ლანჩხუთის მუნიციპალიტეტის გამგებლის ყოფილმა პირველმა მოადგილემ, ვახტანგ ზენაიშვილმა, რომელსაც თანამდებობიდან გათავისუფლებასთან დაკავშირებით, სასამართლო დავა აქვს ლანჩხუთის მუნიციპალიტეტის გამგეობასთან, ჟურნალისტებისთვის საქართველოს უზენაესი სასამართლოს განჩინება გაასაჯაროვა.
ზენაიშვილის მიერ წარმოდგენილი სასამართლო გადაწყვეტილებით, უზენაესმა სასამართლომ ლანჩხუთის მუნიციპალიტეტის საჩივარი დაუშვებლად მიიჩნია და უცვლელად დატოვა ქუთაისის სააპელაციო სასამართლოს მიმდინარე წლის ხუთი თებერვლით დათარიღებული გადაწყვეტილება, რომელმაც თავის დროზე არ გაიზიარა გამგებლის, ზაზა ურუშაძის მტკიცება, რომ თითქოსდა მას ჰქონდა უფლება ყოველგვარი საფუძვლის გარეშე გაეთავისუფლებინა მისი მოადგილე.
უზენაესი სასამართლოს გადაწყვეტილება საბოლოოა და გასაჩივრებას არ ექვემდებარება.
"ყველა სასამართლო ინსტანციამ გამგებლის ბრძანება ჩემი სამსახურიდან გათავისუფლების თაობაზე არაკანონიერად ცნო და მოითხოვა გათავისუფლების საფუძვლის დასაბუთება, რაც გამგეობამ ვერ გააკეთა და დაიწყო იმის მტკიცება, რომ ჰქონდა უფლება, საფუძვლის გარეშეც გაეთავისუფლებინა თანამშრომელი. არადა, როგორც პირველადი ინსტანციის, ისე სააპელაციო სასამართლომ დეტალურად ახსნა, თუ რატომ არ ჰქონდა გამგეობას უფლება, საფუძვლის გარეშე გაეთავისუფლებინა თანამშრომლი. იმედს ვიტოვებ, რომ გამგეობა არ დაადგება ძველ მცდარ გზას და სამართლიანობას აღადგენს“, _ ამბობს ზენაიშვილი, რომელიც სამართლიანობის აღდგენაში მის თანამდებობაზე აღდგენასა და გაცდენილი 17 თვის ხელფასის ანაზღაურებას გულისხმობს.
აღნიშნულ საკითხთან დაკავშირებით, გამგებლის ყოფილმა პირველმა მოადგილემ მუნიციპალიტეტის გამგეობაში ზაზა ურუშაძის სახელზე განცხადებაც შეიტანა .
„ბატონო ზაზა, იმედი მაქვს არ გამოსცემთ მორიგ უკანონო ბრანებას გამოგონილი საფუძვლით და მიიღებთ სწორ, სამართლიან გადაწყვეტილებას, ანუ შექმნით პირობებს სასამართლო გადაწყვეტილების აღსასრულებლად. აღმადგენთ თანამდებობაზე და გადამიხდით განაცდურს“, _ წერია ზენაიშვილის განცხადებაში.
გამგეობის იურიდიულ სამსახურში კი ამბობენ, რომ, ჯერჯერობით, მათთვის არ არის ცნობილი უზენაესი სასამართლოს განჩინება და შესაბამისად, კომენტარის გაკეთებისგანაც თავს იკავებენ.
