ფარულ საგამოძიებო მოქმედებებთან დაკავშირებულ ოპერატიულ-ტექნიკურ სააგენტოს ეკისრება უფლებამოსილება, ელექტრონული კომუნიკაციების სფეროში ავტორიზებულ პირებს განუსაზღვროს მოთხოვნები, ვალდებულებები და აკონტროლოს მათი შესრულება. მოთხოვნებისა და ვალდებულებების შეუსრულებლობა კი, ავტორიზებული პირების დაჯარიმებას გამოიწვევს.
ამას პარლამენტში ინიცირებული კანონპროექტი ითვალისწინებს, რომლის მიხედვით, ოპერატიულ-ტექნიკური სააგენტოს უფროსს უფლება აქვს, მიიღოს გადაწყვეტილება ავტორიზებული პირის საინფორმაციო-ტექნოლოგიური და სატელეკომუნიკაციო ინფრასტრუქტურის აუდიტის ჩატარების შესახებ.
რაც შეეხება პასუხისმგებლობის ფორმებს, კანონპროექტის მიხედვით, სააგენტოს ექნება უფლებამოსილება "ელექტრონული კომუნიკაციების შესახებ" კანონის საფუძველზე ავტორიზებული პირის მიმართ გამოიყენოს როგორც წერილობითი გაფრთხილება, ასევე ფულადი ჯარიმები. პროექტის მიხედვით, ფულადი სანქციის ოდენობა განსაზღვრულია 30 000, 90 000 და 200 000 ლარის ოდენობით.
ოპერატიულ-ტექნიკური სააგენტო სუს-ის მმართველობის სფეროში შემავალი საჯარო სამართლის იურიდიული პირი იქნება.
კანონპროექტით, სააგენტოს შემდეგი ღონისძიებების განხორციელება ეკისრება: სატელეფონო კომუნიკაციის ფარული მიყურადება და ჩაწერა; კავშირგაბმულობის არხიდან ინფორმაციის მოპოვება; კომპიუტერული სისტემიდან ინფორმაციის მოპოვება; გეოლოკაციის რეალურ დროში განსაზღვრა; საფოსტო სატელეგრაფო გზავნილთა კონტროლი; ფარულ აუდიო და ვიდეო ჩაწერა, ფოტო გადაღება; ელექტრონული კომუნიკაციების სფეროში ინფორმაციული უსაფრთხოების უზრუნველყოფა; სახელმწიფო უწყებებისა და დაწესებულებების საინფორმაციო-ტექნოლოგიური უზრუნველყოფა.
