„ქართულმა ოცნებამ" ლანჩხუთისა და ჩოხატაურის საარჩევნო ოლქში წარდგენილი დეპუტატობის კანდიდატი თემურ ჭკუასელი ახალი კანდიდატით _ ნინო წილოსანით, 6 სექტემბერს, ღამის 12 საათზე, პოლიტსაბჭოს საგანგებო სხდომაზე ჩაანაცვლა.
აღნიშნული ინფორმაცია „გურია ნიუსისთვის“ ექსკლუზიურად გახდა ცნობილი, რაც თემურ ჭკუასელმაც დაგვიდასტურა.
_ სანამ პრემიერი კანდიდატად დამასახელებდა, მანამდე იყო საუბარი, რომ მე ვიქნებოდი სიაში და კანდიდატი იქნებოდა წილოსანი. მაგრამ მაშინ რაღაცეები შეიცვალა და როგორც ვიცი, წილოსანი ოჯახური სიტუაციის გამო ვერ დააყენეს.
ამიტომ, მე მთხოვეს, რომ კენჭი მეყარა. თუმცა, გუშინ, პოლიტსაბჭოს სხდომაზე პრემიერმა ისევ მთხოვა, რომ გადამენაცვლებინა პროპორციულ სიაში და ჩემს ნაცვლად კანდიდატად წილოსანს წარადგენდნენ, _ აღნიშნა ჩვენთან საუბრისას ჭკუასელმა და კანდიდატობიდან მოხსნის შემდეგ პირველი ინტერვიუც მოგვცა.
_ ბატონო თემურ, ჯერ კიდევ გუშინ, თქვენი სარეკლამო მასალები იბეჭდებოდა, პლაკატები იკვრებოდა. თქვენი კანდიდატურის მოხსნის არგუმენტად რა დაასახელეს?
_ არგუმენტი ისა, რომ თავიდანვე ასე უნდა ყოფილიყო, თავიდანვე უნდა დასახელებული წილოსანი და ასე რომ არ მოხდა, ფაქტობრივად, მე მოვევლინე მხსნელად. პოლიტსაბჭოზე მითხრეს, რომ ჩემი კანდიდატურის მოხსნის მთავარი არგუმენტი ისაა, რომ ჩემი რეპუტაცია არ დადგეს სასწორზე, რადგან რომ ვერ გავიმარჯვო, ცუდი იქნება.
_ წილოსანი თქვენზე უკეთესი, ავტორიტეტული კანდიდატია?
_ ასე გამოდის.
_ ასე თქვენ ფიქრობთ თუ სხვის სიტყვებს იმეორებთ?
_ მე რას ვფიქრობ, ეს არაა მნიშვნელოვანი. როცა პრემიერი გთხოვს, რომ გადახვიდე სიაში, რადგან პარტიისთვის ასეა საჭირო, უნდა შეასრულო ეს თხოვნა და მეც შევასრულე. არ ვიცი დეტალები, რას ფიქრობს ნინო, რა და როგორ იქნება. დავპირდი პრემიერს, რომ დავეხმარები ყველანაირად. ავუხსენი მას, რა მქონდა გაკეთებული და მადლობაც გადამიხადეს. ახლა მთავარია, ჩემს ხალხს ეს გავაგებინო. ვფიქრობ, გაღიზიანებულები იქნებიან. არ ვიცი, რა გამოვა ამ საქმიდან _ სულით და გულით მინდა, რომ „ქართული ოცნების“ კანდიდატმა გაიმარჯვოს.
_ გამსვლელ სიაში გსვამენ?
_ კი, რა თქმა უნდა.
_ რომელ ნომრად?
_ სიაში არის 7-8 ადამიანი, რომელიც მოიაზრებიან აღმასრულებელ ხელისუფლებაში _ ვგულისხმობ გიორგი კვირიკაშვილს, კახი კალაძეს და ა. შ. ამიტომ, ამ შემთხვევაში 29-ე ან 30-ე.
_ ნაწყენი არ ხართ?
_ არა. აქ წყენაზე კი არ არის საუბარი. უბრალოდ, ცოტა უხერხული სიტუციაა _ ლანჩხუთსა და ჩოხატაურში, გარკვეული ადამიანები ნაწყენები არიან და ახლა ეს უნდა დალაგდეს.
_ „ქართული ოცნების“ დატოვებას ხომ არ ფიქრობთ?
_ რა თქმა უნდა არა, _ გვითხრა ჭკუასელმა.
აღსანიშნავია, თემურ ჭკუასელი თითქმის ერთი თვე იყო საარჩევნო მარათონში ჩაბმული და მის მხარდასაჭერად, როგორც ჩოხატაურში, ასევე, ლანჩხუთში ასობით ადამიანი მუშაობდა. ამ დრომდე უცნობია, როგორც დალაგდება ახალი კანდიდატის შტაბები და რა ბედი ელით იმ ადამიანებს, რომლებიც ჭკუასელისთვის მუშაობდნენ. ამ კითხვაზე პასუხი ვერც ახალმა კანდიდატმა გაგვცა იმ მიზეზით, რომ არაფერი იცოდა:
_ დეტალებს დავაზუსტებ პარტიის ცენტრალურ ოფისში და მერე ვისაუბროთ, _ გვითხრა ნინო წილოსანმა.
_ ქალბატონო ნინო, თემურ ჭკუასელი ერთი თვეა, შეხვედრებს მართავს… არ გეუხერხულებათ მისი ჩანაცვლება?
_ მე არ ვიცი, რა გახდა ბატონი თემურის კანდიდატურის მოხსნის მიზეზი _ მისი ჯანმრთელობის მდგომარეობა თუ ეს პარტიის გადაწყვეტილება იყო. სანამ დეტალებს არ დავაზუსტებ, ვერაფერს გეტყვით.
_ ჭკუასელის თქმით, ეს პარტიის გადაწყვეტილება იყო…
_ მე ჯერ არაფერი ვიცი ამის შესახებ.
_ ჩვენს გვაქვს დაზუსტებული ინფორმაცია და ამ კითხვას ამიტომ ვსვამთ. საინტერესოა, რა ბედი ელით ჭკუასელის შტაბის წევრებს _ დატოვებთ თუ თქვენი გუნდის მოყვანას აპირებთ?
_ ამაზეც ახლა საუბარი არ შემიძლია, _ გვითხრა წილოსანმა.
კომენტარები ვერც ჭკუასელის ჩოხატაურისა და ლანჩხუთის შტაბებში გააკეთეს. შტაბებს ცენტრალური ოფისიდან ამის შესახებ არანაირი შეტყობინება არ აქვთ მიღებული _ მათ კანდიდატის ცვლილების შესახებ ინფორმაცია, „გურია ნიუსის“ ვებგვერდზე გამოქვეყნებული მასალიდან გაიგეს.
ჯერჯერობით განმარტებები არც ცენტრალურ შტაბში გაუკეთებიათ. უფრო მეტიც,ამ დრომდე არ ჩამოხსნილა თემურ ჭკუასელის საარჩევნო ბანერი ლანჩხუთში, რომელიც გუშინ, მოხსნამდე რამდენიმე საათით ადრე გააკრეს.
