია ნიუსი“ გთავაზობთ იმ მონაწილეების სიას, რომლებიც დარბაზში სტუმრის სტატუსით იმყოფებოდნენ.
ვასილ ჩიგოგიძე (ოზურგეთის თეატრის სამხატვრო ხელმძღვანელი და ქალაქ ოზურგეთის მუნიციპალიტეტის საკრებულოს დეპუტატი), ბიძინა სალუქვაძე, (ვი-თი-ბი ბანკის ოზურგეთის ფილიალის ხელმძღვანელი), კახა ვასაძე (სამხატვრო სკოლის დირექტორი), თემურ ჯახვა (“გზამშენი 18“-ის დირექტორი და საპატიო ოზურგეთელი), ლადო ხავთასი (“ქართული ოცნების“ წევრი), მაია ღლონტი (პედაგოგი), ლევან მჟავანაძე ("ახალგაზრდა მეცნიერთა კლუბის წარმომადგენელი"), მინდია სალუქვაძე (ახალგაზრდა მეცნიერთა კლუბი), დავით მდინარაძე (პედიატრი), ლევან ნინიძე (ოზურგეთის მუნიციპალიტეტის საკრებულოს ყოფილი დეპუტატი), გიორგი დოლიძე (მსახიობი), ვასილ ვაშალომიძე (“ქართული ოცნების“ მხარდამჭერი), თაკო სარიშვილი (“ქართული ოცნების“ ოზურგეთის რაიონული ორგანიზაციის ახალგაზრდული ფრთის წარმომადგენელი), დავით ჩანტლაძე (ექიმი).
თემურ ჯახვას თქმით, ის, როგორც ქალაქ ოზურგეთის საპატიო მოქალაქე ისე იყო მიწვეული.
“მე ვარ ქალაქ ოზურგეთის საპატიო მოქალაქე და ამ სტატუსით ვიყავი მიწვეული“, _ გვითხრა თემურ ჯახვამ.
“გურია ნიუსმა“ კიდევ ერთი რესპოდენტი ჩაწერა. ბიძინა სალუქვაძის თქმით, მისი სურვილი იყო ბიძინა ივანიშვილთან შეხვედრა.
“გავიგე, რომ ბიძინა ივანიშვილთან იყო შეხვედრა და აქედან გამომდინარე, მოვხვდი შეხვედრაზე“, _ თქვა ბიძინა სალუქვაძემ.
