თამბაქოს მოხმარება გლობალურ პრობლემას წარმოადგენს, ხოლო ევროპის რეგიონში მდებარე სხვა ქვეყნებთან შედარებით საქართველოში თამბაქოს მოხმარების ყველაზე მაღალი მაჩვენებელი ფიქსირდება.
როგორც ცნობილია, ჯანმრთელობის მსოფლიო ორგანიზაციის თამბაქოს კონტროლის ჩარჩო კონვენცია ძალაში 2005 წლიდან შევიდა, ხოლო საქართველო მას 2006 წელს შეუერთდა, თუმცა 2016 წლისთვის კონვენციის შესრულების მხრივ საქართველო რეგიონში ყველაზე ჩამორჩენილი ქვეყანაა.
თამბაქოს მავნე ზეგავლენის შედეგად წელიწადში 11 000 ადამიანი იღუპება, მოხმარების გამო გამოწვეული სხვადასხვა დაავადებების რაოდენობა კი, დღითიდღე მატულობს.
აღნიშნულ პრობლემასთან ბრძოლის მიზნით, „თამბაქოს კონტროლის ჩარჩო კონვენციის იმპლემენტაციისა და მონიტორინგის ცენტრი“ ონლაინ ხელმოწერებს აგროვებს.
პეტიცია, რომელსაც 3000 ადამიანიდან ხელს 870 კაცი უკვე აწერს, მიზნად ისახავს საზოგადოებრივი თავშეყრის ადგილებსა და ტრანსპორტში სიგარეტის მოწევის აკრძალვას, გარდა ამისა, თამბაქოს ყველა სახის რეკლამის, სპონსორობისა და პოპულარიზაციის აკრძალვასაც, ასევე, თამბაქოს კოლოფებზე პიქტოგრამების დატანას და კანონის აღსრულების კონტროლის გამკაცრებას.
ამ პეტიციის შესახებ საზოგადოებისთვის ინფორმაციის მიმწოდებელი ბანერები თბილისის მეტროსადგურებშიც გამოიფინა.
"გურია ნიუსი" დაინტერესდა თუ რას ფიქრობენ მოქალაქეები, უნდა აიკრძალოს თუ არა მოწევა საზოგადოების თავშეყრის ადგილებში, რის გასარკვევადაც თბილისის ქუჩებში შემთხვევითი შერჩევით მოქალაქეები გამოკითხა.
სვეტლანა მახარაძის თქმით, მოწევა საზოგადოებისთვის მიღებული ქცევაა და არ უნდა იკრძალებოდეს.
"სიგარეტის მოწევა საზოგადოებაში მიღებული და ყველგან დაშვებული ქცევაა. შესაბამისად, საზოგადოებრივი თავშეყრის ადგილებში მოწევა არ უნდა აიკრძალოს,"_ამბობს მახარაძე.
განსხვავებული აზრი აქვს ერთ-ერთ მოქალაქე გიორგი დობორჯგინიძეს, რომელიც "გურია ნიუსთან" საუბრისას აღნიშნავს, რომ მოწევა უნდა აიკრძალოს.
"საზოგადოებრივი თავშეყრის ადგილებში სიგარეტის მოწევა უნდა აიკრძალოს, იმიტომ რომ არამწეველებს ვნებს. რაც შეეხება, თუნდაც ჩემს მეგობრებს, მწეველ ადამიანებს, შეუძლიათ დატოვონ თავშეყრის ადგილი, მაგალითად, კაფე, გავიდნენ მოსაწევად, რასაც, დაახლოებით, 2 წუთი სჭირდება და შემდეგ დაბრუნდნენ. ასე შეუძლიათ გაუფრთხილდნენ არა მწეველი ადამიანების ჯანმრთელობას,"_ამბობს დობორჯგინიძე.
თემურ მახარაშვილის თქმით კი, სიგარეტის სუნი არამწეველ ადამიანებს აწუხებს, რის გამოც მოწევა უნდა აიკრძალოს.
"მოწევა აუცილებლად უნდა აიკრძალოს,იმიტომ რომ ხალხი სიგარეტის სუნისა და კვამლისგან წუხდება,"_თქვა მახარაშვილიმა.
სიგარეტის არასასიამოვნო სუნზე გაამახვილა ყურადღება ასევე ლია ჟვანიამაც.
"რა თქმა უნდა, უნდა აიკრძალოს. იმიტომ რომ,მაგალითად, მე არ მსიამოვნებს სიგარეტის სუნი,"_ამბობს ჟვანია.
ნინო ესაიაშვილი კი აღნიშნავს, რომ სიგარეტის წარმოება საერთოდ უნდა შეწყდეს.
"სიგარეტის მოწევას კი არ უნდა კრძალავდნენ, არამედ საერთოდ წარმოება უნდა შეწყდეს,"_ამბობს ესაიაშვილი.
ნათია თამაზაშვილის აზრით, მოწევა არ უნდა იკრძალებოდეს.
"მოწევა არ უნდა აიკრძალოს, პირადად მე, ძალიან მომწონს როდესაც ბიჭი სიგარეტს ეწევა. რაღაცნაირად უხდებათ სიგარეტის ხელში ჭერა და კვამლსაც საყვარლად უშვებენ,"_თქვა თამაზაშვილმა.
თამარ გოგიჩაიშვილი კი ამბობს, რომ მოწევა ორივე კატეგორიის ადამიანებისთვის საზიანოა, რის გამოც უნდა აიკრძალოს.
"მოწევა მავნე ჩვევაა, რომელიც უნდა აიკრძალოს, რადგან ძალიან ბევრ დაავადებას იწვევს, როგორც არამწეველებში ასევე მწეველ ადამიანებში,"_ამბობს გოგიჩაიშვილი.
რა ღონისძიებებს გააატარებს მთავრობა სიგარეტის თავშერის ადგილებში მოწევასთან დაკავშირებით, ჯერჯერობით უცნობია.
ამავე თემაზე:
თამბაქოს ფასი გაიზარდა… რა იქნება შემდეგი რეგულაცია?
რა ხდება დასაშვები "რეკლამის შესახებ" კანონპროექტით
თამბაქოს მავნე ზეგავლენით საქართველოში, წელიწადში 11 000 ადამიანი იღუპება
